កម្ពុជា ទទួលបានកម្ចីជាង ១២០លានដុល្លារពីបារាំង

2019-12-31 02:17:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោកស្រី Ophelie BOURHIS នាយកទីភ្នាក់ងារបារាំងសម្រាប់អភិវឌ្ឍន៍ (AFD) ប្រចាំនៅកម្ពុជា បានចុះហត្ថលេខាលើកិច្ចព្រមព្រៀងឥណទានសម្បទានសម្រាប់គម្រោងចំនួន២ ដែលមានទឹកប្រាក់សរុប ១១៨លានអឺរ៉ូ (ជាង ១២១,៣២លានដុល្លារអាមេរិក)។

កិច្ចព្រមព្រៀងទាំង២នេះ មានដូចខាងក្រោម៖

១. ឥណទានសម្បទានចំនួន ១០០លានអឺរ៉ូ (ប្រមាណជាង ១០១,៤លានដុល្លារ) សម្រាប់គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែង ដំណាក់កាលទី២៖ សម្រាប់អនុវត្តគម្រោងនេះបន្តពីគម្រោងជំហានទី១ មានទិសដៅ៖ ១. សាងសង់ស្ថានីយ៍បូមទឹក ដែលមានសមត្ថភាពផលិតទឹកស្អាតបាន ១៩៥ ០០០ម៉ែត្រគូបក្នុងមួយថ្ងៃ។ ២. បំពាក់បំពង់មេនាំទឹកស្អាត, បំពង់ចែកចាយ និងសម្ភារៈតភ្ជាប់បំពង់ និង៣. ត្រួតពិនិត្យការងារសាងសង់ និងគាំទ្រដល់ការពង្រឹងសមត្ថភាពមន្រ្តីរបស់រដ្ឋាករទឹកស្វយ័តក្រុងភ្នំពេញលើការងារលទ្ធកម្ម និងដំឡើងបណ្តាញចែកចាយទឹក។

២. ឥណទានសម្បទានចំនួន១៨លានអឺរ៉ូ (ប្រមាណជា ១៩,៩២ លានដុល្លារអាមេរិក) សម្រាប់គម្រោងអភិវឌ្ឍន៍ជំនាញសម្រាប់ការប្រកួតប្រជែង៖ សម្រាប់អនុវត្តគម្រោងអភិវឌ្ឍន៍ជំនាញសម្រាប់ការប្រកួតប្រជែង ដែលមានក្រសួងការងារ និងបណ្តុះបណ្តាលវិជ្ជាជីវៈ ជាភ្នាក់ងារប្រតិបត្តិគម្រោង ហើយក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុជាភ្នាក់ងារអនុវត្តគម្រោង។ គម្រោងនេះ មានទិសដៅ៖ ១. កែលម្អ និងលើកកម្ពស់គុណភាពនៃការអប់រំបណ្តុះបណ្តាលបច្ចេកទេស និងវិជ្ជាជីវៈកម្រិតក្រោយមធ្យមសិក្សា។ ២. លើកកម្ពស់ការសិក្សាផង និងធ្វើការផង តាមបណ្តាឧស្សាហកម្មនានា និងទី៣. ពង្រឹងយន្តការគ្រប់គ្រងហិរញ្ញវត្ថុរបស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ឱ្យប្រកបដោយនវានុវត្តន៍៕

អត្ថបទ និងរូបថត៖ ក្រសួងសេដ្ឋកិច្ច និងហិរញ្ញវត្ថុ