ចាន់ វឌ្ឍនាកា ខកខានឱកាសមាស ពេល Pahang យកឈ្នះក្រុមរបស់ ធារី ចន្ថាប៊ីន

2018-05-02 03:47:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចាន់ វឌ្ឍនាកា បានធ្វើឲ្យឱកាសរកគ្រាប់បាល់ដំបូងនៅលីគកំពូលម៉ាឡេស៊ីរបស់ខ្លួន រសាត់ផុតទៅ បន្ទាប់ពីស៊ុតទៅប៉ះនឹងរបាទី ក្នុងជំនួបសប្ដាហ៍ទី៨ ដែលក្លឹប Pahang FA យកឈ្នះក្រុមម្ចាស់ផ្ទះ Terengganu របស់កីឡាករ ធារី ចន្ថាប៊ីន ដោយលទ្ធផល ៣-១ កាលពីយប់ថ្ងៃទី១ ខែឧសភា ឆ្នាំ២០១៨។

វឌ្ឍនាកា ខកខានឱកាសមាស ដោយសារទាត់ប៉ះរបាទី ក្នុងជំនួបរវាង Terengganu និង Pahang យប់មិញ (រូបភាពពីវីដេអូ)

ឱកាសមាសរបស់ វឌ្ឍនាកា បានកើតឡើងពីការបញ្ជូនរបស់ខ្សែបម្រើសញ្ជាតិហ្គាំប៊ី ស្របពេលដែលកីឡាកររហស្សនាម CV11 មានចេតនាគ្រាន់តែទប់ឲ្យបាល់ចូលទី តែបាល់បែរជាហោះឡើងខ្ពស់ទៅប៉ះនឹងរបាទី រួចខ្ទាតមកក្រោយវិញ។ ភ្លាមៗនោះ ខ្សែការពាររបស់ក្រុមម្ចាស់ផ្ទះ បានចេញមកតែតបាល់ឲ្យទៅឆ្ងាយពីក្នុងប្រអប់គ្រោះថ្នាក់។

CV11 និងកីឡាកររបស់ Terengganu (រូបថត៖ Pahang FA)

សូមបញ្ជាក់ថា វឌ្ឍនាកា អតីតកីឡាកររបស់ក្លឹបបឹងកេត មិនទាន់អាចរកគ្រាប់បាល់ដំបូងរបស់ខ្លួនសម្រាប់ Pahang បាននៅឡើយទេ។ ប៉ុន្តែគេធ្លាប់រកបានមួយគ្រាប់ពេល Pahang ប្រកួតកម្ដៅសាច់ដុំ មុនបើករដូវកាលលីគកំពូលម៉ាឡេស៊ី នាពេលកន្លងទៅ។

យប់មិញ Pahang រកគ្រាប់បាល់បានពីខ្សែប្រយុទ្ធសញ្ជាតិប្រេស៊ីល Pattrick Cruz នៅនាទី៣៩ និង ៥៣ ក្នុងនោះ គ្រាប់បាល់ទី២ គឺជាការរួមចំណែកពី CV11 ផងដែរ។ ឯគ្រាប់ទី៣ ជាការស៊ុតរបស់កីឡាករ Faisal Halim នៅនាទី៩០។ ចំណែក១គ្រាប់របស់ក្រុមម្ចាស់ផ្ទះ Terengganu កើតចេញពីបាល់១១ម៉ែត្រ ដោយកីឡាករ Lee Tuck នៅនាទី៧២។

គិតត្រឹមសប្ដាហ៍ទី៨ Pahang ឈរនៅលេខ២ ដដែល មាន ១៧ពិន្ទុ ក្រោមក្លឹប Johor Darul Ta'zim ១ពិន្ទុ ដែលត្រូវប្រកួតសប្ដាហ៍ទី៨នៅល្ងាចនេះ។ ចំណែក Terengganu ឈរលេខ៤ មាន ១២ពិន្ទុ នៅក្នុងតារាលីគកំពូលម៉ាឡេស៊ី៕

អត្ថបទ៖ លាភ.