កីឡដ្ឋានរបស់ភ្នំពេញក្រោន ត្រូវបានប្ដូរឈ្មោះជាផ្លូវការហើយ

2019-03-26 03:46:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡដ្ឋាន RSN របស់ក្លឹបបាល់ទាត់ភ្នំពេញក្រោន ត្រូវបានផ្លាស់ប្ដូរឈ្មោះទៅជាកីឡដ្ឋាន Smart RSN Stadium ជាផ្លូវការ ក្រោយពីក្លឹបបាល់ទាត់ជោគជ័យបំផុតរបស់កម្ពុជាមួយនេះ ទទួលបានការឧបត្ថម្ភ ២ឆ្នាំបន្ថែមទៀត ពីក្រុមហ៊ុនទូរសព្ទ Smart។

ការផ្លាស់ប្ដូរឈ្មោះកីឡដ្ឋានថ្មីនេះ ត្រូវបានធ្វើឡើងក្នុងកម្មវិធី The Singha's Step ដែលរៀបចំឡើងនៅលើវាលស្មៅធម្មជាតិរបស់កីឡដ្ឋាន Smart RSN កាលពីថ្ងៃទី២៥ ខែមីនាម្សិលមិញនេះ ដោយមានការចូលរួមពីលោកឧកញ៉ា ឫទ្ធី សំណាង ប្រធានក្លឹបបាល់ទាត់ភ្នំពេញក្រោន និងលោក Thomas Hundt នាយកប្រតិបត្តិក្រុមហ៊ុន Smart។

លោក Thomas Hundt នាយកប្រតិបត្តិក្រុមហ៊ុន Smart (ឆ្វេង) និងលោកឧកញ៉ា ឫទ្ធី សំណាង ប្រធានក្លឹបបាល់ទាត់ភ្នំពេញក្រោន

នៅក្នុងកម្មវិធីនេះ ក៏មានការបង្ហាញឯកសណ្ឋានថ្មីរបស់ភ្នំពេញក្រោនផងដែរ ពោលគឺទាំងឯកសណ្ឋានក្នុងដី និងក្រៅដី សម្រាប់ប្រើប្រាស់ក្នុងរដូវកាលឆ្នាំ ២០១៩ នេះ។ កម្មវិធីដ៏ធំបំផុតមិនធ្លាប់មាននៅក្នុងប្រវត្តិសាស្រ្ដក្លឹបបាល់ទាត់នៅកម្ពុជានេះដែរ មានការចូលរួមពីថ្នាក់ដឹកនាំក្លឹប ក្រុមហ៊ុនឧបត្ថម្ភ ភ្ញៀវកិត្តិយស និងអ្នកគាំទ្រភ្នំពេញក្រោនជាច្រើនរយនាក់។ កម្មវិធីនេះ ក៏មានការចូលរួមសម្ដែងពី MC Bull ម្ចាស់បទចម្រៀងរបស់ក្លឹបភ្នំពេញក្រោន និងក្រុមចម្រៀងក្មេងខ្មែរ ផងដែរ។

កីឡដ្ឋាន Smart RSN

សូមបញ្ជាក់ថា កីឡដ្ឋាន Smart RSN ជាកីឡដ្ឋានស្ដង់ដារបស់ភ្នំពេញក្រោន ដែលត្រូវបានសម្ពោធដាក់ឲ្យប្រើប្រាស់ កាលពីឆ្នាំ២០១៥ កន្លងទៅ។ កីឡដ្ឋាននេះ អាចផ្ទុកអ្នកទស្សនា បាន ៥ពាន់នាក់។ RSN ជាឈ្មោះកាត់ជាភាសាអង់គ្លេស របស់លោកប្រធានក្លឹប ឫទ្ធី សំណាង (Rithy Samnang)៕