ជំនួសឲ្យការលេងទូរសព្ទឬប្រដាប់ប្រដាផ្សេងៗ ម្តាយឪពុកគួរបណ្តុះភាពរីកច្រើនរបស់កូន តាមរយៈបទពិសោធល្អៗ

2020-01-20 07:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជាទូទៅចំណង់ចំណូលចិត្តរបស់ក្មេងៗមិនខុសពីគ្នាប៉ុន្មានទេ។ អាស្រ័យលើអាណាព្យាបាលជាធំ ដរាបណាអ្នកបណ្តោយឲ្យពួកគេធ្វើរឿងអ្វីមួយញឹកញាប់ យូរៗទៅវានឹងក្លាយជាទម្លាប់ ដែលកូនៗត្រូវតែទាមទារចង់បាន។ ហេតុនេះហើយ ក្រៅពីទម្លាប់ឲ្យកូនលេងទូរសព្ទឬប្រដាប់ប្រដាផ្សេងៗ ម្តាយឪពុកគួរផ្តល់បទពិសោធល្អៗជាច្រើន ដែលអាចជួយបណ្តុះគំនិតឲ្យកូនកាន់តែវៃឆ្លាត រីកចម្រើននិងល្អប្រសើរ។

១. នាំកូនទៅលេងសួនសត្វ ដើម្បីផ្សារភ្ជាប់ពួកគេទៅនឹងធម្មជាតិ និងមានក្តីអាណិតស្រលាញ់ចំពោះសត្វ។

២. នាំកូនទៅមើលរឿងកុនគំនូរជីវចលបែបអប់រំល្អៗ។

៣. ទិញសំបុត្រយន្តហោះ ដើរលេងក្រៅប្រទេស ឬទៅលេងសាច់ញាតិជាដើម។

៤. បង្កើនចំណូលចិត្តផ្នែកអាន ព្យាយាមឲ្យកូនបញ្ចប់និងជ្រើសរើសសៀវភៅថ្មីៗជាបន្តបន្ទាប់។

៥. បង្រៀនឲ្យកូនចេះហែលទឹក។

៦. ឲ្យកូនចូលរៀនថ្នាក់ចម្អិនម្ហូបសម្រាប់កុមារ។

៧. ជិះរថភ្លើងទៅកន្លែងណាមួយដែលពុំធ្លាប់ទៅពីមុនមក។

៨. បង្រៀនឲ្យកូនចេះដាំដំណាំនិងថែទាំសួនផ្ការ។

៩. ឲ្យកូនរៀនពីឧបករណ៍តន្រ្តី ដើម្បីបង្កើនប្រាជ្ញានិងការចងចាំ។

១០. បង្ហាត់ឲ្យកូនហ៊ានប្រឈម ចេះស្វែងរកដំណោះស្រាយ ដោយការលេងល្បែងផ្សងព្រេងដូចជាតោងឡើងជញ្ជាំងជាដើម។

១១. បង្រៀនឲ្យកូនមានទឹកចិត្តសប្បុរស ចេះចែករំលែកអាណិតអាសូរដល់អ្នកក្រខ្សត់។

១២. ទិញកាដូលើកទឹកចិត្ត ធ្វើឲ្យពួកគេភ្ញាក់ផ្អើលនិងសប្បាយរីករាយ។

១៣. ឲ្យកូនរៀនគូររូប ផាត់ពណ៌ ឬចូលរៀនថ្នាក់គូរគំនូរ។

១៤. បង្ហាត់បង្រៀនឲ្យកូនមានភាពក្លាហានរួសរាយរាក់ទាក់ ដោយការអនុញ្ញាតឲ្យពួកគេលេងជាមួយក្មេងដទៃ ដើរលេងនៅខាងក្រៅ បង្កើតការសន្ទនា និងធ្វើអ្វីផ្សេងទៀតដោយខ្លួនឯង។

១៥. មានដំណើរកម្សាន្តទៅតាមទីរួមខេត្តឬជនបទ ដើម្បីបង្ហាញពីទិដ្ឋភាពថ្មីៗ និងជីវភាពខុសប្លែកគ្នា ឲ្យកូនបានដឹង៕