“Sealed with a Kiss” ជា​បទ​ចម្រៀង​ប្រភេទ Pop​ របស់​អាម៉េរិក័ង ដែល​បាន​ចេញ​លក់​ដំបូង​នៅ​ខែ​ឧសភា ឆ្នាំ​១៩៦០។ ចម្រៀង​មួយ​បទ​នេះ និពន្ធ​ឡើង​ដោយ លោក Peter Udell និង​លោក  Gary Geld និង​ច្រៀង​ដោយ ក្រុម​ចម្រៀងThe Four Voices។

ជា​អកុសល បទ​ចម្រៀង​នេះ មិន​ទទួល​បាន​ការ​គាំ​ទ្រ​ខ្លាំង​សោះ​ ក្នុង​អំឡុង​ឆ្នាំ​១៩៦០​នោះ។

ប៉ុន្តែ​២​ឆ្នាំ​ក្រោយ​មក គឺ​នៅ​ឆ្នាំ​១៩៦២ អ្នក​ចម្រៀង​អាម៉េ​រិក័ង​ម្នាក់​ឈ្នោះ Brian Hyland បាន​ថត​បទ​ចម្រៀង​នេះ​ឡើង​វិញ​ និង​ចេញ​លក់​នៅ​ថ្ងៃ​ទី ៦ មិថុនា ឆ្នាំ​១៩៦២។

បទ​ចម្រៀង​របស់​ Brian Hyland ទទួល​បាន​ការ​គាំទ្រ​យ៉ាង​សម្បើម​ រហូត​ជាប់​ចំណាត់​ថ្នាក់​លេខ​៣ ទាំង​ក្នុងតា​រាង Billboard Hot 100 របស់​អាម៉េ​រិក័ង និង តារាង UK Singles Chart របស់​ចក្រ​ភព​អង់​គ្លេស។ ដើម្បី​ពង្រីក​ទី​ផ្សារ Brian Hyland បានថត​បទ​ចម្រៀង​នេះ​ជា​ភាសា​អាល្លឺម៉ង់ ដែល​មាន​ចំណង​ជើង​ថា "Schön war die Zeit” និង​បាន​ចេញ​លក់​នៅ​ខែ​កញ្ញា ឆ្នាំ​ដដែល​។

សូមអញ្ជើញទស្សនាការច្រៀងបទ “Sealed with a Kiss” របស់លោក Brian Hyland ៖

“Sealed with a Kiss” ជា​បទ​ចម្រៀង​ដែល​ល្បី​ទូទាំង​ពិភព​លោក។ ចាប់​តាំង​ពីឆ្នាំ ១៩៦០ មកដល់​ឆ្នាំ ២០១៧ មាន​សិល្បករ​ជាង​១០០​នាក់ បាន​យក​បទ​ចម្រៀង​នេះ​ទៅ​ច្រៀង​ឡើង​វិញ (Cover) ហើយ​​និង​មាន​សិល្បករ​ជិត​១០​ប្រទេស បាន​យកច​ម្រៀង​នេះ​ទៅ​ច្រៀង​ជាភាសា​ជាតិ​របស់​ខ្លួន ដែល​ក្នុង​នោះ​មាន​ដូច​ជា៖ ភាសា​ខ្មែរ ភាសា​ឆែក ភាសា​ដាណឺ​ម៉ាក ភាសា​ហ្វាំងឡង់ ភាសា​បារាំង ភាសា​អាល្លឺម៉ង់​ ភាសា​អ៊ីតាលី និង​ភាសា​ស៊ុយអ៊ែត ... ជា​ដើម។ បទ​ចម្រៀង​ច្រៀង​ថ្មី​ទាំង​នោះ​ សុទ្ធ​តែ​ទទួល​បាន​ការ​គាំ​ទ្រ និង ចំណាត់​ថ្នាក់​ល្អ​ ក្នុងប្រទេស​នីមួយៗ​ផង​ដែរ​។

សូម​អញ្ជើញ​ទស្សនា និង​ស្តាប់បទ “Derniers baisers” (ការ​ថើប​ចុង​ក្រោយ) ច្រៀងដោយអ្នកចម្រៀង​បារាំង Laurent Voulzy ដែល​បាន​ច្រៀង​នៅ​ឆ្នាំ​២០០៦៖

នៅ​កម្ពុជា បទ​ចម្រៀង “Sealed with a Kiss” ត្រូវ​បាន​បំលែង​ទៅ​ជា​បទ​ចម្រៀង​ថ្មី​មួយ​ ដោយ​ការ​និពន្ធ​ទំនុក​ថ្មី​របស់​លោក ស៊ីន ស៊ីសាមុត​។ កវី​រូប​នេះ បាន​ដាក់​ចំណង​ជើង​បទ​ចម្រៀង​ថ្មី​របស់​លោក​ថា "បើ​នឹង​ព្រាត់​ហើយ"។ "បើ​នឹង​ព្រាត់​ហើយ" របស់​អ្នក​ចម្រៀង​គ្មាន​គូ​ជែង​នៃ​កម្ពុជា ប្រគុំ​ជា​ចង្វាក់​ Bolero Twist និង​ថត​​ថាស​ដោយ​ផលិត​កម្ម​វត្ត​ភ្នំ​។ រហូត មក​ទល់​បច្ចុប្បន្ន បទ​ចម្រៀង​នេះ​ នៅ​តែ​ជា​ទី​ពេញ​និយម​របស់​ប្រជា​ពល​រដ្ឋ​ខ្មែរ​នៅ​ឡើយ​ ពិសេស​ក្នុង​ចំណោម​ជន​ដែល​មាន​វ័យ​កណ្តាល​ឡើង​ទៅ​៕