ទីស្តីការគណៈរដ្ឋមន្ត្រី ឲ្យលោក ជា សុផារ៉ា ពិនិត្យដោះស្រាយករណីប្រជាពលរដ្ឋប្ដឹងលោក ញឹក ប៊ុនឆៃ រឿងដីធ្លី

2019-07-01 07:03:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ទីស្ដីការគណៈរដ្ឋមន្ត្រី បានប្រគល់ភារកិច្ចឲ្យលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានអាជ្ញាធរជាតិដោះស្រាយទំនាស់ដីធ្លី ពិនិត្យដោះស្រាយករណីប្រជាពលរដ្ឋប្ដឹងលោក ញឹក ប៊ុនឆៃ ប្រធានគណបក្សខ្មែររួបរួមជាតិ និងជាសមាជិកក្រុមប្រឹក្សាពិគ្រោះ និងផ្ដល់យោបល់ ពាក់ព័ន្ធភាពមិនប្រក្រតីនៃការលក់ដី ៣កន្លែងស្ថិតនៅឃុំនិមិត្ត ឃុំប៉ោយប៉ែត និងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។ នេះបើយោងតាមលិខិត ចុះថ្ងៃទី២៥ ខែមិថុនា ឆ្នាំ២០១៩ ដែលចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្ដីការគណៈរដ្ឋមន្ត្រី។

ការប្រគល់ភារកិច្ចឲ្យលោក ជា សុផារ៉ា ពិនិត្យដោះស្រាយករណីខាងលើនេះ គឺបន្ទាប់ពីមានចំណារដ៏ខ្ពង់ខ្ពស់របស់សម្ដេច ហ៊ុន សែន នាយករដ្ឋមន្ត្រីចុះថ្ងៃទី១៩ ខែមិថុនា ឆ្នាំ២០១៩។ ភាពមិនប្រក្រតីនៃលក់ដី៣កន្លែងនេះ គឺត្រូវបានលើកឡើងដោយប្រធានប្រតិភូគណបក្សខ្មែរក្រោក។

លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានធ្វើលិខិតបំភ្លឺ ជូនប្រធានប្តូរវេននៃឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី៣១ ខែឧសភា ឆ្នាំ២០១៩ ទាក់ទងនឹងការលើកឡើងរបស់លោក សុខ សុវណ្ណវឌ្ឍនាសាប៊ុង ប្រធានប្រតិភូគណបក្សខ្មែរក្រោក ក្នុងអង្គប្រជុំឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី៣០ ខែឧសភា ឆ្នាំ២០១៩។

នៅក្នុងលិខិតបំភ្លឺ លោក ញឹក ប៊ុនឆៃ បានបញ្ជាក់ថា ការលើកឡើងរបស់លោក សុខ សុវណ្ណវឌ្ឍនាសាប៊ុង ថារូបលោកបានយកតួនាទីជាសមាជិកឧត្តមក្រុមប្រឹក្សាពិគ្រោះ និងយោបល់ ទៅដោះស្រាយជម្លោះដីធ្លី និងបែងចែកផលប្រយោជន៍របស់ក្រុមហ៊ុន ASK & KH Group របស់លោក លី សាយឃាង ផ្ទុយនឹងតួនាទីដែលបានកំណត់ក្នុងព្រះរាជក្រឹត្យ និងលោក ឈឹម ផលវរុណ បានលើកឡើងថា គ្មានមន្ត្រីនៅលេខាធិការដ្ឋានចុះទៅបេសកកម្មនៅក្រុងប៉ោយប៉ែត និងស្រុកអូរជ្រៅ ខេត្តបន្ទាយមានជ័យនោះទេ ។

លោក ញឹក ប៊ុនឆៃ បានបញ្ជាក់ថា ចំពោះការលើកឡើងរបស់លោក សុខ សុវណ្ណវឌ្ឍនាសាប៊ុង គឺផ្ទុយពីការពិតទាំងស្រុង ពីព្រោះការចុះដោះស្រាយទំនាស់ដីធ្លីរបស់ក្រុមហ៊ុនASK & KH Group របស់លោក គឺក្នុងនាមជាប្រធានគណៈកម្មការដោះស្រាយទំនាស់ និងលក់ដីក្រុមហ៊ុន ដែលមានការតែងតាំងពីក្រុមហ៊ុន តាមសេចក្តីសម្រេចចុះថ្ងៃទី៧ ខែសីហា ឆ្នាំ២០១៨ និងកិច្ចសន្យាប្រគល់សិទ្ធិលក់ទិញដី ចុះថ្ងៃទី ៦ ខែសីហា ឆ្នាំ២០១៨ រវាងលោក លី សាយឃាង និងរូបលោក។ ម្យ៉ាងទៀតចំពោះការលើកឡើងរបស់លោក ឈឹម ផលវរុណ ថាគ្មានមន្ត្រីលេខាធិការដ្ឋានចុះបេសកម្ម ជាការពិត ដោយសារការយល់ច្រឡំខុសរបស់លោក អំពីមន្ត្រីមួយរូបដែលជាសមាជិកប្រតិភូគណបក្សខ្មែររួបរួមជាតិ ធ្វើការជាមួយលេខាធិការដ្ឋាននោះ ស្មានថាជាមន្ត្រីលេខាធិការដ្ឋាន ។

លោកបានបន្តទៀតថា លោក លី សាយឃាង បានប្រគល់សិទ្ធិឲ្យរូបលោកលក់ដីរបស់ក្រុមហ៊ុនដែលមានជម្លោះរ៉ាំរ៉ៃរយៈពេល១៥ឆ្នាំហើយ តាមកិច្ចសន្យាប្រគល់សិទ្ធិលក់ទិញអចលនវត្ថុ ទំហំ ៧៨៧ហិកតា។ ក្នុងនាមប្រធានគណៈកម្មការដោះស្រាយ ទំនាស់ និងលក់ដីក្រុមហ៊ុនលោកបានប្រើរយៈពេលប្រមាណ ៨ខែ និងចំណាយថវិកាជាច្រើនដោះស្រាយបញ្ហាជម្លោះវិវាទដីធ្លីក្រុមហ៊ុននេះ រហូតត្រូវបានបញ្ចប់ជាស្ថាពរទាំងស្រុង៕

អត្ថបទ៖ សោភា