ទុរេន​កំពង់​ចាម ឆ្ងាញ់​មិន​ចាញ់​​ទុរេន​កំពត​ទេ

  • 2018-05-14 05:02:21
  • ចំនួនមតិ 0 | ចំនួនចែករំលែក 0

ចន្លោះមិនឃើញ


រដូវ​ប្រមូល​ទុរេន​ឈាន​មក​ដល់​ ប្រជាពលរដ្ឋ​ និង​អ្នក​ដាំដុះ​ដំណាំ​ទុរេន​​ក្នុង​ខេត្ត​កំពង់​ចាម​ បាន​អះអាង​ថា ទុរេន​ក្នុង​ខេត្ត​របស់​ខ្លួន មាន​រស​ជាតិ​ឆ្ងាញ់​ មិន​ចាញ់​ទុរេន​​ខេត្ត​កំពតនោះ​​ទេ។

ម្ចាស់​ចម្ការ​ទុរេននៅ​ស្រុក​ស្ទឹងត្រង់ ខេត្តកំពង់ចាម អ្នកមីង ស៊ី សុខលាង ដែល​​កំពុង​មមាញឹក​ ប្រមូលផល​ទុរេន​​លើ​ដី​ជាង​១០ហិចតា បាន​ឱ្យ​ដឹង​ថា ទុរេន​កំពង់ចាម​ពិត​ជា​មាន​រសជាតិ​ឆ្ងាញ់ ដោយសារ​អ្នកស្រី​បាន​ស្រោច​ទឹក​ទុរេន​​ជា​ប្រចាំ​ ជា​ពិសេស​នៅ​រដូវប្រាំង និង​ប្រើតែ​​ជីធម្មជាតិប៉ុណ្ណោះ។

មិនខុស​ពី​ម្ចាស់​ចម្ការ​ទុរេន​ខាងលើ​នេះទេ អ្នកស្រី ស្រេង ចិន្ដា ដែល​ជា​អតិថិជន​ម្នាក់ ក៏​បាន​សរសើរ​ទុរេន​ខេត្ត​កំពង់​ចាម​ថា​​ មាន​រស​ជាតិ​ឆ្ងាញ់​ផ្អែម ឈ្ងុយ និង​បែប​ធម្មជាតិ​ពិត​ៗ​ផងដែរ។ អ្នកស្រី​តែង​ទិញ​ទុរេន​ខេត្ត​កំពង់ចាម​យក​ទៅ​បរិភោគ និង​ទិញ​ផ្ញើ​បងប្អូន​នៅ​រាជធានី​ភ្នំពេញ​ ព្រោះ​មាន​តំលៃ​សមរម្យ។

ទុរេន​កំពង់ចាម

ម្ចាស់​ចម្ការ​ទុរេន​ម្នាក់​ផ្សេងទៀត​ អ្នក​ស្រី មឿន គីមស្រេង រស់​នៅ​ក្នុង​ឃុំ​អារក្សត្នោត ស្រុកស្ទឹងត្រង់ ខេត្ត​កំពង់​ចាម​​ ឱ្យ​ដឹង​ដែរថា​ ទុរេន​ស្ទឹងត្រង់​ ក្នុងខេត្ត​កំពង់ចាម ពិតជា​មាន​រសជាតិ​ឆ្ងាញ់ និង​លក់​ក្នុង​តម្លៃ​សមរម្យ ពោល​គឺ​ចន្លោះ​ពី​​ ១២០០០ រៀល ទៅ​ ១៨០០០រៀល​ ក្នុង​មួយ​គីឡូក្រាម​ សម្រាប់​ពូជ​ទុរេន ម៉ាន់​ថង។

លោក គីម សាវឿន ប្រធាន​មន្ទីរ​កសិកម្ម រុក្ខា​ប្រមាញ់ និង​នេសាទ​ ខេត្ត​កំពង់ចាម ​បាន​ប្រាប់​ឲ្យ​ដឹងថា ស្រុក​ស្ទឹង​ត្រង់​មាន​ផ្ទៃដីណាំ​ទុរេន ចំនួន​ ១៣៦​ហិចតា។ លោកថា ក្នុង​ខេត្ត​កំពង់ចាម ទុរេនដែល​ល្បី​ថា​​មាន​រសជាតិ​ឆ្ញាញ់​ជាង​គេ​ គឺ​ទុរេន​របស់​អ្នក​ភូមិបែក​អន្លង់ ក្នុង​ឃុំ​អារក្សត្នោត ស្រុក​ស្ទឹងត្រង់ ព្រោះ​នៅ​តំបន់​នោះ ជា​តំបន់​ដី​ក្រហមដែល​មាន​ជីវជាតិ​ល្អ និង​មាន​ប្រភព​ទឹក​គ្រប់គ្រាន់ ហើយ​ជាពិសេស​គឺ​ម្ចាស់​ចម្ការ​ទុរេនភាគច្រើន ​ដាំដុះ​តាម​បែបធម្មជាតិ មិន​ប៉ះពាល់​ដល់​សុខភាព​របស់​បរិភោគ​នោះទេ៕

អត្ថបទ៖ សុផល

;