សមាជ​ច្របាច់បញ្ចូលគ្នារវាងគណបក្សហ៊្វុនស៊ិនប៉ិច របស់សម្តេចក្រុមព្រះ នរោត្តម រណឫទ្ធិ និង​គណបក្ស​ខ្មែររួបរួមជាតិ របស់​លោកញឹក ប៊ុនឆៃ ដែល​គ្រោងនឹងធ្វើនៅថ្ងៃទី២៣ ខែធ្នូ ខាង​មុខ​នេះ​ត្រូវ​បាន​លើក​ពេលហើយ ដោយ​មិនទាន់បានកំណត់ពេលវេលាជាក់លាក់។ ការលើកពេលនេះ ស្រប​ពេល​ដែល​ក្រសួងមហាផ្ទៃ បានឲ្យគណបក្សហ៊្វុនស៊ិនប៉ិច ផ្អាក​ការ​ធ្វើ​សមាជ​វិសាមញ្ញ​នៅ​ថ្ងៃទី២៣ ខែធ្នូ ផងដែរ។

ការ​ដែល​ក្រសួងមហាផ្ទៃឲ្យផ្អាកការធ្វើសមាជវិសាមញ្ញរបស់គណបក្សហ៊្វុនស៊ិនប៉ិច គឺ​ក្រសួង​ឲ្យ​គណបក្ស​នេះ ដោះ​ស្រាយបញ្ហាផ្ទៃក្នុងរបស់ខ្លួនចប់សព្វគ្រប់ជាមុនសិន និងអនុវត្តតាមប្រការ២៤ នៃ​លក្ខន្តិកៈ​របស់គណបក្សដែលបានតម្កល់ទុកនៅក្រសួងមហាផ្ទៃ។

លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានថ្លែងប្រាប់ខ្លីៗ កាលពី​ថ្ងៃទី១៩ ខែធ្នូ ថា តាម​អ្វី​ដែល​ក្រុមការងារគណបក្សទាំងពីរបានធ្វើការជាមួយគ្នា ដើម្បី​រៀបចំ​ចំណុច​សំខាន់ៗ​មួយ​ចំនួន​ដូច​ជា គោលនយោបាយ លក្ខន្តិកៈ បទបញ្ជាផ្ទៃ ដើម្បីឈានទៅដល់ការធ្វើសមាជច្របាច់បញ្ចូលគ្នា និង​បាន​ឯកភាពគ្នាថា យកថ្ងៃទី២៣ ខែធ្នូ ឆ្នាំ២០១៩ នឹង​ធ្វើ​សមាជ​បញ្ចូល​គ្នា​រវាង​គណបក្ស​ទាំង​ពីរ។ តែកាលពីសប្តាហ៍មុនគណបក្សហ៊្វុនស៊ិនប៉ិច បានជូនដំណឹងមកថា នៅថ្ងៃទី២៣ ខែធ្នូ មិន​បាន​ធ្វើ​សមាជ​រួម​បញ្ចូលគ្នាទេ គឺគណបក្សហ៊្វុនស៊ិនប៉ិច នឹងធ្វើសមាជតែម្នាក់ឯងនៅថ្ងៃទី២៣ ខែធ្នូ ដើម្បី​ឲ្យ​ស្រប​ទៅតាមលក្ខន្តិកៈរបស់គណបក្សគេ។

លោកបន្តថា “ខ្ញុំជឿថា ការរួបរួមគ្នានេះ គឺជាការល្អ យើងមានកម្លាំងទាំងសង្ខាង ហើយ​បូក​បញ្ចូល​គ្នា​ទៅ ឃើញ​ថា កម្លាំងវាធំហើយ បើយើងរួមបញ្ចូលគ្នាទៅវាអាចធំ នឹង​អាច​ធ្វើ​ឲ្យ​សម្លេង​អ្នក​ផ្សេងៗ​មក​ចូល​រួម​ជាមួយ។ ហើយ​គោលជំហរខាងខ្ញុំនៅតែរក្សាការរួបរួមដដែល”។

សូម​ជម្រាបថា សម្តេចក្រឡាហោម ស ខេង បានធ្វើលិខិតទូលថ្វាយសម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិច កាលពីថ្ងៃទី១៩ ខែធ្នូ ឆ្នាំ២០១៩ ថា ក្រសួងមហាផ្ទៃ បានទទួល​នូវលិខិតជូនដំណឹងស្តីពីការរៀបចំធ្វើសមាជវិសាមញ្ញរបស់គណបក្សហ៊្វុនស៊ិនប៉ិច ដែល​គ្រោង​រៀប​ចំឡើងនៅថ្ងៃទី២៣ ខែធ្នូ ឆ្នាំ២០១៩ខាងមុខនេះ។

ពាក់ព័ន្ធនឹងករណ៏នេះ ក្រសួងមហាផ្ទៃស្នើឲ្យគណបក្សហ៊្វុនស៊ិនប៉ិច ពន្យារ​ពេល​នៃ​ការ​រៀបចំ​ធ្វើ​សមាជ​វិសាមញ្ញ​របស់​គណបក្ស​ជា​បណ្តោះ​អាសន្ន​សិន​រហូត​ដល់​គណបក្ស​បាន​សម្រប​សម្រួល​ដោះស្រាយ​បញ្ហាផ្ទៃក្នុងរបស់គណបក្សចប់សព្វគ្រប់ជាមុនសិន។ ទន្ទឹមនឹងនេះ ក្រសួងមហាផ្ទៃ ស្នើ​សុំ​ឲ្យ​គណបក្សត្រូវអនុវត្តតាមប្រការ២៤ នៃ​លក្ខន្តិកៈ​របស់​គណបក្ស​ដែល​បាន​តម្កល់​ទុក​នៅ​ក្រសួង​មហាផ្ទៃ និងលិខិតលេខ១៥២៥ សជណ ចុះថ្ងៃទី១០ ខែកញ្ញា ឆ្នាំ២០១៨ របស់ក្រសួងមហាផ្ទៃ៕