Bayern ចាយលុយច្រើនបំផុតក្នុងប្រវត្តិសាស្រ្ដក្លឹប ទិញយកខ្សែការពារបារាំង

2019-03-28 07:46:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Bayern Munich បានទិញយកខ្សែការពារបារាំង Lucas Hernandez ពីក្លឹបអេស្ប៉ាញ Atletico Madrid ក្នុងតម្លៃ ៩០លានដុល្លារ ដែលជាតម្លៃថ្លៃបំផុតមិនធ្លាប់មានក្នុងប្រវត្តិសាស្រ្ដក្លឹបយក្សអាល្លឺម៉ង់មួយនេះ។

Lucas Hernandez អបអរជាមួយមិត្តរួមក្រុម ពេលលេងនៅ Atletico Madrid (រូបភាព៖ Reuters)

កីឡាករវ័យ ២៣ឆ្នាំនេះ បានចុះកុងត្រារយៈពេល ៥ឆ្នាំ ប៉ុន្តែមិនអាចចូលលេងរដូវកាលនេះបានទេ ដោយត្រូវរង់ចាំរហូតដល់ថ្ងៃទី១ ខែកក្កដា។

ខ្សែការពារ ដែលទើបឈ្នះពាន FIFA World Cup ជាមួយក្រុមជម្រើសជាតិបារាំង បានថ្លែង ក្រោយស៊ីញ៉េកុងត្រានៅក្លឹបថ្មីថា៖ "នេះជាថ្ងៃសំខាន់បំផុតក្នុងអាជីពបាល់ទាត់របស់ខ្ញុំ។ Bayern Munich គឺជាក្លឹបខ្លាំងបំផុតមួយនៅអឺរ៉ុប និងក្នុងពិភពលោក។ ខ្ញុំពិតជាមានមោទកភាពណាស់ ដែលអាចលេងដើម្បីឈ្នះពាននៅ Bayern"។

ចំណែកលោក Hasan Salihamidzic ប្រធានផ្នែកកីឡារបស់ Bayern ក៏បាននិយាយដែរថា៖ "ខ្ញុំរីករាយណាស់ដែលអាចមានលទ្ធភាពទិញយកខ្សែការពារល្អបំផុតមួយក្នុងលោក ជាកីឡាករដែលឈ្នះ World Cup។ Lucas នឹងបន្តកេរ្តិ៍តំណែលដ៏អស្ចារ្យរបស់កីឡាករបារាំងនៅក្លឹបរបស់យើង និងរួមចំណែកជួយក្រុមឲ្យកាន់តែប្រសើរ"។

Lucas Hernandez ពេលលេងឲ្យជម្រើសជាតិបារាំង (រូបភាព៖ Reuters)

សូមបញ្ជាក់ថា Hernandez បានបង្ហាញខ្លួននៅ La Liga ឲ្យ Atletico ចំនួន ៦៧ប្រកួត និងបានឈ្នះពាន Europa League និង Super Cup។ កីឡាករដែលអាចលេងបានទាំងតំណែងការពារកណ្ដាល និងការពារស្លាបឆ្វេងរូបនេះ ក៏ធ្លាប់ចូលលេងឲ្យជម្រើសជាតិបារាំង ចំនួន ១៥ប្រកួតផងដែរ ជាពិសេសគឺនៅ FIFA World Cup ឆ្នាំ២០១៨ នៅរុស្ស៊ី៕

អត្ថបទ៖ សុខ សុវត្ថិ