តុលាការកំពូល បដិសេធបណ្តឹងសុំនៅក្រៅឃុំ របស់អតីតបុគ្គលិកអាស៊ីសេរី

2018-07-23 12:34:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក កែវ វ៉ាន្នី មេធាវីការពារក្តីឱ្យអតីតបុគ្គលិកអាស៊ីសេរី២រូប គឺលោក អ៊ួន ឈិន និងលោក យាង សុធារិន (យាង សុជាមេត្តា) ឱ្យដឹងនៅថ្ងៃទី២៣កក្កដានេះថា តុលាការកំពូលបានសម្រេចបន្តឃុំខ្លួនកូនក្តីរបស់លោក ដោយយោងទៅលើសំអាងហេតុរបស់សាលាដំបូងរាជធានីភ្នំពេញ និងសាលាឧទ្ធរណ៍។

លោក កែវ វ៉ាន្នី បន្តថា ហេតុផលបែបនេះ មិនមានលក្ខណៈគ្រប់គ្រាន់ក្នុងការបន្តឃុំខ្លួនកូនក្តីរបស់លោកឡើយ ព្រោះតុលាការមិនបានរកឃើញភស្តុតាងអ្វីដើម្បីបង្ហាញពីពិរុទ្ធភាពរបស់ពួកគេនោះឡើយ។

លោក យាង សុធារិន្ទ ហៅ យាង សុជាមេត្តា (ឆ្វេង) និងលោក អ៊ួន ឈិន ត្រូវសមត្ថកិច្ចនាំខ្លួនទៅកាន់តុលាការ នាពេលកន្លងមក

សូមបញ្ជាក់ថា អតីតបុគ្គលិកអាស៊ីសេរីទាំង២រូប ត្រូវបានតុលាការ ឃុំខ្លួនអស់រយៈពេលជាង ៨ខែមកហើយ ក្រោមបទចោទ "ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ"។ តុលាការបានពន្យារពេលឃុំខ្លួនអ្នកទាំងពីរ ដោយលើកហេតុផលថា ដើម្បីរក្សាជនត្រូវចោទក្នុងកិច្ចស៊ើបសួរបន្តទៅទៀត។

ក្រៅពីជាប់ចោទរឿងចារកម្មនេះ លោក អ៊ួន ឈិន និងលោក យាង សុធារិន ក៏កំពុងប្រឈមនឹងសំណុំរឿងមួយទៀតដែរ គឺបទផលិតវីដេអូអាសអាភាស ដែលត្រូវបានចោទដោយតំណាងអយ្យការអមតុលាការសាលាដំបូងរាជធានីភ្នំពេញ។ ប៉ុន្តែសំណុំរឿងទីពីរនេះ កំពុងស្ថិតក្នុងដំណាក់កាលស៊ើបអង្កេត ដោយមិនទាន់មានការចោទប្រកាន់ពីចៅក្រមស៊ើបសួរនៅឡើយ៕

ប្រភព៖ Radio Free Asia ប្រែសម្រួល៖ សំភី