ហ៊ុយ យ៉ាឡេង ស្រក់ទឹកភ្នែក ក្រោយឃើញលទ្ធផលបញ្ជាក់ពីគ្រូពេទ្យ ដោយសាររឿងធាក់ស៊ីក្លូ

2019-07-30 04:05:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកនិពន្ធ និងដឹកនាំរឿង ហ៊ុយ យ៉ាឡេង បានពោលថា លោកអង្គុយស្រក់ទឹកភ្នែក ក្រោយពីបានទទួលលទ្ធផលពិនិត្យរបស់គ្រូពេទ្យនៅលើឆ្អឹងខ្នងរបស់លោក បញ្ជាក់ថា មានបញ្ហាទៅហើយក្រោយពីចូលខ្លួនមកធាក់ស៊ីក្លូបានប៉ុន្មានថ្ងៃ។

អ្នកនិពន្ធ និងដឹកនាំរឿង "ធ្មប់" បញ្ជាក់ថា តាមលទ្ធផលពីគ្រូពេទ្យគឺឆ្អឹងខ្នងរបស់លោកមានបញ្ហាទៅហើយ ហើយនោះអ្វីដែលលោកបារម្ភ ពេលនេះវាបានក្លាយជាការពិត។ "អង្គុយគិតស្រក់ទឹកភ្នែក ឈឺចាប់ពេញ១ថ្ងៃ?ថាតើត្រូវសម្រាក ឬទៅមុខបន្ត បើយើងមានបញ្ហាឆ្អឹងទៅហើយ!”។

លទ្ធផលគួរឲ្យស្លុតចិត្តខាងលើ បានកើតមានក្រោយពីលោកបានលះបង់ភាពសុខស្រួលមួយរយៈ ចូលខ្លួនផ្សាំនឹងជីវិតធាក់ស៊ីក្លូ ក្នុងបំណងក្រេបយកបទពិសោធន៍ពិតរបស់បងប្អូន ពូៗ និងលោកតាប្រកបរបរធាក់ស៊ីក្លូ ទៅរំលេចក្នុងសេណារីយ៉ូ កុនថ្មីរបស់លោកមានចំណងជើងថា "ដើម្បីកូន" ដែលតួអង្គក្នុងរឿង គឺជាអ្នកធាក់ស៊ីក្លូ។ លោក យ៉ាឡេង ប្រាប់ថា តួអង្គក្នុងរឿង គឺជាបុរសពិការម្នាក់ ហើយឥឡូវនេះ លោកស្រាប់តែទទួលដំណឹងលោកឈឺមែនទែន។

"ហ៊ឺថតរឿងពិការចំធ្លាក់ខ្លួនមានជំងឺមែនទែន? ពិតជាមានន័យ ណាស់ជីវិតខ្ញុំអើយ?ទើបនឹងដាក់គោលដៅតស៊ូសម្រេចក្ដីប្រាថ្នាក្នុងរយៈពេល ៥ឆ្នាំទៅមុខទៀត? ទេវតាអើយសុំ៥ឆ្នាំទៀតចាំឈឺក៏មិនបាន? តែមិនអីទេកូនចៅបានសម្រេចចិត្តហើយ? ត្រូវសម្រេចគោលដៅអោយបានមិនបោះបង់ទេ!”។ លោកប្រាប់បន្ថែមថា តាមសភាពជំងឺលោក គ្រូពេទ្យ ប្រាប់ឲ្យសម្រាក និងកុំធ្វើការងារអ្វីឲ្យហួសហេតុ និងព្យាយាមហាត់ប្រាណ ដោយហែលទឹកឲ្យបានច្រើន។

ដោយឡែកចំពោះផែនការធាក់ស៊ីក្លូដើម្បីសរសេររឿងថ្មីរបស់លោក ក៏គ្រូពេទ្យណែនាំកុំអោយប្រើកម្លាំងជ្រុលដែរ ពោលគឺ ១ថ្ងៃតែប្រមាណ ៣០នាទី គឺសមស្របហើយ។ យ៉ាងណាក៏ដោយ អ្នកនិពន្ធដដែល បញ្ជាក់ថា លោកមិនបោះបង់មហិច្ឆតារបស់លោកឡើយ បើទោះជំងឺវិវត្តដល់ដំណាក់កាលធ្ងន់ជាងនេះក៏ដោយ។ លោកថា "អស់ខ្លាំងវះកាត់ដាក់ដែកហើយបន្ត ដំណើរទៅមុខទៀត? ថ្ងៃនេះធាក់ដោះអាវក្រោមកម្ដៅថ្ងៃទៀត ដើម្បីអោយស្បែកខ្មៅ”

អ្វីដែល ហ៊ុយ យ៉ាឡេង បានធ្វើខាងលើ គឺត្រៀមនឹងដាក់បញ្ចូលទៅក្នុងភាពយន្តបែបជីវិតមួយរឿងមានចំណងជើងថា “ដើម្បីកូន” ដែលគ្រោងនឹងចាប់ផ្ដើមថតនាពេលខាងមុខនេះ ខណៈលោកទើបតែជួបប្រឈមនឹងជំងឺឆ្អឹងដែលមិននឹកស្មានដល់នេះ។ “មុនពេលធាក់ស៊ីក្លូ ខ្ញុំទទួលអារម្មណ៍ថា ឆ្អឹងខ្នងខ្ញុំនឹងវាឈឺតិចៗដែរ តែគិតថាមិនអី ដល់ឥឡូវឃើញថាមានបញ្ហាទៅហើយ...គ្រូពេទ្យថា ឲ្យហាត់ប្រាណពុតចង្កេះ ហែលទឹក ធ្វើអ្វីក៏ទម្រន់ និងញុំាថ្នាំឲ្យទៀងទាត់ទៅ វាអាចជាវិញហើយ ហ៊ឺ...វេលាថតជិតមកដល់ហើយ តែយ៉ាងណា ខ្ញុំគិតថា ខ្ញុំអាចធ្វើបាន...!”។

អ្នកនិពន្ធ និងដឹកនាំរឿងដដែល បញ្ជាក់ថា លោកគ្រោងនឹងធ្វើវីឌីអូផ្ដល់ជូនបងប្អូនអំពីបញ្ហានេះ ដើម្បីកុំមានបញ្ហាកើតឡើងហើយ ទើបស្ដាយដូចជាលោក៕

អត្ថបទ៖ ទារិកា