លោក ហ៊ុន ម៉ាណែត៖ ទោះគ្មាន EBA ក៏កម្ពុជានៅតែអាចបន្តអភិវឌ្ឍទៅមុខបាន

  • 2020-03-01 07:29:54
  • ចំនួនមតិ 0 | ចំនួនចែករំលែក 0

ចន្លោះមិនឃើញ


លោក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោកបានថ្លែងថា ឆ្លងតាមសភាពការណ៍ជាក់ស្តែងកន្លងមករបស់កម្ពុជា ទោះ​គ្មាន EBA ក៏កម្ពុជា​នៅ​តែ​អាច​បន្តអភិវឌ្ឍទៅមុខបាន ព្រោះកម្ពុជាទទួលការលត់ដំរឹងមាំណាស់ ដោយធ្លាប់ហែលឆ្លង​កាត់​រួច​មក​ហើយនូវរបបវាលពិឃាតប៉ុលពត, ធ្លាប់ទទួលរងការហ៊ុព័ទ្ធសេដ្ឋកិច្ចក្នុងទសវត្សរ៍ឆ្នាំ៨០ ក៏ដូច​ជា​សង្គ្រាមស៊ីវិលដ៏រ៉ាំរ៉ៃ។ ដូច្នេះ សូមបងប្អូនប្រជាពលរដ្ឋកុំមានការព្រួយបារម្ភ លង់ជឿការ​ឃោសនា​បំប៉ោងសភាពការណ៍របស់អ្នកនយោបាយអគតិទាំងនោះ។ ការថ្លែងបែប​នេះ​នៅ​ក្នុង​ពិធី​សម្ពោធ​ឆ្លងមហាកុដិខ្លោងទ្វា និងសមិទ្ធផលនានា ក្នុងវត្តព្រៃរំដួល ស្ថិតនៅឃុំប្រសូត្រ ស្រុកស្វាយទាប ខេត្ត​ស្វាយរៀង កាលពីថ្ងៃទី២៩ ខែកុម្ភៈ ឆ្នាំ២០២០។

លោក ហ៊ុន ម៉ាណែត បានបន្តទៀតថា សមិទ្ធផលការងារជាក់ស្តែងកន្លងមករបស់រាជរដ្ឋាភិបាល គឺការបង្កើតឱកាស និងការធានានិរន្តរភាពនៃឱកាសរយៈពេលវែងលើមូលដ្ឋាននៃសន្តិភាព និងការអភិវឌ្ឍ ក្នុងនោះសំខាន់ គឺការបង្កើតការងារ និងតម្លើងប្រាក់បៀវត្សរ៍ជូនកម្មករនិយោជិត តាមរយៈការទាក់ទាញវិនិយោគទាំងក្នុង និងក្រៅស្រុក ក៏ដូចជាការខំប្រឹងប្រែងអនុវត្តច្បាប់លើកកម្ពស់សិទ្ធិកម្មករនិយោ​ជិត​បានល្អ រហូតទទួលបានការអនុគ្រោះពន្ធ EBA របស់សហគមន៍អឺរ៉ុប។

លោកបញ្ជាក់ថា “ចំពោះបញ្ហា EBA ដែលជាបញ្ហាកំពុងមានការចាប់អារម្មណ៍ខ្លាំងនៅពេលនេះ គឺវាគ្រាន់តែជាការព្យួរការអនុគ្រោះពន្ធមួយផ្នែកប៉ុណ្ណោះ មិនមែនជាការបិទទីផ្សារនោះទេ។ យើង​នៅ​អាច​តែ​នាំចេញបាន ដោយភាគច្រើននៅបន្តរួចពន្ធ ហើយមួយផ្នែកតូចត្រូវបង់ពន្ធវិញ ដូច្នេះរោង​ចក្រ​នៅ​តែបន្តដំណើរការ ប្រជាពលរដ្ឋនៅតែមានការងារធ្វើ គ្មានការព្រួយបារម្ភឡើយ។

លោកបាន​បន្ថែមថាទន្ទឹមនឹងនេះ រាជរដ្ឋាភិបាលបានយកចិត្តទុកដាក់ចាត់វិធានការណ៍ផ្សេងៗ ដើម្បីឱ្យពង្រឹងភាព​ប្រជែង​ប្រកួតប្រជែងរបស់កម្ពុជា ឱ្យកាន់តែរឹងមាំជាងមុន។ ថ្មីៗនេះ សម្តេចតេជោនាយករដ្ឋមន្ត្រី បាន​ប្រកាសហើយថា រាជរដ្ឋាភិបាលបានត្រៀមលក្ខណៈ ដើម្បីការពារថែទាំកូនចៅប្រជាពលរដ្ឋយើង ហើយនឹងបន្តបង្កើត និងបង្កើនការងារបន្ថែមរហូតទៀត”៕

អត្ថបទ៖ កុសល

អត្ថបទថ្មី
;