"វ័យក្មេង ស្នេហ៍ក្មេង" របស់លោកស៊ីន ស៊ីសាមុត ជាបទចម្រៀងភាពយន្តដ៏ល្បីរបស់អង់គ្លេស

2018-06-01 04:56:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែភាពយន្តអង់គ្លេស ដែលជាប្រភពនៃបទចម្រៀង "វ័យក្មេង ស្នេហ៍ក្មេង" របស់លោកស៊ីន ស៊ីសាមុត មានចំណងជើងថា "The Young Ones”។ ខ្សែភាពយន្តនេះ ចាក់បញ្ចាំងនៅទីក្រុងឡុងដ៍ ប្រទេសអង់គ្លេស នៅថ្ងៃទី ១៣ ខែធ្នូ ឆ្នាំ ១៩៦១។

រឿងដែលមានរយៈពេល ១០៨ នាទីនេះ និយាយអំពីយុវអ្នកចម្រៀងមួយក្រុម ទប់ទល់នឹងមហាសេដ្ឋីអចលទ្រព្យម្នាក់ ដែលចង់បានក្លឹបចម្រៀងរបស់ពួកគេ ធ្វើជាការិយាល័យធ្វើការ។

ក្រុមយុវអ្នកចម្រៀងទាំងនោះ បានព្យាយាមបង្កើតកម្មវិធីសម្តែងផ្សេងៗដើម្បីរកលុយ មកបង់ប្រាក់ឈ្នួលជួលក្លឹប។

ដោយពួកគេទទួលរងការធ្វើទុក្ខបុកម្នេញពេក ក្រុមយុវអ្នកចម្រៀងទាំងនោះបានសម្រេចចិត្តចាប់ជំរិតមហាសេដ្ឋីអចលទ្រព្យនោះ។ ប៉ុន្តែ ពួកគេមិនដឹងទេថា ក្នុងសមាជិករបស់ពួកគេ មានយុវជនម្នាក់ឈ្មោះ Nicky (សម្តែងដោយ លោក Cliff Richard ) ជាកូនប្រុសរបស់មហាសេដ្ឋីនោះ។

ដោយមិនអាចទ្រាំមើល មិត្តភក្តិធ្វើបាបឳពុកខ្លួនបាន Nicky បានលួចដោះលែងឳពុកខ្លួនទៅវិញ។

ជាមួយគ្នានេះដែរ លោកមហាសេដ្ឋីអចលទ្រព្យបានដឹងថា កូនប្រុសរបស់ខ្លួន ជាអ្នកចម្រៀងអាថិ៍កំបាំង ដែលអ្នកទីក្រុងឡុងដ៍ កោតសរសើរគ្រប់គ្នា។ គាត់មានមោទកភាព ចំពោះកូនប្រុសគាត់ ហើយបានអនុញ្ញាតឱ្យក្រុមយុវអ្នកចម្រៀងបន្តកម្មវិធីសម្តែងរបស់ពួកគេ តទៅទៀត និង បានសន្យាថានឹងកសាងក្លឹបចម្រៀងថ្មីមួយឱ្យពួកគេផងដែរ។

នៅចុងបញ្ចប់នៃសាច់រឿង លោកមហាសេដ្ឋីអចលទ្រព្យ បានឡើងរាំ និង ច្រៀងនៅលើឆាកប្រគុំតន្ត្រី ជាមួយក្រុមយុវអ្នកចម្រៀងនោះ យ៉ាងសប្បាយរីករាយ។

នៅក្នុងខ្សែភាពយន្តនេះ ក៏មានចម្រៀងមួយបទ ដែលមានចំណងជើងថា "The Young Ones” ផងដែរ។ បទនេះច្រៀងដោយតួឯកប្រុសដែលជាកូន លោកមហាសេដ្ឋីអចលទ្រព្យគឺលោក Cliff Rechard និពន្ធទំនុក និង បទភ្លេងដោយ លោក Sid Tepper និងលោក Roy C. Bennett។

**សូមអញ្ជើញទស្សនាការសម្តែងរបស់លោក Cliff Rechard នៅក្នុងឱកាសខួបទី៥០នៃក្រុមតន្ត្រី The Shadows នៅទីក្រុងឡុង ឆ្នាំ ២០០៩៖ **

ដោយមានការកក់ទុកជាមុនចំនួនជាង ៥សែនថាស បទចម្រៀង "The Young Ones” បានចេញលក់នៅខែមករា ឆ្នាំ ១៩៦២។ បទចម្រៀងនេះ លក់ដាច់ជាង ៣លានថាស ទាំងនៅចក្រភពអង់គ្លេស និង នៅទូទាំងពិភពលោក។

ចាប់តាំងពីឆ្នាំ ១៩៦២ រហូតមកដល់បច្ចុប្បន្ន បទចម្រៀង "The Young Ones” របស់ Cliff Rechard ទទួលបានការពេញនិយមយ៉ាងសម្បើម។ អ្នកចម្រៀងនៃប្រទេសផ្សេងៗ បានយកបទចម្រៀងនេះ ទៅច្រៀងឡើងវិញ និងច្រៀងជាភាសាជាតិរបស់ខ្លួន មានដូចជា៖ ភាសាដាណឺម៉ាក ហូឡង់ ហ្វាំងឡង់ បារាំង និង អាល្លឺម៉ង់...។ សិល្បករម្នាក់ ក្នុងចំណោមនោះ គឺ លោក ស៊ីន ស៊ី សាមុត ដែលច្រៀងបទនេះឡើងវិញជាភាសាខ្មែរ មានចំណងជើងថា"វ័យក្មេង ស្នេហ៍ក្មេង"

បទចម្រៀងនេះ ទំនងជាមកដល់ស្រុកខ្មែរនៅទសវត្សរ៍ឆ្នាំ ១៩៧០ វេលាដែលខ្មែរចាប់ផ្តើមនិយមប្រើប្រាស់ភាសាអង់គ្លេស។ "វ័យក្មេង ស្នេហ៍ក្មេង" របស់លោក ស៊ីន ស៊ីសាមុត ជាផលិតផលរបស់ផលិតកម្មថាសចម្រៀង មនោរម្យ៕

អត្ថបទ៖ ឃុត សុខឿន