អារ៉ាប៊ីសាអូឌីត ស្នើឲ្យរយកម្ពុជាបង្កើតអនុស្សរណៈនៃការយោគយល់គ្នា

2020-02-19 02:40:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Saud F.M. Al Suwelim ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រអារ៉ាប៊ីសាអូឌីត ប្រចាំនៅព្រះរាជាណាចក្រកម្ពុជា ស្នើឲ្យមានការបង្កើតនូវអនុស្សរណៈ នៃការយោគយល់គ្នា ក្នុងការបង្កើតកិច្ចសហប្រតិបត្តិការរវាងក្រសួងមហាផ្ទៃ នៃប្រទេសទាំងពីរ។ ការលើកឡើងនេះធ្វើឡើងក្នុងជំនួបសម្ដែងគួរសម និងពិភាក្សាកាងារជាមួយ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១៨ ខែកុម្ភៈ ឆ្នាំ២០២០ នៅទីស្តីការក្រសួងមហាផ្ទៃ។

លោក Saud F.M. Al Suwelim បានបន្ថែមថាលោកត្រៀមខ្លួនជានិច្ចក្នុងការពិភាក្សាធ្វើការជាមួយភាគីកម្ពុជាក្នុងការពិនិត្យលទ្ធភាពក្នុងការបង្កើតកិច្ចសហប្រតិបត្តិការលើវិស័យផ្សេងៗ ក្នុងនោះក៏មានវិស័យសន្តិសុខ ដែលស្ថិតនៅក្រោមការគ្រប់គ្រងដឹកនាំរបស់ក្រសួងមហាផ្ទៃផងដែរ។ បើទោះបីប្រទេសទាំងពីរមកដល់ពេលនេះ មិនទាន់មានកិច្ចសហប្រតិបត្តិការលើវិស័យជាច្រើនក៏ពិតមែន ក៏ប៉ុន្តែសង្ឃឹមថា នៅក្នុងពេលវេលាអនាគតខាងមុខ ប្រទេសទាំងពីរនិងរកឃើញវិស័យកិច្ចសហប្រតិបត្តិការជាច្រើន ដើម្បីបម្រើដល់ផលប្រយោជន៍សង្គមជាតិទៅវិញទៅមកនៃប្រទេសទាំងពីរ។

ជាការឆ្លើយតបសម្តេចក្រឡាហោម ស ខេង បានថ្លែងអំណរគុណចំពោះបំណងដ៏ល្អរបស់ឯកអគ្គរាជទូតអារ៉ាប៊ីសាអូឌីត ក៏ដូចជារាជរដ្ឋាភិបាលអារ៉ាប៊ីសាអូឌីត ក្នុងការបង្កើតឲ្យមាននៅកិច្ចសហប្រតិបត្តិការកាន់តែច្រើនថែមទៀតរវាងប្រទេសទាំងពីរ ជាពិសេសជាមួយក្រសួងមហាផ្ទៃផ្ទាល់តែម្តង ដើម្បីបម្រើដល់ផលប្រយោជន៍រួមទៅវិញទៅមករវាងប្រទេស និងប្រជាជន នៃភាគីទាំងពីរ។ ហើយសម្តេចឯកភាពថា ប្រទេសទាំងពីរពិតជាមានឱកាសនិងបង្កើតនៅកិច្ចសហប្រតិបត្តិការឲ្យកាន់តែទូលំទូលាយថែមទៀត ជាពិសេសនៅក្នុងវិស័យសន្តិសុខ ដែលស្ថិតនៅក្រោមក្រសួងមហាផ្ទៃនៃប្រទេសទាំងពីរ។

លោក Saud F.M. Al Suwelim ឯកអគ្គរាជទូតអារ៉ាប៊ីសាអូឌីត បានថ្លែងនូវការអបអរសាទរចំពោះរាជរដ្ឋាភិបាលកម្ពុជាដែលបានផ្ដល់ឱកាសដល់ប្រជាពលរដ្ឋគ្រប់និន្នាការសាសនាទាំងអស់បានគោរពប្រតិបត្តិតាមជំនឿសាសនារៀងៗខ្លួន នេះហើយគឺជាលទ្ធិប្រជាធិបតេយ្យពិតប្រាកដដែលពលរដ្ឋទូទៅចង់បាន។ ហើយលោកសូមកោតសរសើរចំពោះការអភិវឌ្ឍ និងសន្តិភាព ដែលកម្ពុជាទទួលបានរហូតមកដល់បច្ចុប្បន្ន។

លោកបានបន្តថា រាជរដ្ឋាភិបាលអារ៉ាប៊ីសាអូឌីត គឺមានការប្រឆាំងដាច់ខាតទៅនិងរាល់អំពើជ្រុលនិយមទាំងឡាយ ដូចជា អំពើភេរវកម្មជាដើម។ ហើយរាជរដ្ឋាភិបាលអារ៉ាប៊ីសាអូឌីតក៏បានជួយជ្រោមជ្រែងក្នុងកិច្ចការប្រឆាំងអំពើជ្រុលនិយមនិងអំពើភរវកម្មនេះផងដែរ រហូតដល់មាការគាំទ្រពីអង្គការសហប្រជាជាតិផងដែរ៕

អត្ថបទ៖ កុសល