កែ ឡេង ជាបេក្ខជនក្នុងការបោះឆ្នោតជ្រើសរើសកីឡាការិនីប៉េតង់ឆ្នើមពិភពលោកឆ្នាំ២០១៨

2019-01-10 08:52:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងអប់រំ យុវជន និងកីឡា ព្រមទាំងសហព័ន្ធកីឡាប៊ូល និងប៉េតង់កម្ពុជា ធ្វើសន្និសីទកាសែតស្តីពីការជ្រើសតាំងលោកស្រី កែ ឡេង ជាបេក្ខជនក្នុងការបោះឆ្នោតជ្រើសរើសកីឡាការិនីប៉េតង់ឆ្នើមពិភពលោកប្រចាំឆ្នាំ២០១៨ នៅរសៀលថ្ងៃទី១០ ខែមករា ឆ្នាំ២០១៩នេះ នៅពហុកីឡាដ្ឋានជាតិអូឡាំពិក ក្រោមអធិបតីភាពលោក ស សុខា រដ្ឋលេខាធិការក្រសួងអប់រំ យុវជន និងកីឡា និងលោក អ៊ិន គឹមស្រុន អគ្គលេខាធិការកីឡាប៉េតង់។

ជារៀងរាល់ ៤ឆ្នាំ សមាគមហ្គេមអន្តរជាតិពិភពលោក ដែលមានឈ្មោះកាត់ IWGA International World Game Association ត្រូវសម្រិតសម្រាំងអត្តពលិកឆ្នើម នៃកីឡាមិនមែនអូឡាំពិក ដែលមានជាង ៣០ប្រភេទកីឡា ក្នុងនោះមានកីឡាប៉េតង់ផងដែរ។ លោកប្រធានសហព័ន្ធអន្តរជាតិប៉េតង់ FIPJP បានស្នើឲ្យលោកស្រី កែ ឡេង ធ្វើជាបេក្ខនារីប៉េតង់ដើម្បីឲ្យគេបោះឆ្នោតជ្រើសរើស ដោយផ្អែកលើលក្ខណៈវិនិច្ឆ័យដូចខាងក្រោម៖

ក្នុងឆ្នាំ២០១៣៖ លោកស្រី កែ ឡេង ទទួលបានមេដាយ មាស ប៉េតង់ពិភពលោក លើវិញ្ញាសា វាយយកពិន្ទុ នៅប្រទេសបារាំង

ក្នុងឆ្នាំ២០១៥៖ លោកស្រី កែ ឡេង ទទួលបានមេដាយ មាស ប៉េតង់ពិភពលោក លើវិញ្ញាសា វាយយកពិន្ទុ នៅប្រទេសថៃ ជាលើកទី២

ក្នុងឆ្នាំ២០១៧៖ លោកស្រី កែ ឡេង ទទួលបានមេដាយ មាស ប៉េតង់ពិភពលោក លើវិញ្ញាសា វាយយកពិន្ទុ នៅសាធារណរដ្ឋចិន ជាលើកទី៣។

នេះជាឯកទត្តកម្ម សម្រាប់លោកស្រី កែ ឡេង ដែលទទួលបានមេដាយ មាស បីលើកជាប់ៗគ្នា។ លើសពីនេះទៅទៀត៖

ក្នុងឆ្នាំ២០១៨៖ ប្រទេសបារាំងបានរៀបចំឲ្យមានការប្រកួតពានរង្វាន់កីឡាប៉េតង់ក្នុងចំណោមប្រទេសដែលខ្លាំងលើពិភពលោក។ ក្នុងការប្រកួតនេះ លោកស្រី កែ ឡេង ដណ្ដើមបានពានរង្វាន់ថ្នាក់លេខ១ លើវិញ្ញាសា២នាក់ ទល់ ២នាក់ និង ៣នាក់ ទល់ ៣នាក់។ ដោយយកឈ្នះកីឡាការិនី នៃប្រទេសខ្លាំង ដូចជាប្រទេសបារាំង ប្រទេសថៃ ប្រទេសទុយនេស៊ី។

រួមផ្សំនឹងស្នាដៃចុងក្រោយនេះ ដែលធ្វើឲ្យលោកប្រធាន Claude Azema សម្រេចស្នើឲ្យលោកស្រី កែ ឡេង ឈរឈ្មោះជាបេក្ខនារី សម្រាប់ឲ្យគេបោះឆ្នោតជ្រើសរើសជាកីឡាការិនី ប៉េតង់ឆ្នើមពិភពលោកសម្រាប់ឆ្នាំ២០១៨នេះ៕