ភរិយាលោកគួច ចំរើន ចូលរួមសម្ដែងរបាំព្រះរាជទ្រព្យ ដើម្បីគោលបំណងធំ២
- 2020-01-21 07:45:07
- ចំនួនមតិ 0 | ចំនួនចែករំលែក 0
ភរិយាលោកគួច ចំរើន ចូលរួមសម្ដែងរបាំព្រះរាជទ្រព្យ ដើម្បីគោលបំណងធំ២
ចន្លោះមិនឃើញ
លោកស្រី អ៊ូ ធីតាពៅ ភរិយាលោក គួច ចំរេីន អភិបាលខេត្ត ព្រះសីហនុ នឹងចូលរួមសម្ដែងល្ខោនព្រះរាជទ្រព្យ រឿង "ព្រះអនុរុទ្ធនាងឱស្សា" ជាសាធារណៈ នៅថ្ងៃទី២៧ ដល់ ២៩ ខែមីនា នៅសាលមហោស្រពចតុមុខ រាជធានីភ្នំពេញ។
លោកស្រីបានបញ្ជាក់ថា បច្ចុប្បន្នលោកស្រីកំពុងប្រឹងប្រែងហ្វឹកហាត់យ៉ាងខ្លាំង ដើម្បីសាងប្រវត្តិសាស្រ្ដថ្មីមួយ ក្រោយសម្តេចសម្តេចព្រះរាម នរោត្តមបុប្ផាទេវី យាងសោយទិវង្គត។
ភរិយាអភិបាលខេត្តព្រះសីហនុ បានបន្ថែមថា ទោះរវល់យ៉ាងណា លោកស្រីបានហ្វឹកហាត់ចំនួន ៦ដងរួចមកហើយ និងបន្តហ្វឹកហាត់ រហូតចេះចាំស្ទាត់ នៅមុនការសម្ដែងមកដល់។
លោកស្រីបានបញ្ជាក់ថា កម្មវិធីនេះ ត្រូវបានរៀបចំឡើង ក្នុងគោលបំណងធំៗចំនួន ២ គឺទី១ ដើម្បីលើកស្ទួយវប្បធម៌ខ្មែរ ផ្នែកសិល្បៈបូរាណ និងទី២ ដើម្បីរកថវិកា ជូនអ្នករបាំបុរាណក្រីក្រ ជូនសាលារបាំបុរាណ និងជួយដល់នាយកដ្ឋានសិល្បៈបុរាណ។
លោកស្រី អ៊ូ ធីតាពៅ បានបន្ថែមថា លោកស្រីនឹងសម្ដែងហោមរោង នៅថ្ងៃបើកឆាកតែមួយថ្ងៃគត់ គឺថ្ងៃទី២៧ ខែមីនា។ ចំណែកថ្ងៃទី២៨ និង២៩ សំបុត្រនឹងមានដាក់លក់ នាពេលឆាប់ៗខាងមុខ។ លោកស្រីក៏បានឲ្យដឹងដែរថា លោកស្រីនឹងរាំរបាំព្រះរាជទ្រព្យម្ដងទៀត នៅបុណ្យសមុទ្រចុងឆ្នាំ២០២០ នេះ។
ជាចុងក្រោយ លោកស្រី បានថ្លែងអំណរគុណសម្រាប់ការគាំទ្រ និងទឹកចិត្តស្រលាញ់វប្បធម៌ខ្មែរ។ លោកស្រី ក៏សូមសំណូមពរ បងប្អូនប្រជាពលរដ្ឋខ្មែរ ជួយជ្រមជ្រែងលើកស្ទួយវប្បធម៌ខ្មែរ ថែរក្សាវប្បធម៌ដ៏ផូរផង់របស់ដូនតាខ្មែរ និងស្នើរដល់សប្បុរសជនទាំងឡាយ ជួយកម្មវិធីនេះ ដើម្បីបានទុនបណ្តុះបណ្តាលក្មេងជំនាន់ក្រោយ ឲ្យស្រលាញ់ចូលរួមថែរក្សាវប្បធម៌ខ្មែរមរតកដូនតាខ្មែរយើង៕