គ្រូ U15 កម្ពុជា បង្ហាញក្តីរំពឹង ពេលប៉ះវៀតណាម នៅ AFF 2018 ខាងមុខនេះ

2018-07-25 08:14:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Lee Tae Hoon គ្រូបង្វឹកក្រុមបាល់ទាត់ U15 កម្ពុជា បានបង្ហាញក្តីរំពឹងថា ក្រុមយុវជនរបស់លោក នឹងអាចធ្វើបានល្អ ពេលប៉ះក្រុមយុវជនវៀតណាម ក្នុងពានរង្វាន់ AFF U15 Championship នៅប្រទេសឥណ្ឌូណេស៊ី ខាងមុខនេះ។

លោកបានឲ្យដឹងកាលពីថ្ងៃទី២៤កក្កដាម្សិលមិញថា ក្រុមរបស់លោកធ្លាប់បរាជ័យក្រោមថ្វីជើង U-15 វៀតណាម ពីរលើករួចមកហើយ ដោយលើកទី១ចាញ់ ២-១ និងលើកទី២ចាញ់ ៥-០។ ដូច្នេះការប្រកួតជាមួយវៀតណាម នាពេលខាងមុខនេះ ក្រុមលោកបានចាត់ទុកថា ជាជំនួបដ៏សំខាន់ជាងគេ និងប្រឹងប្រែងលេងឲ្យបានល្អបំផុត ដើម្បីប្រជែងយកលទ្ធផលឲ្យបានប្រសើរជាងការប្រកួតមុនៗ។

លោក Lee Tae Hoon កំពុងអង្គុយមើលការហ្វឹកហាត់របស់កូនក្រុមខ្លួន កាលពីពេលកន្លងមក

អតីតគ្រូបង្វឹកក្រុមជម្រើសជាតិឈុតធំរូបនេះ បន្ថែមថា កាលចាញ់លើកចុងក្រោយនៅប្រទេសម៉ុងហ្គោលីនោះ គឺក្រុមកម្ពុជាមានកីឡាករមួយចំនួន មិនបានទៅចូលរួមហើយលេងមិនសូវបានល្អ។ ប៉ុន្តែលើកនេះ ក្រុមរបស់លោកមានកីឡាករថ្មីៗ និងល្អៗមកជួយក្រុមមួយចំនួន។

សូមបញ្ជាក់ថា ក្រុម U15 កម្ពុជា នឹងបន្តទៅប្រទេសឥណ្ឌូណេស៊ីថ្ងៃទី២៧ ខែកក្កដា ឆ្នាំ២០១៨ ក្រោយចប់ភារកិច្ចបោះជំរំហ្វឹកហាត់នៅម៉ាឡេស៊ី ១សប្ដាហ៍។ ការប្រកួតក្នុងពានរង្វាន់ AFF U-15 Championship 2018 គឺធ្វើឡើងចន្លោះពីថ្ងៃទី២៩ ខែកក្កដា ដល់ថ្ងៃទី១១ ខែសីហា ឆ្នាំ២០១៨។ ក្រុម U-15 កម្ពុជាស្ថិតនៅពូល A ជាមួយម្ចាស់ផ្ទះ ឥណ្ឌូណេស៊ី វៀតណាម ទីម័រខាងកើត ហ្វីលីពីន និងមីយ៉ាន់ម៉ា។ កម្ពុជា នឹងប៉ះវៀតណាម នៅថ្ងៃបើកឆាក នារសៀលថ្ងៃទី ២៩ ខែកក្កដា ឆ្នាំ២០១៨៕

ប្រភព៖ Sabay News អត្ថបទ៖ ស្រី សុវណ្ណដារ៉ា