ថៃ ត្រៀមបន្ទប់ស្នាក់នៅជាង ៦០០បន្ទប់ សម្រាប់ទទួលភ្ញៀវដែលទៅលេងបុណ្យសមុទ្រនៅកោះកុង

2018-11-26 01:43:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភាគីថៃ បានផ្តល់កិច្ចសហការជាមួយកម្ពុជា ក្នុងការត្រៀមរៀបចំបន្ទប់ស្នាក់នៅសម្រាប់ទទួលភ្ញៀវដែលទៅលេងបុណ្យសមុទ្រនៅខេត្តកោះកុង នាពាក់កណ្តាលខែធ្នូខាងមុខនេះ។ ក្នុងនោះ ថៃបានត្រៀមបន្ទប់ស្នាក់នៅជាង ៦០០បន្ទប់ ដែលមានតម្លៃចន្លោះពី ៣០០ ទៅ ៨០០បាត (៩ ទៅ ២៤ដុល្លារ) នៅខ្លងយ៉ៃ និងចន្លោះពី ១២០០ ទៅ ១៥០០បាត (៣៦ ទៅ ៤៥ ដុល្លារ) នៅទីរួមខេត្តត្រាត។ នេះបើតាមការចុះផ្សាយរបស់ក្រសួងទេសចរណ៍ ដោយដកស្រង់ខ្លឹមសារពីកិច្ចប្រជុំត្រៀមរៀបចំបុណ្យសមុទ្រ ធ្វើឡើងនៅសាលាខេត្តកោះកុង កាលពីថ្ងៃទី២៥ ខែវិច្ឆិកា ឆ្នាំ២០១៨។

លោក ថោង ខុន និងលោកស្រី មិថុនា ភូថង ក្នុងកិច្ចប្រជុំត្រៀមរៀបចំបុណ្យសមុទ្រ កាលពីថ្ងៃទី២៥វិច្ឆិកា ២០១៨ (រូបថត៖ ក្រសួងទេសចរណ៍)

ក្នុងកិច្ចប្រជុំនេះ លោក ថោង ខុន រដ្ឋមន្រ្តីក្រសួងទេសចរណ៍ បានស្នើឱ្យក្រុមការងារខាងភាគីកម្ពុជា ទាក់ទងជាមួយភាគីថៃ ដើម្បីអនុញ្ញាតឱ្យប្រជាពលរដ្ឋ អាចបើកបររថយន្តពីកម្ពុជា ឆ្លងទៅខេត្តត្រាត ឬពីត្រាត មកកោះកុងវិញ ឱ្យមានភាពងាយស្រួលជាងថ្ងៃធម្មតា។ លោកក៏បានស្នើសុំឱ្យមានការបើកអនុញ្ញាត ឆ្លងចេញចូល ២៤ម៉ោង ក្នុងរយៈពេលបុណ្យ ៣ថ្ងៃ ដូចកាលបុណ្យសមុទ្រលើកមុនដែរ។

តាមការបញ្ជាក់របស់លោកស្រី មិថុនា ភូថង អភិបាលខេត្តកោះកុង ក្រោយបញ្ចប់កិច្ចប្រជុំនេះ ឱ្យដឹងថា បើគ្មានអ្វីប្រែប្រួលទេនោះ អាជ្ញាធរកម្ពុជា-ថៃ នឹងឯកភាពរួមគ្នាលើកិច្ចការសម្របសម្រួលដល់ការឆ្លងដែន ការស្នាក់នៅ និងការទៅមកលេងកម្សាន្តពិធីបុណ្យសមុទ្ររយៈពេល៣ថ្ងៃ ជូនដល់ពលរដ្ឋប្រទេសទាំងពីរ ពោលគឺអនុញ្ញាតឱ្យប្រើត្រឹមតែអត្តសញ្ញាណបណ្ណប៉ុណ្ណោះជំនួសលិខិតឆ្លងដែន (ប៉ាស្ព័រ)។

សូមជម្រាបថា ពិធីបុណ្យសមុទ្រលើកទី៧ ខេត្តកោះកុង នឹងប្រព្រឹត្តទៅចាប់ពីថ្ងៃទី១៤ ដល់ ១៦ ខែធ្នូ ឆ្នាំ២០១៨ ក្រោមប្រធានបទ «ឆ្នេរស្អាត ពលរដ្ឋរមណីយ»៕

អត្ថបទ៖ សំភី