Pahang ចាញ់ជាប់ៗគ្នាក្រោយគ្មាន CV11 ខណៈក្រុមរបស់ ធារី យកឈ្នះក្រុមខ្លាំង

2018-05-23 03:39:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្លឹបបាល់ទាត់ Pahang FA ដែលបានចែកផ្លូវពីកីឡាករកម្ពុជា ចាន់ វឌ្ឍនាកា បានស្គាល់ពាក្យថាចាញ់ ២លើកជាប់ៗគ្នាក្នុងរដូវកាល២០១៨នេះ បន្ទាប់ពីបរាជ័យក្រោមថ្វីជើងក្រុមលេខ៥ Kedah ដោយលទ្ធផល ២-០ កាលពីយប់មិញ។ ផ្ទុយទៅវិញក្រុម Terengganu ដែលតែងតែជឿជាក់លើកីឡាករ ធារី ចន្ថាប៊ីន នៅតំបន់បម្រើការពារ បានយកឈ្នះក្រុមលេខ២ Perak ដោយលទ្ធផល ២-០ ។

Pahang ចាញ់ Kedah ដោយលទ្ធផល ២-០ កាលពីយប់មិញ (រូបថត៖ Pahang FA)

Pahang ហាក់មានបញ្ហានៅតំបន់ប្រយុទ្ធ ចាប់តាំងពីគ្រូបង្វឹកលោក Dollah Salleh បញ្ចប់កុងត្រារបស់ វឌ្ឍនាកា មុនកាលកំណត់។ តួយ៉ាង បរាជ័យ ២ប្រកួតកន្លងទៅ គេសង្កេតឃើញថា Pahang មិនអាចរកបានសូម្បីតែ១គ្រាប់ ក្នុងនោះសប្ដាហ៍មុន Pahang ចាញ់ Terengganu ដោយលទ្ធផល ០-១។

ក្នុងការប្រកួតយប់មិញ ក្រុមម្ចាស់ផ្ទះ Kedah បានលត់កូនក្រុមរបស់លោក Dollah Salleh តាមរយៈការរកគ្រាប់បាល់ នៅក្នុងនាទី ៤៥ និង ៨៩ ។

ដោយឡែក Terengganu ត្រូវសង្កេតឃើញថា ធ្វើបានយ៉ាងល្អក្នុង ២ប្រកួតចុងក្រោយ។ ជាក់ស្ដែង Pahang ដែលពួកគេបានយកឈ្នះសប្ដាហ៍មុន និងក្លឹប Perak ដែលយកឈ្នះយប់មិញ គឺសុទ្ធតែជាក្រុមដែលឈរនៅលើ Terengganu ទាំងអស់ក្នុងតារាលីគកំពូលម៉ាឡេស៊ី។

Terengganu រកបាន ២គ្រាប់ក្នុងការប្រកួតទល់នឹង Perak ដោយខ្សែប្រយុទ្ធដែលកំពុងឡើងជើង Tchetche Kipre នៅនាទី ២៥ និង ៥២ ។

កីឡាករកម្ពុជា ធារី ចន្ថាប៊ីន បង្ហាញខ្លួនជាជម្រើស១១នាក់ដំបូងក្នុងការប្រកួតរវាង Terengganu ជាមួយ Perak ដែលបញ្ចប់ទៅដោយលទ្ធផល ២-០ (រូបថត៖ Terengganu FC)

សូមបញ្ជាក់ថា គិតត្រឹមសប្ដាហ៍ទី១១នេះ Terengganu ឈរលេខ៤ មាន ១៨ពិន្ទុស្មើជាមួយ Pahang តែ Pahang មានគ្រាប់បាល់ចំណេញលើស ៣គ្រាប់។ ដោយឡែក Perak មាន ២០ពិន្ទុ តាមពីក្រោយក្រុមកំពូលតារាង Johor Darul Ta'Zim ៥ពិន្ទុ (Johor Darul Ta'Zim សល់១ប្រកួតក្នុងដៃដោយត្រូវប្រកួតយប់មិញ)៕

ទស្សនាវីដេអូការប្រកួតក្រុមទាំងពីរ កាលពីយប់មិញ

Kedah Vs Pahang

Terengganu Vs Perak

អត្ថបទ៖ លាភ.