​ក្លឹប​របស់ ធារី ឡើង​ឈរ​​លើ​ក្លឹប​តារាង​កម្ពុជា​៣​រូប​ទៀតនៅលីគម៉ាឡេស៊ី គិត​ត្រឹម​ថ្ងៃ​២៧​មេសា

  • 2018-04-28 02:46:49
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្លឹប​បាល់ទាត់ Terengganu របស់ ​ធារី ចន្ថាប៊ីន បាន​ឡើង​ឈរ​នៅ​ចំណាត់ថ្នាក់​លេខ​២ បណ្ដោះអាសន្ន​លើ​ក្រុម​របស់​តារា​បាល់ទាត់​កម្ពុជា ៣​រូប​ផ្សេង​ទៀត​ ក្នុង​តារាង​លីគ​កំពូល​ម៉ាឡេស៊ី គិត​ត្រឹម​ថ្ងៃ​ម្សិលមិញ បន្ទាប់ពី​ប្រកួត​ស្មើ​ជាមួយ​ក្លឹប Kedah ដោយ​លទ្ធផល ១-១ នៅ​សប្ដាហ៍​ទី​៧។

ធារី ចន្ថាប៊ីន ក្នុងការប្រកួតរវាង Terengganu និង Kedah ថ្ងៃទី២៧មេសា (រូបថត៖ Terengganu FC)
Terengganu បាន​ស៊ុត​នាំ​មុខ​ដោយ​កីឡាករ Partiban នៅ​នាទី​៤៤ ចុង​វគ្គ​ទីមួយ។ ចំណែក​ក្រុម​ភ្ញៀវ Kedah បាន​រក​គ្រាប់​តាម​ស្មើ​ដោយ​ខ្សែប្រយុទ្ធ Baddrol Bakhtiar ក្រោយ​អាជ្ញាកណ្ដាល​ផ្លុំ​កញ្ចែ​ចាប់​​ផ្ដើម​វគ្គ​ទីពីរ បាន ១៩​នាទី។ លទ្ធផល ១-១ នេះ បាន​ធ្វើឲ្យ Terengganu ឈរ​លេខ​២ មាន ១២​ពិន្ទុ (ឈ្នះ៣ ស្មើ៣ ចាញ់​១)។

ដោយឡែក ក្លឹប​ Pahang FA របស់ ចាន់ វឌ្ឍនាកា កំពុង​ស្ថិត​នៅ​លេខ​៣ មាន ១១ពិន្ទុ (ឈ្នះ៣ ស្មើ២ ចាញ់១) ហើយ​នឹង​ត្រូវ​ជួប​ក្លឹប Malacca United ដែល​កំពុង​ឈរ​នៅ​លេខ​៧ ក្នុង​សប្ដាហ៍​ទី​៧ នា​ថ្ងៃ​ទី២៨ មេសា​នេះ។ ចំណែក ក្លឹប PKNP របស់ កែវ សុខផេង ដែល​៣ប្រកួត​ចុងក្រោយ មិន​ទាន់​ស្គាល់​ពាក្យ​ថា​ឈ្នះ ស្ថិត​នៅ​លេខ​៩ ដោយ​ប្រកួត​ស្មើ​ក្រុម​ម្ចាស់ផ្ទះ PKNS ដោយ​លទ្ធផល ១-១ កាលពី​ម្សិលមិញ​។

ចាន់ វឌ្ឍនាកា ក្នុងការប្រកួតមួយ កាលពីពេលកន្លងទៅ (រូបថត៖ Pahang FA)

ចំពោះ​ក្លឹប Negeri Sembilan របស់ ប្រាក់ មុន្នីឧត្តម កំពុង​ស្ថិតនៅ​បាត​តារាង ដោយ​៦ប្រកួត​ទើបតែ​មាន ៤​ពិន្ទុ​ប៉ុណ្ណោះ។ យប់​នេះ ពួកគេ​​នឹង​ត្រូវ​ទៅ​សួរ​សុខ​ទុក្ខ​ក្រុម​ម្ចាស់ផ្ទះ Selangor ។

សូម​បញ្ជាក់​ថា ការ​ប្រកួត​របស់ Pahang និង Segeri Sembilan ធ្វើឡើង​នៅ​ម៉ោង ៨យប់​ដូចគ្នា (ម៉ោង​នៅ​កម្ពុជា)៕

អត្ថបទ៖ លាភ.

អត្ថបទថ្មី
;