រុស្ស៊ី នឹងដឹកប្រព័ន្ធមីស៊ីល S-400 ទៅតួកគី នៅឆ្នាំ២០១៩
- 2018-08-22 07:11:41
- ចំនួនមតិ 0 | ចំនួនចែករំលែក 0
រុស្ស៊ី នឹងដឹកប្រព័ន្ធមីស៊ីល S-400 ទៅតួកគី នៅឆ្នាំ២០១៩
ចន្លោះមិនឃើញ
Rosoboronexport ក្រុមហ៊ុនសព្វាវុធរដ្ឋរបស់រុស្ស៊ី បានឲ្យដឹងថា ប្រព័ន្ធការពារមីស៊ីល S-400 ដែលតួកគីបានបញ្ជាទិញ នឹងត្រូវចាប់ផ្ដើមដឹកជញ្ជូនទៅទីតាំងកំណត់ នាខែកក្កដា ឆ្នាំ២០១៩ខាងមុខ។
កាលពីខែកញ្ញា ឆ្នាំ២០១៧ រុស្ស៊ី និងតួកគី បានចុះកិច្ចព្រមព្រៀងគ្នាលើការទិញលក់ S-400 នៅក្នុងតម្លៃ ២,៥ពាន់លានដុល្លារ។ ប្រព័ន្ធមីស៊ីលនេះ អាចបាញ់នៅក្នុងរយៈចម្ងាយប្រមាណ ៤០០គីឡូម៉ែត្រ និងកម្ពស់ ២៧គីឡូម៉ែត្រពីផ្ទៃដី។
ការសម្រេចចិត្តទិញ S-400 ពីរុស្ស៊ី បានបង្កជាបញ្ហាទំនាស់រវាងតួកគី និងប្រទេសជាសមាជិកអង្គការ NATO ជាពិសេសនោះគឺសហរដ្ឋអាមេរិកតែម្ដង។ អ្នកជំនាញយោធា បានបង្ហាញក្ដីព្រួយបារម្ភថា S-400 នឹងធ្វើឲ្យប្រព័ន្ធសព្វាវុធរបស់ប្រទេសសម្ព័ន្ធមិត្តតួកគី ដូចជា យន្តហោះចម្បាំង F-35 និងប្រព័ន្ធរ៉ាដា ស្ថិតនៅក្នុងស្ថានភាពគ្រោះថ្នាក់។
ពាក់ព័ន្ធនឹងរឿងដដែលនេះ កាលពីពេលថ្មីៗកន្លងទៅ លោក ដូណាល់ ត្រាំ បានសម្រេចចេញច្បាប់ថ្មីហាមឃាត់ការលក់យន្តហោះ F-35 ទៅឲ្យតួកគី។ បន្ថែមពីនេះ លោកប្រធានាធិបតីអាមេរិក បានដាក់ទណ្ឌកម្មទៅលើមន្ត្រីតួកគីមួយចំនួន ព្រមទាំងដំឡើងពន្ធទំនិញប៉ុន្មានប្រភេទរបស់តួកគីថែមទៀតផង។
ជាការឆ្លើយតបនឹងការវាយប្រហារផ្នែកសេដ្ឋកិច្ចរបស់អាមេរិក តួកគី បានប្រកាសដំឡើងពន្ធលើផលិតផលអាមេរិកជាច្រើនប្រភេទ ក្នុងនោះមានដូចជា រថយន្ត ជាតិអាល់កុល ថ្នាំជក់ ផ្លែឈើ ក្រដាស ធ្យូង និងអង្ករ ជាដើម៕