វិស្វករ ស្ថាបត្យករ និងអ្នកជំនាញបានចំណូលខ្ទង់ពាន់ដុល្លារ តែកម្មករគ្មានជំនាញវិញហៅលែងលឺ

2019-08-28 03:00:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

របាយការណ៍ថ្មីមួយប្រចាំខែកក្កដា ដែលចេញផ្សាយដោយក្រសួងរៀបចំដែនដីនគររូបនីយកម្ម និងសំណង់ នៅថ្ងៃទី៦ ខែសីហា ឆ្នាំ ២០១៩ កន្លងទៅនេះបានឱ្យដឹងថា ចំណូលរបស់វិស្វករ ស្ថាបត្យករ និងអ្នកជំនាញបានស្ថិត ក្នុងខ្ទង់ពាន់ដុល្លារពោលគឺក្នុងចន្លោះពី ៤០០ដុល្លារទៅ ២ ៥០០ដុល្លារ ក្នុងមួយខែ ខណៈកម្មករគ្មានជំនាញបានចំណូលចន្លោះពី ៣ម៉ឺនទៅ ៦ម៉ឺនរៀលប៉ុណ្ណោះ។

របាយការណ៍ដដែលបានឱ្យដឹងថា វិស័យសំណង់បានបង្កើតការងារជាច្រើនជូនប្រជាពលរដ្ឋក្នុងខែកក្កដា ឆ្នាំ២០១៩ នេះ នេះគិតជាមធ្យមប្រមាណ ១៩០០០ នាក់ ទៅ២១០០០នាក់ ក្នុងមួយថ្ងៃ។ ដោយឡែកនៅរាជធានីភ្នំពេញមានចំនួនកម្មករប្រមាណពី២៨០០០នាក់ ទៅ ១២៥០០នាក់ ក្នុងមួយថ្ងៃ គឺមានការថយចុះចំនួន ២៦,៣១%។

បន្ថែមលើនេះតាមរយៈការសិក្សាស្រាវជ្រាវ ក្នុងខែកក្កដា ឆ្នាំ២០១៩ នេះ តម្លៃពលកម្មសម្រាប់កម្មករគ្មានជំនាញក្នុងមួយថ្ងៃអាចទទួលបានពី៣ម៉ឺនរៀលទៅ ៦ម៉ឺនរៀល។ ចំពោះវិស្វករ ស្ថាបត្យករ និងអ្នកជំនាញផ្សេងទៀត ក្នុងមួយខែអាចទទួលបានប្រាក់បៀវត្សពី ៤០០ដុល្លារទៅ ២ ៥០០ដុល្លារ។ ប្រភពទិន្នន័យថា ខាងលើ គឺបានមកពីការចុះផ្ទាល់នៅតាមការដ្ឋានសំណង់។ នៅប៉ុន្មានឆ្នាំចុងក្រោយនេះវិស័យសំណង់ ក្នុងប្រទេសកម្ពុជាមានការរីកចម្រើនគួរឱ្យកត់សំគាល់ ជាហេតុធ្វើឱ្យមានតម្រូវការធនធានមនុស្ស និងកម្លាំងពលកម្មកើនឡើង រហូតមិនអាចឆ្លើយតបទៅនឹងតម្រូវការ។

កញ្ញា ប៉េងទី សៅបូរីណា អ្នកគ្រប់គ្រងទូទៅនៅក្រុមហ៊ុន Phnomlist ដែលជាក្រុមហ៊ុនមួយផ្ដល់សេវាកម្មផ្នែកជ្រើសរើសបុគ្គលិក (Recruitment) បានប្រាប់ sabay ថា របាយការណ៍ក្រសួងរៀបចំដែនដីនគររូបនីយកម្ម និងសំណង់ ស៊ីគ្នាទៅនឹងរបាយការណ៍របស់ក្រុមហ៊ុន Phnomlist កន្លងមកដែរ។ ប្រាក់ខែវិស្វករ ស្ថាបត្យករ និងអ្នកជំនាញខ្លះអាចច្រើនជាងនេះ ពោល គឺចន្លោះពី ១ ០០០ដុល្លារទៅ៣ ០០០ដុល្លារ។

កញ្ញា ប៉េងទី សៅបូរីណា អ្នកគ្រប់គ្រងទូទៅនៅក្រុមហ៊ុន Phnomlist

កញ្ញាឱ្យដឹងទៀតថា អ្នកមានជំនាញផ្នែករចនា និងបកប្រែភាសា មានភាសាចិន កូរ៉េ និងជប៉ុនជាដើម ក៏កំពុងទទួលបានប្រាក់ខែខ្ពស់ដែរបច្ចុប្បន្ននេះ។ កញ្ញាថា យុវជនគួរជ្រើសរើសជំនាញណា ដែលមានតម្រូវការខ្ពស់ ក្នុងនោះមាន វិស្វករ ស្ថាបត្យករ វិទ្យាសាស្ត្រកុំព្យូទ័រ និងកសិកម្ម។

បន្ថែមលើមុខជំនាញដូចបានរៀបរាប់យុវជនក៏គួរតែរៀនជំនាញទន់មួយទៀត ទាក់ទងនឹងភាពជាអ្នកដឹកនាំ ការគ្រប់គ្រងក្រុម និងការជំរុញទឹកចិត្ត ដើម្បីងាយស្រួលនៅពេលកាន់តំណែងខ្ពស់៕