អាជ្ញាធររាជធានីភ្នំពេញ អំពាវនាវឱ្យទុកដាក់សំរាមរៀងៗខ្លួន ក្នុងអំឡុងបុណ្យភ្ជុំបិណ្ឌ

2018-10-05 12:47:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលរាជធានីភ្នំពេញ បានអំពាវនាវឱ្យប្រជាពលរដ្ឋ រក្សាទុកដាក់សំរាមឱ្យបានត្រឹមត្រូវនៅក្នុងទីតាំងរៀងៗខ្លួនជាបណ្តោះអាសន្ន ក្នុងអំឡុងបុណ្យភ្ជុំបិណ្ឌរយៈពេល ៣ថ្ងៃខាងមុខនេះ។នេះបើតាមសេចក្តីជូនដំណឹងដែលចុះហត្ថលេខាដោយលោក ឃួង ស្រេង អភិបាលរាជធានីភ្នំពេញ កាលពីថ្ងៃទី២តុលា និងចេញផ្សាយជាសាធារណៈនៅថ្ងៃទី៥តុលា ឆ្នាំ២០១៨នេះ។

ក្នុងសេចក្តីជូនដំណឹងនេះ បានឱ្យដឹងថា ក្នុងអំឡុងបុណ្យភ្ជុំបិណ្ឌ ចាប់ពីថ្ងៃទី៨ ដល់ ១០តុលា ឆ្នាំ២០១៨ បុគ្គលិក កម្មករ របស់ក្រុមហ៊ុនស៊ីនទ្រី ដែលបម្រើការងារសម្អាត និងដឹកជញ្ជូនសំរាមក្នុងរាជធានីភ្នំពេញ ត្រូវបានឈប់សម្រាកការងារ ហើយបុគ្គលិក កម្មករមួយចំនួនបានធ្វើដំណើរទៅកាន់ស្រុកកំណើតរបស់ខ្លួន នៅតាមបណ្តាខេត្តនានា ដែលធ្វើឱ្យការផ្តល់សេវាសម្អាត ប្រមូល និងដឹកជញ្ជូនសំរាមក្នុងរាជធានីភ្នំពេញ មានភាពរអាក់រអួល មិនបានពេញលេញឡើយ។

គំនរសំរាម នៅមុខផ្សារមួយកន្លែង ក្នុងរាជធានីភ្នំពេញ

ទន្ទឹមនឹងនេះ អាជ្ញាធររាជធានីភ្នំពេញ បានអំពាវនាវឱ្យប្រជាពលរដ្ឋជាម្ចាស់លំនៅឋាន ម្ចាស់អាជីវកម្ម សេវាកម្មដែលមានទីតាំងក្នុងរាជធានីភ្នំពេញទាំងអស់ កុំបញ្ចេញសំរាមមកដាក់នៅតាមដងផ្លូវសាធារណៈ នៅក្នុងអំឡុងថ្ងៃឈប់សម្រាកខាងមុខនេះ ដើម្បីថែរក្សាសោភ័ណភាព អនាម័យ និងបរិស្ថាន។

សេចក្តីជូនដំណឹងដដែលនេះ បញ្ជាក់ថា សេវាប្រមូលសំរាម នឹងវិលមកប្រក្រតីវិញ នៅថ្ងៃទី១២ ខែតុលា ឆ្នាំ២០១៨៕