នាព្រឹកថ្ងៃ​ថ្ងៃទី២៦ ខែ​កក្កដា ឆ្នាំ​២០១៩ ព្រះករុណា​ ព្រះបាទ​សមេ្តច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា បាន​យាងសួរ​សុខទុក្ខ និង​ប្រោស​ព្រះរាជទាន​នូវព្រះរាជអំណោយ​ដល់ប្រជានុរាស្រ្ត​ចំនួន ៤៣៨​គ្រួសារ សិស្សានុសិស្ស​ចំនួន ៣៧៩​នាក់ ស្ថិតនៅភូមិ​ព្រៃរំដែល ភូមិ​តានក ភូមិព្រៃខ្លា ឃុំភក្តី ស្រុក​បរសេដ្ឋ ខេត្ត​កំពង់ស្ពឺ។

ក្នុងឱកាស​ដ៏វិសេសវិសាល​នោះ ព្រះអង្គបាន​ទទួលស្វាគមន៍​យ៉ាងកក់ក្តៅ​ជាទីបំផុត ពី​សំណាក់ លោក យឹម សុខុម ប្រធាន​ក្រុមប្រឹក្សា​ខេត្ត លោក វ៉ី សំណាង អភិបាលខេត្ត​កំពង់ស្ពឺ និង​ថ្នាក់ដឹកនាំ​អាជ្ញាធរដែនដី​គ្រប់លំដាប់ថ្នាក់ លោកយាយ លោកតា បងប្អូនប្រជារាស្រ្ត​ជាកូន ជាចៅ​របស់​ព្រះអង្គ ប្រកបដោយ​ក្តីនឹករឭក និងគោរពស្រឡាញ់​ជាទីបំផុត។

ព្រះរាជអំណោយ​ដែលព្រះអង្គ​ប្រទាន​ដល់ប្រជានុរាស្ត្រ​ទាំង ៤៣៨​គ្រួសារ ក្នុងមួយ​គ្រួសារៗ​ទទួលបាន អង្ករ ៥០គីឡូក្រាម ឃីត ១កញ្ចប់ (មានមុង១ ភួយ១ សារុង១ និងក្រមា១) តង់កៅស៊ូ១ផ្ទាំង មី ១កេស ត្រីខ ១០កំប៉ុង ស្បែកជើងផ្ទាត់១គូរ អាវយឺត​មានស្លាកព្រះរាជអំណោយ​ព្រះករុណា ព្រះបាទសម្តេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រ​កម្ពុជា ចំនួន ១ និងថវិកា ១០ម៉ឺន​រៀល៕

អត្ថបទ និងរូបថត៖ រដ្ឋបាលខេត្តកំពង់ស្ពឺ