រុស្ស៊ីបញ្ជូនប្រព័ន្ធមីស៊ីលទៅស៊ីរី ក្រោយយន្តហោះស៊ើបការណ៍របស់ខ្លួនត្រូវគេបាញ់ទម្លាក់នៅទីនោះ

2018-09-25 01:57:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក វ៉្លាឌឺមៀ ពូទីន កាលពីថ្ងៃទី២៤ ខែកញ្ញា ឆ្នាំ២០១៨ បានប្រកាសថា រុស្ស៊ីនឹងផ្គត់ផ្គង់ប្រព័ន្ធការពារមីស៊ីលរយៈចម្ងាយវែង S-300 ទៅឲ្យប្រទេសស៊ីរី បើទោះជាយន្តហោះស៊ើបការណ៍១គ្រឿងរបស់ខ្លួនត្រូវបានបាញ់ទម្លាក់ដោយកងទ័ពស៊ីរី កាលពីពេលថ្មីៗកន្លងទៅក៏ដោយ។ ការថ្លែងរបស់មេដឹកនាំរុស្ស៊ី ធ្វើឡើងនៅអំឡុងពេលពិភាក្សាការងារជាមួយលោក Bashar al-Assad ប្រធានាធិបតីស៊ីរី តាមរយៈទូរសព្ទពីបញ្ហាដែលកំពុងកើតមាននៅស៊ីរី។

លោក ពូទីន បានបញ្ជាក់ថា រុស្ស៊ីនឹងជួយធ្វើទំនើបកម្មការការពារដែនអាកាសឲ្យស៊ីរី ដោយការបញ្ជូន S-300 ទៅតាំងនៅមូលដ្ឋានទ័ពស៊ីរី។

សូមជម្រាបថា រុស្ស៊ីបានផ្អាកផ្គត់ផ្គង់ប្រព័ន្ធការពារមីស៊ីល S-300 ទៅកាន់ស៊ីរី ចាប់តាំងពីឆ្នាំ២០១៣មកម៉្លេះ ក្រោមការស្នើសុំពីភាគីជម្លោះ អ៊ីស្រាអែល។

ដោយឡែករឿងពាក់ព័ន្ធនឹងការបាញ់ទម្លាក់យន្តហោះស៊ើបការណ៍រុស្ស៊ី Iiyushin II-20 ដោយកងទ័ពស៊ីរី រដ្ឋាភិបាលរុស្ស៊ីមិនបានធ្វើការបន្ទោសទៅលើប្រទេសស៊ីរីឡើយ តែបែរជាចោទប្រកាន់អ៊ីស្រាអែលទៅវិញ ដែលមិនបានផ្ដល់ដំណឹងគ្រប់គ្រាន់ឲ្យរុស្ស៊ី នៅអំឡុងពេលបើកការវាយប្រហារដែនអាកាសលើប្រទេសស៊ីរី កាលពីថ្ងៃទី១៧ ខែកញ្ញាកន្លងទៅ។

គួររំលឹកថា នៅល្ងាចថ្ងៃទី១៧ ខែកញ្ញា ២០១៨ យន្តហោះចម្បាំង F-16 ចំនួន ៤គ្រឿងរបស់អ៊ីស្រាអែលបានវាយប្រហារគោលដៅនានា ក្នុងខេត្ត Lakakia នៃប្រទេសស៊ីរី។ ការវាយប្រហារនេះ បន្ទាប់ពីមានបញ្ហាតូចមួយ ហើយបង្កើតទៅជាស្ថានភាពគ្រោះថ្នាក់សម្រាប់យន្ដហោះយោធា និងនាវាចម្បាំងជាច្រើននៅក្នុងតំបន់នោះ។ នេះបើតាមក្រសួងការពារជាតិរុស្ស៊ី។

ក្រសួងការពារជាតិរុស្ស៊ីបានបញ្ជាក់ទៀតថា នាវាចម្បាំងរបស់បារាំង ក៏ដូចជាយន្តហោះស៊ើបការណ៍រុស្ស៊ី ប្រភេទ Il-20 ក៏បានធ្វើប្រតិបត្តិការនៅតំបន់នោះផងដែរ។ "ពីឡុតអ៊ីស្រាអែលបានប្រើយន្ដហោះរុស្ស៊ី ជារនាំង និងរៀបចំវាយប្រហារលើមូលដ្ឋានកងទ័ពអាកាសស៊ីរី។ ជាលទ្ធផល យន្តហោះស៊ើបការរុស្ស៊ី ដែលមានទំហំឆ្លងកាត់រ៉ាដាធំជាងយន្តហោះចម្បាំង F-16 ត្រូវបានបាញ់ទម្លាក់ដោយប្រព័ន្ធការពារមីស៊ីល S-200”៕

ប្រភព៖ china.org ប្រែសម្រួល៖ ឈាង.