សហព័ន្ធប្រដាល់ ហាមកីឡាករខ្មែរ មិនឲ្យឆ្លើយឆ្លងរឿងឌឺដងគ្នា ជាមួយនឹងកីឡាករថៃ Saensatharn

2018-04-20 08:10:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បាននិយាយថា កីឡាករថៃ Saensatharn មិនសមជាអ្នកកីឡានោះទេ ដោយមិនដឹងថាអ្វីទៅជាកីឡា ហើយលោកក៏មិនឲ្យអ្នកប្រដាល់កម្ពុជាឆ្លើយឆ្លងទាក់ទិននឹងរឿងឌឺដងគ្នាជាមួយនឹងកីឡាករថៃរូបនោះដែរ។

លោក តែម ម៉ឺន ថ្លែងនាពេលកន្លងមក

ការលើកឡើងនេះ បន្ទាប់ពីអ្នកប្រើប្រាស់បណ្តាញសង្គម បាននឹងកំពុងចាប់អារម្មណ៍ខ្លាំងចំពោះការឌឺដងរវាងកីឡាករថៃ Saensatharn ជាមួយអ្នកប្រដាល់ជួរមុខរបស់កម្ពុជាដូចជា កែវ រំចង់ ធឿន ធារ៉ា ម៉ឺន សុភា រឿង សោភ័ណ្ឌ ជាដើម។ រឿងដំបូងឡើយគឺកើតឡើងរវាងអ្នកគាំទ្រគុនខ្មែរជាមួយអ្នកប្រដាល់ថៃខាងលើប៉ុណ្ណោះ តែក៏រាលដាលដល់កីឡាករកម្ពុជាថែមទៀត។

លោកប្រធានសហព័ន្ធបានថ្លែងថា លោកមិនបានដឹងអំពីរឿងរ៉ាវឌឺដងរវាងអ្នកប្រដាល់ថៃ Saensatharn និងកីឡាករជួរមុខរបស់កម្ពុជានោះទេ ដោយមិនឃើញមានអ្នកណាជូនព័ត៌មានមកលោកឡើយ។ ប៉ុន្តែលោកថា បើមានករណីនេះមែន លោកមិនគាំទ្រចំពោះទង្វើបែបនេះទេ ហើយនេះជារឿងបុគ្គលម្នាក់ទេ មិនមែនជារឿងជនជាតិថៃទាំងមូលឡើយ។

កីឡាករថៃ Saensatharn (ខោខ្មៅ) ពេលប្រកួតនៅកម្ពុជា នាពេលកន្លងមក

លោក តែម ម៉ឺន បន្ថែមថា ជាតិសាសន៍ណាក៏គេមិនគាំទ្រដែរ រាល់ទង្វើដែលធ្វើឲ្យបែកបាក់សាមគ្គី ជាពិសេសទង្វើក្អេងក្អាងអំនួត គ្មានសីលធម៌ជាអ្នកកីឡា។ កីឡាគឺវាមានអត្ថន័យច្បាស់របស់គេ កីឡាមានតែធ្វើឲ្យស្រុះស្រួលគ្នា កីឡាធ្វើឲ្យមានសាមគ្គីភាព ដូច្នេះបើមានទង្វើនេះមែន លោកក៏មិនអនុញ្ញាតឲ្យកីឡាករកម្ពុជាឆ្លងឆ្លើយ ពាក់ព័ន្ធនឹងបុគ្គលនេះឡើយ៕

អត្ថបទ៖ នួន ស៊ីណា