កម្ពុជា នាំចេញទំនិញទៅជប៉ុន បានជាង ៧០០លានដុល្លារ ក្នុងរយៈពេល ៦ខែ

2018-08-02 04:25:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា បាននាំចេញទំនិញទៅជប៉ុនមានតម្លៃគិតជាទឹកប្រាក់ចំនួន ៧០៥ លានដុល្លារ នៅឆមាសទីមួយឆ្នាំ ២០១៨ នេះ គឺកើនឡើង ១៩ ភាគរយបើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យពីអង្គការពាណិជ្ជកម្មក្រៅប្រទេសជប៉ុន (JETRO)។

កំណើននៃការនាំចេញនៅឆមាសទីមួយនេះ គឺជាអត្រាកំណើនខ្ពស់ ខណៈដែលការនាំចេញទៅជប៉ុន កាលពីឆ្នាំមុនមានអត្រាកំណើនត្រឹម ៤,៦ ភាគរយប៉ុណ្ណោះ។ នៅអំឡុងពេលពីខែមករា ដល់ មិថុនាឆ្នាំនេះ កម្ពុជាក៏បាននាំចូលទំនិញពីជប៉ុនដែលមានតម្លៃជាទឹកប្រាក់ ១៩១ លានដុល្លារផងដែរ គឺកើនឡើង ៩ ភាគរយធៀបនឹងរយៈពេលដូចគ្នាឆ្នាំ ២០១៧។

លោក វ៉ាគិសាកៈ អ្នកប្រឹក្សាជាន់ខ្ពស់ផ្នែកវិនិយោគ នៃ JETRO Cambodia បានលើកឡើងថាភាគច្រើននៃមុខទំនិញដែលកម្ពុជានាំចេញទៅជប៉ុនរួមមាន ផលិតផលកាត់ដេរ ស្បែកជើង កាបូប និងគ្រឿងបង្គុំអេឡិចត្រូនិក និងអគ្គីសនីជាដើម។ លោកបន្ថែមថា កម្ពុជាវិញ បាននាំចូលពីជប៉ុន នូវមុខទំនិញដូចជាគ្រឿងម៉ាស៊ីន រថយន្ត និងផលិតផលត្រីសាច់ជាដើម។

កម្មករម្នាក់ កំពុងវេចខ្ចប់ក្រណាត់ ក្នុងរោងចក្រ១កន្លែង នៅរាជធានីភ្នំពេញ

លោក វ៉ាគិសាកៈ ថ្លែងថា៖ «និន្នាការនៃការនាំចេញ-នាំចូលរបស់ កម្ពុជា-ជប៉ុន នឹងរក្សាបានកំណើនប្រកបដោយស្ថិរភាពនេះបន្តទៀត ព្រោះថាលទ្ធផលនៃការបោះឆ្នោត[នៅកម្ពុជា គឺស្ថិតក្នុងអ្វីដែលយើងរំពឹងទុក»។

លោកបន្តថា៖ «យើងគិតថាលំហូរវិនិយោគជប៉ុនមកកម្ពុជា [នៅឆ្នាំនេះ]នឹងមិនសូវមានការប្រែប្រួលខ្លាំងទេ ដោយសារថាយើងមិនសូវមានព័ត៌មានច្រើនពីគម្រោងវិនិយោគរបស់ជប៉ុនធំៗនៅឡើយ ដែលយើងអាចព្យាករថាលំហូរវិនិយោគអាចមានខ្ទង់សិបលានដុល្លារប៉ុណ្ណោះ»។

កំណើនការវិនិយោគជប៉ុននៅកម្ពុជាចាប់ពីឆ្នាំ ២០១៣ មក បានធ្វើឲ្យទំហំពាណិជ្ជកម្មប្រទេសទាំងពីរកើនឡើងយ៉ាងខ្លាំងជាប្រចាំឆ្នាំ។ យោងតាមរបាយការណ៍របស់ JETRO គិតចាប់ពីឆ្នាំ ២០១៣ មក ទឹកប្រាក់នៃការនាំចេញរបស់កម្ពុជាទៅជប៉ុនតែងសម្រេចបានកំណើនខ្ពស់ចាប់ពី ២០ ភាគរយជាប្រចាំឆ្នាំ ដោយលើកលែងតែឆ្នាំ ២០១៧ មួយប៉ុណ្ណោះ៕

អត្ថបទ៖ ផាក បញ្ញា