លោក ចិន ថុន៖ ការប្ដឹងតវ៉ារបស់ LDP រឿងគូសសន្លឹកឆ្នោត នឹងមានជាបន្តទៀត

2018-07-31 10:23:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ចិន ថុន អគ្គលេខាធិការគណបក្សសម្ព័ន្ធដើម្បីប្រជាធិបតេយ្យ (LDP) បានថ្លែងប្រាប់ [ខ្លីៗ] នៅថ្ងៃទី៣១ ខែកក្កដានេះថា ការប្ដឹងតវ៉ារបស់ LDP ទាក់ទងនឹងការគូសសញ្ញាគាំទ្រលើសន្លឹកឆ្នោត នឹងមានជាបន្តបន្ទាប់ទៀត។

លោកបានបញ្ជាក់ថា បណ្តឹងដែល LDP ប្តឹងនៅគណៈកម្មាធិការរៀបចំការបោះឆ្នោត ទាក់ទងនឹងការគូសសញ្ញគាំទ្រនៅលើសន្លឹកឆ្នោត គឺមានចំនួនជាង ១៧០០បណ្តឹង ដែលក្នុងនោះ គណៈកម្មការឃុំសង្កាត់រៀបចំការបោះឆ្នោត (CEC) បានទទួលបណ្តឹងចំនួន ១៣៦៧ ចារបដិសេធចំនួន ២៨៨បណ្តឹង និងមិនព្រមទទួលទាល់តែសោះ ចំនួន ៩៥បណ្តឹង។

លោក ចិន ថុន ថ្លែងនៅក្នុងសន្និសីទកាសែតរបស់ LDP នាពេលកន្លងមក

លោក ចិន ថុន បានបន្តថា LDP រង់ចាំចំណាត់ការរបស់គណៈកម្មការរៀបចំការបោះឆ្នោតរាជធានីខេត្ត (PEC) និងគណៈកម្មាធិការជាតិរៀបចំការបោះឆ្នោត (NEC) ជាមុនសិន មុនមានវិធានការតាមដំណាក់កាលបន្តបន្ទាប់ទៀត។

សូមបញ្ជាក់ថា លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងប្រាប់ [ខ្លីៗ] នៅព្រឹកថ្ងៃទី៣១ ខែកក្កដានេះថា បណ្តឹងក្រោយថ្ងៃបោះឆ្នោត គឺមានចំនួន ២២០៦បណ្តឹង ដែលភាគច្រើនជាបណ្ដឹងទាក់ទងនឹងការគូសសញ្ញាគាំទ្រគណបក្សនយោបាយនៅលើសន្លឹកឆ្នោត។

ទាក់ទងនឹងរឿងគូសសញ្ញាគាំទ្រនេះដែរ លោក ខឹម វាសនា ប្រមុខដឹកនាំគណបក្សសម្ព័ន្ធដើម្បីប្រជាធិបតេយ្យ ធ្លាប់បានប្រកាសថា គណបក្សសម្ព័ន្ធដើម្បីប្រជាធិបតេយ្យ (LDP) ប្រកាន់ជំហរ និងទាមទារឲ្យមានការកំណត់យកសន្លឹកឆ្នោតដែលគូសសញ្ញា "ធីក" ឬសញ្ញាប្រហាក់ប្រហែល នៅក្នុងប្រអប់រាងបួនជ្រុងទ្រវែង "តូច"។ លោកបានពន្យល់ថា ប្រសិនបើគេអនុញ្ញាតិឲ្យអ្នកបោះឆ្នោតគូសសញ្ញាអ្វីក៏បាន នោះភាពសម្ងាត់ដែលជាគោលការណ៍នៃការបោះឆ្នោត នឹងត្រូវបាត់បង់ ពោលគឺគេអាចកំណត់អត្តសញ្ញាណអ្នកបោះឆ្នោតបាន៕