អ្នកចម្រៀងខ្មែរ២នាក់ ច្រៀងបទចម្រៀងល្បី១បទ របស់អ្នកចម្រៀងលុចហ្សឹមប៊ួរ

2018-03-16 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

" Après Toi " ជាគឺបទចម្រៀងដ៏ល្បីរបស់ប្រទេសលុចហ្សឹមប៊ួរ ដែលមានន័យជាភាសាខ្មែរថា "បន្ទាប់ពីគ្មានបង" (ភាសាជាតិរបស់ប្រទេសនេះ គឺភាសាបារាំង ភាសាអាល្លឺម៉ង់ និង ភាសាលុចហ្សឹមប៊ួរ) ។ បទចម្រៀងនេះរៀបរាប់ពីទុក្ខសោករបស់នារីម្នាក់ ដែលត្រូវព្រាត់ប្រាស់ពីបុរសជាទីស្រឡាញ់។

" Après Toi " ច្រៀងដោយអ្នកចម្រៀងឈ្មោះ Vicky Leandros និងជាបទចម្រៀងដែលជាប់ចំណាត់ថ្នាក់លេខ១ ក្នុងការប្រឡងចម្រៀង Eurovision Song Contest ឆ្នាំ ១៩៧២។ បទនេះនិពន្ធទំនុកដោយលោក Yves Dessca និង លោក Klaus Munro និពន្ធបទភ្លេងដោយ លោក Leo Leandros ដែលជាឪពុករបស់នាងនិង លោក Klaus Munro ។

ចុចតំណភ្ជាប់នេះ ដើម្បីដឹងពីទំនាក់ទំនងនៃបទចម្រៀងរបស់នាងមួយបទទៀត និង បទចម្រៀងរបស់លោក ស៊ីន ស៊ីសាមុត ដែលមានចំណងជើងថា”ចាំពៅវិលវិញ”

បន្ទាប់ពីជាប់ចំណាត់ថ្នាក់លេខ១ បទចម្រៀង " Après Toi " បានល្បីល្បាញពាសពេញពិភពលោក។ អ្នកចម្រៀង Vicky Leandros បានច្រៀងបទចម្រៀងនេះដាក់ថាសជា៧ភាសា គឺ ភាសាបារាំង ភាសាអង់គ្លេស ភាសាអ៊ីតាលី ភាសា អាល្លឺម៉ង់ ភាសាអេស្ប៉ាញ ភាសាក្រិក និងភាសាជប៉ុន។ បទចម្រៀងទាំងនេះ លក់ដាច់ជាង៦លានថាស ហើយបានទទួលពានរង្វាន់ "ថាសចម្រៀងមាស"។

នៅចក្រភពអង់គ្លេស បទចម្រៀងនេះបានចេញលក់ក្រោមចំណងជើងថា Come What May ដែលមានន័យថា "ទោះបីជាមានរឿងអ្វីកើតឡើងក៏ដោយ"។ បទចម្រៀង Come What May បានលក់ដាច់ និងជាប់ចំណាត់ថ្នាក់លេខ២ ក្នុងតារាង UK charts នៅឆ្នាំ១៩៧២។

Après toi និង Come What May ទទួលបានការគាំទ្រយ៉ាងខ្លាំងនៅក្នុងពិភពលោក ហើយបទចម្រៀងនេះក៏មានឥទ្ធិពលមកដល់ប្រទេសកម្ពុជាផងដែរ។ អ្នកចម្រៀងខ្មែរពីរនាក់គឺ អ្នកស្រីហួយ មាស និង អ្នកស្រី ពៅ វណ្ណារី បានច្រៀងបទចម្រៀងនេះឡើងវិញ (cover) ។ ប៉ុន្តែ ទំនុកច្រៀងរបស់អ្នកទាំងពីរមិនដូចគ្នានោះទេ។ ទំនុកចម្រៀង ដែលច្រៀងដោយអ្នកស្រីហួយ មាស ដូចគ្នាបេះបិទ នឹងបទចម្រៀង Come What May ។

ចំណែកឯទំនុកចម្រៀង ដែលច្រៀងដោយអ្នកស្រីពៅ វណ្ណារី ហាក់ឃ្លាតឆ្ងាយពីបទដើមបន្តិច។

កម្ពុជានាទសវត្សរ៍ឆ្នាំ ១៩៧០ ត្រូវបានគេចាត់ទុកថា ជាយុគនៃភាសាអង់គ្លេស។ ឯអ្នកចម្រៀងដែលនិយមច្រៀងបទចម្រៀងខ្មែរលាយភាសាអង់គ្លេស ហើយមានប្រជាប្រិយភាពជាងគេនៅសម័យនោះ គឺអ្នកស្រី ពៅ វណ្ណារី៕

អត្ថបទ៖ ឃុត សុខឿន