រកឃើញប្រភពអាវុធដែលប្រើក្នុងការវាយប្រហាររោងចក្រប្រេងអារ៉ាប៊ីសាអ៊ូឌីត

2019-09-17 03:40:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីថ្ងៃទី១៦ ខែកញ្ញា ឆ្នាំ២០១៩ អ្នកនាំពាក្យកងកម្លាំងចម្រុះអារ៉ាប់ លោក Turki al-Malki បាននិយាយថាអាវុធដែលបានប្រើក្នុងការវាយប្រហាររោងចក្រប្រេងអារ៉ាប៊ីសាអ៊ូឌីតកាលពីចុងសប្ដាហ៍មុន គឺមានប្រភពពីប្រទេសអ៊ីរ៉ង់។ ជាមួយនឹងតម្រុយនៃការឆ្លើយតបដោយកម្លាំងយោធាសហរដ្ឋអាមេរិក ការប្រកាសនេះធ្វើឲ្យកើនភាពភ័យខ្លាចនៃការកើតមានសង្គ្រាមថ្មីមួយទៀតនៅតំបន់នេះ។

ការវាយប្រហាររោងចក្រចម្រាញ់ប្រេងនៅតំបន់ Abqaiq ដែលជារោងចក្រចម្រាញ់ប្រេងធំជាងគេក្នុងពិភពលោក និងតំបន់អណ្ដូងប្រេង Khurais នៅផ្នែកខាងកើតប្រទេសអារ៉ាប៊ីសាអ៊ូឌីត កាលពីចុងសប្ដាហ៍ បានធ្វើឲ្យតម្លៃប្រេងជុំវិញពិភពលោកកើនឡើងខ្ពស់។

ក្រុមឧទ្ទាម Houthi ដែលមានការគាំទ្រពីរដ្ឋាភិបាលអ៊ីរ៉ង់បានអះអាងទទួលខុសត្រូវចំពោះការវាយប្រហារនេះ ក៏ប៉ុន្តែក្រុងវ៉ាស៊ីនតោនបានច្រានចោលការអះអាងនេះ ហើយចោទប្រទេសអ៊ីរ៉ង់វិញ ជាមួយនឹងប្រសាសន៍ប្រធានាធិបតីសហរដ្ឋអាមេរិកលោក ដូណាល់ ត្រាំ ដែលបាននិយាយថាយោធារបស់លោកបានត្រៀមខ្លួនជាស្រេចដើម្បីឆ្លើយតប។

ហេដ្ឋារចនាសម្ព័ន្ធថាមពលរបស់ប្រទេសអារ៉ាប៊ីសាអ៊ូឌីតធ្លាប់ត្រូវបានគេវាយប្រហារកាលពីមុនដែរ ប៉ុន្តែការវាយប្រហារលើកនេះគឺមានទំហំធំខុសមុនៗ ដោយបានកាត់បន្ថយទិន្នផលប្រេងរបស់សមាជិក OPEC នេះអស់ពាក់កណ្ដាលដែលប្រហែល ៦ %នៃការផ្គត់ផ្គង់ប្រេងរបស់ពិភពលោក៕

ប្រភព៖ Channelnewsasia ប្រែសម្រួល៖ សុខ វេងឈាង