រដ្ឋាភិបាល ហៅកិច្ចប្រជុំសភាអឺរ៉ុបថាផ្តល់ភាពល្អប្រសើរ សម្រាប់កម្ពុជា

2018-09-14 03:58:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានអះអាងនៅព្រឹកថ្ងៃទី១៤ ខែកញ្ញានេះថា កិច្ចប្រជុំសភាអឺរ៉ុប បានផ្តល់ភាពល្អប្រសើរសម្រាប់កម្ពុជា ក្នុងនោះរួមមាន៖

ទី១. ឱកាសក្នុងការឆ្លងឆ្លើយគ្នា ដោយភាគីទាំងអស់ដែលបានគោរពសន្ធិសញ្ញារួម។

ទី២. ទទួលបានការគោរពគ្នាទៅវិញទៅមក ដែលកម្ពុជា មានឱកាសចូលរួមប្រជុំ។

ទី៣. សហភាពអឺរ៉ុប ជាដៃគូក្នុងការអភិវឌ្ឍនៅកម្ពុជា ហើយសហភាពអឺរ៉ុប និងកម្ពុជា មានសារៈសំខាន់ជាច្រើន ក្នុងការរួមធ្វើកិច្ចសហការគ្នា រវាងទ្វេភាគី និងក៏ដូចជាមួយបណ្តាប្រទេស អាស៊ានជាមួយសហភាពអឺរ៉ុបដែរ ។

លោក ផៃ ស៊ីផាន ថ្លែងនាពេលកន្លងមក

ជាមួយគ្នានោះ មន្រ្តីរាជរដ្ឋាភិបាលរូបនេះ ក៏បានច្រានចោលនូវការលើកឡើងដែរថា សហគមន៍អឺរ៉ុប នឹងដាក់ទណ្ឌកម្មមកលើកម្ពុជា។

លោក ផៃ ស៊ីផាន បន្តថា សម្តេច ហ៊ុន សែន បានចូលរួមកិច្ចប្រជុំ វេទិកាធំៗដើម្បីផ្សារភ្ជាប់ រវាងប្រទេសកម្ពុជា ទៅនឹងបណ្តាប្រទេសខាងក្រៅ។ ប្រមុខរាជរដ្ឋាភិបាល ក៏បានបង្ហាញពីគោលការណ៍ អធិបតេយ្យភាពមិនជ្រៀតជ្រែកកិច្ចការផ្ទៃក្នុង ពីប្រទេសខាងក្រៅផងដែរ។

សូមរំលឹកថា កាលពីល្ងាចថ្ងៃទី១៣ ខែកញ្ញាម្សិលមិញ សភាសហភាពអឺរ៉ុប បានបើកកិច្ចប្រជុំ និងអនុម័តសេចក្ដីសម្រេច ស្ដីពីការរំលោភសិទ្ធិមនុស្ស និងបំផ្លាញប្រជាធិបតេយ្យ ព្រមទាំងទាមទារឱ្យរាជរដ្ឋាភិបាលកម្ពុជា ទម្លាក់រាល់បទចោទមកលើលោក កឹម សុខាផងដែរ។ សេចក្ដីសម្រេចនេះ នឹងឈានទៅជំរុញឲ្យគណៈកម្មការសហភាពអឺរ៉ុប ដែលមាន ២៨ ប្រទេស ចាត់វិធានការចាំបាច់នានា ដើម្បីដាក់សម្ពាធមកលើរាជរដ្ឋាភិបាលកម្ពុជា ឲ្យងាកមកស្តារសិទ្ធិមនុស្ស និងប្រជាធិបតេយ្យឡើងវិញ។

សេចក្តីសម្រេចនេះ ក៏នឹងផ្ដោតលើការចាត់វិធានការចាំបាច់នានា ដើម្បីផ្ដល់នីតិសម្បទា ឲ្យគណបក្សសង្គ្រោះជាតិ អាចដំណើរការឡើងវិញ និងផ្តល់សម្បទាឲ្យមន្ត្រីជាន់ខ្ពស់គណបក្សប្រឆាំងទាំង ១១៨នាក់មានសិទ្ធិធ្វើនយោបាយ ដូចប្រក្រតីបានវិញផងដែរ៕

ប្រភព៖ ដើមអម្ពិល ប្រែសម្រួល៖ សំភី