អស្ចារ្យ! ចាន់ រតនា ផ្ដួល Balart យកជ័យជម្នះ៣លើកជាប់គ្នាលើសង្វៀន ONE

2019-08-16 12:38:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនចម្រុះកម្ពុជា ចាន់ រតនាបានយកឈ្នះពិន្ទុលើជើងខ្លាំងសញ្ជាតិគុយបា Gustavo Balart មុននេះក្នុងសង្វៀនធំលំដាប់អន្តរជាតិ ONE Championship ដែលរៀបចំនៅប្រទេសថៃ។

កីឡាករ ចាន់ រតនា

អ្នកប្រដាល់កម្ពុជា ចាន់ រតនា និងកីឡាករគុយបា Balart ប្រកួតជក់ចិត្តតែម្ដង ពោលបើកការវាយលុកគ្នាភ្លាមៗមិនចាំស្ទាប់ស្ទង់អ្វីច្រើននោះទេ។ កីឡាករមាឌល្អិតចិត្តធំ Balart ហាក់ស្រេកឃ្លាន និងជ័យជម្នះលើ ចាន់ រតនា ខ្លាំងណាស់ ដោយព្យាយាមដើរចូលវ៉ៃខាវឆ្វេងស្ដាំមិនឈប់នោះទេ បំណង់ចង់បញ្ចប់ការប្រកួតមុនចប់ទឹក។ អ្នកលេងគុនខ្មែរ រតនា វិញហាក់បានប្រុងប្រៀបរួចរាល់ និងត្រៀមស្នៀតជាស្រេច ពោលបើទោះជាដៃគូខំដើរបុក និងចាប់ផ្ដួលើកម្រាលក៏ដោយ នៅតែអាចដោះស្រាយរួចដដែល។

ចាន់ រតនា និង Balart

ជើងខ្លាំងរបស់កម្ពុជាខាងលើ តែងតែឆ្លៀតពេលដែល រើខ្លួនរួចពីការចាប់របស់ Balart វិញនោះ គឺដើរបុកវ៉ៃយកពិន្ទុវិញ និងចង់វ៉ៃផ្ដាច់តាមដែលអាចធ្វើទៅបាន ព្រោះអីដឹងកីឡាករគុយបាក្រោយចាប់រួចគឺអស់ស៊ុហ្វហើយ។ កាន់តែល្អមើលទៅទៀតនោះ គឺចុងទឹកទី៣ Balart ប្រើកម្លាំងច្រើនពេលនៅទឹកមុនៗនោះ ជាហេតុអស់ស៊ុហ្វស្ទើរតែទប់ខ្លួនមិនរួចទៅហើយ ខណៈ ចាន់ រតនា នៅកម្លាំងជាងអាចទាត់ និងម៉ាត់យកពិន្ទុងាយៗ។ ចប់ការប្រកួតពេញ៣ទឹក អាជ្ញាកណ្ដាលផ្ដល់ពិន្ទុឲ្យអ្នកលេងគុនខ្មែរ ចាន់ រតនា ឈ្នះពិន្ទុកីឡាករគុយបា Balart។

កីឡាករ ចាន់ រតនា

នេះគឺជាការឈ្នះលើកទី៣ ជាប់គ្នារបស់ រតនា ហើយ ដោយកាលពីពីរប្រកួតកន្លងទៅគេបានយកឈ្នះឥណ្ឌូណេស៊ីទាំងពីររូបគឺ Abrou Fernandes និង Rudy Agustian នៅប្រទេសម៉ាឡេស៊ី និងឥណ្ឌូណេស៊ី៕

អត្ថបទ៖ ហេង សុធារិទ្ធិ