ប្រធានាធិបតីវេណេហ្ស៊ុយអេឡា ព្រមានពីការប៉ះទង្គិចយោធាជាមួយនឹងប្រទេសកូឡុំប៊ី

2019-05-09 04:32:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Nicolas Maduro ប្រធានាធិបតីវេណេហ្ស៊ុយអេឡា បានព្រមានប្រទេសកូឡុំប៊ីថា នឹងមានការប៉ះទង្គិចយោធាគ្នារវាងប្រទេសទាំង២ បន្ទាប់ពីកូឡុំប៊ី បានចេញសេចក្តីថ្លែងការណ៍ចោទថា មានយោធាវេណេហ្ស៊ុយអេឡា ឆ្លងកាត់ចូលព្រំដែនរបស់ខ្លួន កាលពីថ្ងៃទី៨ ខែឧសភា ឆ្នាំ២០១៩។

រូបថត៖ Sputnik News

លោក Maduro បានថ្លែងថា សេចក្តីថ្លែងការណ៍នោះ អាចបណ្តាលឱ្យមានភាពតានតឹងយោធានៅតាមព្រំដែន ដែលពាក់ព័ន្ធនឹងកម្លាំងឧក្រិដ្ឋកម្មកូឡុំប៊ី ប្រឆាំងនឹងវេណេហ្ស៊ុយអេឡា។ លោកចោទថា អ្វីៗទាំងអស់គឺជាផែនការរបស់ចក្រពត្តិអាមេរិក។

កាលពីម្សិលមិញនេះ ក្រសួងការបរទេសកូឡុំប៊ី បានចេញសេចក្តីថ្លែងការណ៍អះអាងថា យោធាវេណេហ្ស៊ុយអេឡា ចំនួន៣០នាក់ បានបង្កហេតុដោយឆ្លងកាត់ចូលដែនអធិបតេយ្យរបស់ខ្លួន ប្រមាណ ២០០ម៉ែត្រពីព្រំដែននៅភាគឦសានប្រទេស។

ក្រសួងនេះបន្តថា យោធាវេណេហ្ស៊ុយអេឡា ស្ថិតក្នុងដែនដីរបស់ខ្លួនប្រមាណ ២០នាទី។ បន្ទាប់មក យោធាទាំងនោះ បានចាកចេញទៅវិញ នៅពេលពួកគេកត់សម្គាល់ឃើញឧទ្ធម្ភាគចក្រមួយគ្រឿងដែលដឹកទាហានកូឡុំប៊ី មកដល់។

គួរជម្រាបថា ប្រទេសទាំង២ មានព្រំដែនជាប់គ្នាប្រមាណ ២២០០គីឡូម៉ែត្រ ដែលពិបាកក្នុងការគ្រប់គ្រង និងទប់ស្កាត់ការចរាចរណ៍គ្រឿងញៀន និងសកម្មភាពក្រុមឧទ្ទាមជាដើម។

វេណេហ្ស៊ុយអេឡា និងកូឡុំប៊ី បានកាត់ផ្តាច់ទំនាក់ទំនងគ្នា កាលពីខែកុម្ភៈ បន្ទាប់ពីកូឡុំប៊ី បានក្លាយជាប្រទេសមួយក្នុងចំណោមជាង ៥០ប្រទេស ដែលទទួលស្គាល់មេបក្សប្រឆាំងលោក Juan Guaido ជាប្រធានាធិបតីស្របច្បាប់របស់វេណេហ្ស៊ុយអេឡា៕

ប្រភព៖ Sputnik News ប្រែសម្រួល៖ សំភី