សម្តេច ហ៊ុន សែន ថាមេដាយស៊ីហ្គេម២០២៣ គ្រាន់តែជារឿងទី២

2019-07-29 08:12:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានថ្លែងថា ក្នុងពេលដែលកម្ពុជាធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣ ការទទួលបានមេដាយ គឺជារឿងទី២ទេ ពោលគឺរឿងដែលសំខាន់បំផុត ការធានារ៉ាប់រងដល់កីឡាករ-កីឡាការិនី ដែលមកចូលរួម។ ការថ្លែងនេះ ធ្វើឡើងក្នុងពេលអញ្ជើញចុះពិនិត្យការដ្ឋានសាងសង់ពហុកីឡដ្ឋានជាតិមរតកតេជោ នៅសង្កាត់ព្រែកតាសេក ខណ្ឌជ្រោយចង្វារ នាព្រឹកថ្ងៃទី២៩ ខែកក្កដា ឆ្នាំ២០១៩។

រូបថត៖ ហ្វេសប៊ុកសម្តេច ហ៊ុន សែន

សម្តេចបញ្ជាក់យ៉ាងដូច្នេះថា៖ «**យើងមានតួនាទីជាម្ចាស់ផ្ទះ។ ដូច្នេះកិច្ចការ២ដែលត្រូវធ្វើ ទី១ ត្រូវធ្វើម្ចាស់ផ្ទះដែលមានការទទួលខុសត្រូវ ហើយដោយការប្រព្រឹត្តទៅនៃការប្រកួតរលូនពីដើមដល់ចប់ មិនធ្វើឱ្យកីឡាករកីឡាការិនី និងអ្នកដឹកនាំនៃប្រទេសនានា ដែលមកចូលរួមការប្រកួត បាក់ទឹកចិត្ត ហើយធ្វើឱ្យខូចនូវមុខមាត់ប្រទេសនោះទេ។ មេដាយគឺជារឿងទី២ទេ ប៉ុន្តែរឿងធានារ៉ាប់រងក្នុងឋានៈជាសមាជិកអាស៊ានដែលមានការទទួលខុសត្រូវ ត្រូវធ្វើកិច្ចការងារនេះ ឱ្យច្បាស់ គឺមិនឱ្យកីឡាករ កីឡាការិនី ដែលមកពីប្រទេសនានា បាក់ទឹកចិត្ត ហើយត្រឡប់ទៅវិញនិយាយដើមពីកម្ពុជានោះទេ**»។

សូមជម្រាបថា សម្តេចនាយករដ្ឋមន្ត្រីបានផ្តល់នូវអនុសាសន៍សំខាន់ៗ ក្នុងការជំរុញឱ្យវិស័យកីឡា ក៏ដូចជាការរៀបចំព្រឹត្តិការណ៍ស៊ីហ្គេមឆ្នាំ២០២៣ខាងមុខ ឱ្យទទួលបានជោគជ័យដូចជា៖

១. បង្កើនការអភិវឌ្ឍហេដ្ឋារចនាសម្ព័ន្ធបន្ថែមទៀតក្នុងតំបន់នេះ ពិសេសត្រូវធ្វើការកសាងផ្លូវថ្នល់សំខាន់ៗឱ្យបានច្រើន ដើម្បីបង្កភាពងាយស្រួលដល់ការធ្វើដំណើររបស់ប្រជាពលរដ្ឋចេញចូលក្នុងតំបន់នេះ។

២. ជំរុញឱ្យមានការត្រៀមហ្វឹកហាត់កីឡាគ្រប់ប្រភេទចាប់ពីពេលនេះតទៅ ដើម្បីឈានទៅចាប់យកមេដាយឱ្យបានច្រើន។ ជាមួយគ្នានេះដែរ បណ្តាទូរទស្សន៍ក្នុងស្រុកទាំងអស់ត្រូវមានការបែងចែកការងារគ្នាក្នុងការផ្សព្វផ្សាយពីការហ្វឹកហាត់ និងការប្រកួតកីឡានីមួយៗ ដើម្បីកុំឱ្យដាច់វគ្គប្រកួតនីមួយៗ ឱ្យការទស្សនាពីមហាជន គឺភាពភាពងាយស្រួលក្នុងការប្រកួតកីឡាប្រភេទផ្សេងៗគ្នា៕

អត្ថបទ៖ សំរិទ្ធ កុម្ភៈ