កីឡាករខ្មែរដែលផ្ទេរទៅក្លឹបនៅម៉ាឡេស៊ី នរណាខ្លះជោគជ័យ នរណាខ្លះមិនជោគជ័យ?

2018-04-30 07:37:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តារាបាល់ទាត់កម្ពុជា ៤រូបបានផ្លាស់ទៅកាន់ក្លឹបផ្សេងៗគ្នា នៅលីគកំពូលម៉ាឡេស៊ី ក្នុងរដូវកាលនេះ។ ក្នុងនោះ គឺ ធារី ចន្ថាប៊ីន ផ្ទេរទៅក្លឹប Terengganu, ចាន់ វឌ្ឍនាកា ទៅ Pahang, កែវ សុខផេង ទៅ PKNP និង ប្រាក់ មុន្នីឧត្តម ទៅ Negeri Sembilan។

សកម្មភាពរបស់ ធារី ចន្ថាប៊ីន ពេលជម្រើសជាតិកម្ពុជា ប៉ះ ឥណ្ឌា នាការប្រកួតមិត្តភាពកន្លងទៅ

១- ធារី ចន្ថាប៊ីន៖ កីឡាករកម្ពុជារូបនេះ បានក្លាយជាកូនសោដ៏សំខាន់នៅក្នុងតំបន់បម្រើការពាររបស់ Terengganu ដោយអាចចូលលេងក្នុងជម្រើស១១នាក់ដំបូង ស្ទើរគ្រប់ការប្រកួត។ កាលពីដើមរដូវកាល លោក Irfan Bakti Abu Salim អ្នកចាត់ការក្លឹប Terengganu បានពន្យល់ថា មូលហេតុដែលលោកនាំយក ធារី ទៅកាន់ប្រទេសម៉ាឡេស៊ី ព្រោះធារីជាប្រធានក្រុមជម្រើសជាតិកម្ពុជា ដែលមានបទពិសោធច្រើន។ លើសពីនេះ គេធ្វើបានល្អនៅតំបន់ការពារ និងបម្រើការពារ។

ចាន់ វឌ្ឍនាកា លេងឲ្យជម្រើសជាតិកម្ពុជា ពេលប៉ះជម្រើសជាតិឡាវ នាពេលកន្លងទៅ

២- ចាន់ វឌ្ឍនាកា៖ តារាឆ្នើម ដែលជា Top Scorer របស់បឹងកេត មុនផ្ទេរទៅកាន់ប្រទេសជប៉ុន ក៏ជាកីឡាករសំខាន់ម្នាក់របស់ក្លឹប Pahang FA ផងដែរ។ ជាក់ស្ដែង គេបានជាប់ជាជម្រើស១១នាក់ដំបូងជារឿយៗ ទោះបីជាមកទល់ពេលនេះ មិនទាន់អាចរកគ្រាប់បាល់នៅក្លឹបថ្មីនេះបានក៏ដោយ។ វឌ្ឍនាកា បានរួមចំណែកជួយឲ្យ Pahang ឈរនៅលេខ២ នៃលីគកំពូលម៉ាឡេស៊ី គិតត្រឹមសប្ដាហ៍ទី៧។ លើសពីនេះ Pahang បានឈានដល់វគ្គពាក់កណ្ដាលផ្តាច់ព្រ័ត្រ FA Cup ម៉ាឡេស៊ីផងដែរ។

កែវ សុខផេង ហ្វឹកហាត់ជាមួយក្រុមជម្រើសជាតិ

៣- កែវ សុខផេង៖ ថ្មីៗនេះ សារព័ត៌មានបរទេស Goal បានចុះផ្សាយថា អតីតកីឡាកររបស់ក្លឹបភ្នំពេញក្រោន បានចែកផ្លូវពីក្លឹប PKNP ហើយ។ តាមការបញ្ជាក់របស់គ្រូបង្វឹកលោក Abu Bakar Fadzim របស់ PKNP បានឲ្យដឹងថា សុខផេង ជួបការលំបាកក្នុងការលេងឲ្យត្រូវជើងជាមួយសមាជិកក្រុមដទៃទៀត។ ម្យ៉ាងទៀត អតីតកីឡាករភ្នំពេញក្រោនរូបនេះ មានកាយសម្បទាមិនសូវអំណោយផល និងលេងដោយមិនមានការការពារ។ លោកបន្តថា ភាគីទាំងសងខាង បានយល់ព្រមគ្នាលើការបញ្ចប់កុងត្រានេះ។ យ៉ាងណាក្ដី សាមីកីឡាករ និងក្លឹប មិនទាន់ធ្វើការប្រកាសជាផ្លូវការពីការផ្តាច់កុងត្រានេះនៅឡើយទេ។

ប្រាក់ មុន្នីឧត្តម នៅព្រលានយន្តហោះអន្តរជាតិភ្នំពេញ

៤- ប្រាក់ មុន្នីឧត្តម៖ បើតាមប្រភពជិតស្និតនឹង ប្រាក់ មុន្នីឧត្តម បានប្រាប់ដល់វេបសាយ Sabay កាលពីពេលថ្មីៗនេះថា ប្រាក់ មុន្នីឧត្តម ចង់ចេញពីក្លឹប Negeri Sembilan FA នៅពេលលីគកំពូលម៉ាឡេស៊ី ចប់ជើងទីមួយ នាពេលខាងមុខ បន្ទាប់ពីផ្លាស់ចេញពីក្លឹបព្រះខ័នរាជស្វាយរៀង។ ប្រភពព័ត៌មានបានបញ្ជាក់ថា អតីតសមាជិកព្រះខ័នរាជស្វាយរៀងនេះ បារម្ភធ្លាក់ចុះសមត្ថភាពកាន់តែខ្លាំង បន្ទាប់ពីលេងមួយរយៈពេលនៅក្លឹបម៉ាឡេស៊ីមួយនេះ។

តាំងពីលីគកំពូលម៉ាឡេស៊ីចាប់ផ្តើមរដូវកាល២០១៨នេះមានរយៈ៧សប្តាហ៍ហើយ ប៉ុន្តែក្លឹប Negeri Sembilan ឈ្នះ១ ស្មើ១ និងចាញ់៤ដែលមាន៤ពិន្ទុកំពុងស្ថិតនៅបាតតារាងក្នុងចំណោម១២ក្លឹប។

ប្រភពបន្តថា នៅពេលក្លឹបមិនទទួលបានលទ្ធផលល្អបែបនេះ អាចធ្វើឲ្យកម្លាំងចិត្តកាន់តែធ្លាក់ចុះ និងកម្រិតសមត្ថភាពក៏អាចកាន់តែថមថយដែរ ដូច្នេះហើយទើប ឧត្តម ចង់ចាកចេញ។ យ៉ាងណា ប្រភពព័ត៌មានមិនប្រាប់ថា ប្រាក់ មុន្នីឧត្តម ចង់បន្តនៅម៉ាឡេស៊ី ឬវិលត្រឡប់មកកម្ពុជានោះទេ។

ជុំវិញករណីលើកឡើងនេះ Sabay បានព្យាយាមទាក់ទងទៅ ប្រាក់ មុន្នីឧត្តម ប៉ុន្តែមិនទាន់មានការឆ្លើយតបយ៉ាងណានោះទេ៕

អត្ថបទ៖ លាភ.