ក្រោយកម្ទេច ISIS ប្រទេសអារ៉ាប់ពីរសម្រេចបើកច្រកព្រំដែនវិញ

2019-10-01 03:41:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពីថ្ងៃទី៣០ ខែកញ្ញា ឆ្នាំ ២០១៩ អ៊ីរ៉ាក់ និងស៊ីរីបានធ្វើពិធីបើកច្រកព្រំដែនដ៏សំខាន់មួយរវាងប្រទេសជិតខាងទាំងពីរ ដែលត្រូវបានបិទអស់រយៈពេល៧ឆ្នាំដោយសារសង្គ្រាមស៊ីវិលស៊ីរី និងការវាយប្រហាររបស់ក្រុមឧទ្ទាម ISIS។

ទាហានអ៊ីរ៉ាក់ម្នាក់ថត Selfie ជាមួយទាហានស៊ីរីមួយក្រុម ប្រភព៖ AP

ការបើកច្រកឆ្លងដែននេះគឺដើម្បីពង្រឹងពាណិជ្ជកម្មរវាងប្រទេសអារ៉ាប់ទាំងពីរនេះ និងជួយក្នុងការសាងសង់ឡើងវិញក្រោយពីសង្គ្រាមរ៉ាំរ៉ៃជាច្រើនឆ្នាំ។ តែអ្នកវិភាគមួយចំនួនបានឃើញការបើកច្រកនេះគឺជួយពង្រីកឥទ្ធិពលរបស់អ៊ីរ៉ង់នៅក្នុងតំបន់ ដោយផ្ដល់សមត្ថភាពដល់ក្រុមជីវពលដែលមានការគាំទ្រពីអ៊ីរ៉ង់អាចធ្វើដំណើររវាងប្រទេសទាំងពីរ។ គេក៏គិតថាការបើកច្រកនេះ ផ្ដល់ផ្លូវគោកភ្ជាប់អ៊ីរ៉ង់ទៅសមុទ្រមេឌីទែរ៉ាណេ តាមរយៈប្រទេសអ៊ីរ៉ាក់ ស៊ីរី និង លីបង់។ តំបន់នេះក៏ជាប្រឈមមុខគ្នារវាងកងកម្លាំងជនជាតិ Kurd ដែលមានការគាំទ្រពីសហរដ្ឋអាមេរិក នឹងកងទ័ពប្រទេសស៊ីរីដែលមានការគាំទ្រពីប្រទេសអ៊ីរ៉ង់។

រដ្ឋមន្ត្រីក្រសួងមហាផ្ទៃស៊ីរី លោកឧត្ដមសេនីយ៍ទោ Mohammed Khaled Rahmoun ប្រភព៖ Reuters

រដ្ឋមន្ត្រីក្រសួងមហាផ្ទៃស៊ីរី លោកឧត្ដមសេនីយ៍ទោ Mohammed Khaled Rahmoun បានឆ្លងទៅខាងអ៊ីរ៉ាក់អមដោយដោយទាហានមួយចំនួន។ ក្នុងពិធីបើកនេះ លោក បានថ្លែងថា៖ «ការបើកច្រកព្រំដែននេះគឺជាលទ្ធផលនៃជ័យជំនះលើក្រុមភេរវកម្មសម្រេចបានដោយប្រជាជនរបស់យើងនៅអ៊ីរ៉ាក់ និងស៊ីរី»។

ទាហានស៊ីរីមួយក្រុមថត Selfie ជាមួយរថយន្តល្បាតអ៊ីរ៉ាក់ ប្រភព៖ AP

ច្រកឆ្លងដែននេះភ្ជាប់ក្រុង Qaim ប្រទេសអ៊ីរ៉ាក់ និងក្រុង Boukamal ប្រទេសស៊ីរី ដែលរហូតដល់ឆ្នាំ២០១៧ ក្រុងទាំងពីរនេះគឺគ្រប់គ្រងដោយក្រុមភេរវកម្ម ISIS។ ក្រោយពីឆ្នាំ២០១៧ ក្រុងទាំងពីរនេះត្រូវបានរំដោះដោយកងកម្លាំងមកពីប្រទេសទាំងពីរ ហើយស៊ីរីបានប្រកាសថាកងកម្លាំងរបស់ពួកគេបានកម្ចាត់នៅក្នុងប្រទេសអស់ហើយ៕

ប្រភព៖ South China Morning Post ប្រែសម្រួល៖ សុខ វេងឈាង