កីឡាករ​​​ធ្លាប់​លើក​ពាន Premier League តែ​ជាប់​ស្ថិតិ​លេង​​អន់​បំផុត​​ទាំង​ ១០

  • 2020-04-01 00:30:19
  • ចំនួនមតិ 0 | ចំនួនចែករំលែក 0

ចន្លោះមិនឃើញ


គិត​ត្រឹម ១ ទសវត្សន៍​ចុងក្រោយ កីឡាករ​ធ្លាប់​លើក​ពាន Premier League សុទ្ធ​តែ​លេច​ធ្លោ មាន​ស្ថិតិផ្សេងៗ​គ្នាតាម​តំណែង​លេង​របស់​ពួកគេ មាន​ដូចជា ​បោះ​ឲ្យ​មិត្ត​រួម​ក្រុមបាន​ច្រើន​បំផុត និង​ស៊ុត​បញ្ចូល​ទីបាន​ច្រើន​បំផុត​ជាដើម​។

ទោះជា​យ៉ាងនេះក៏​មាន​ដែរ​ កីឡាករ​ ១០ រូបតាម​រដូវកាល​និមួយៗបង្ហាញ​ទម្រង់លេងមិន​ល្អ ឬ​មិន​សូវ​បាន​លេងតែ​ម្តង​ តែ​មាន​ឈ្មោះ​នៅ​ក្នុង​ក្រុម​លើក​ពាន​ លីគ​ ដ៏​មាន​ប្រជាប្រិយភាព​មួយ​នេះ រហូត​ដល់​ជាប់​ក្នុង​​ ស្ថិតិកីឡាករអន់​បំផុត ដែល​ស្រង់​ចេញពី​សារព័ត៌មានអង់គ្លេស The Mirror ។

-រដូវកាល ២០០៩-២០១០ កីឡាករ Yuri Zhirkov លេង​ឲ្យ Chelsea

ក្លឹប Chelsea អាច​ឈ្នះ​លើកពានលីគជាលើក​ទី ៣ ។ ជាពិសេស​ក្រោម​ការ​ដឹក​នាំ​របស់​លោក Carlo Ancelotti រដូវកាល ២០០៩-២០១០ មានកីឡាករល្អៗជាច្រើន តែ​មាន​ខ្សែ​ការពារ​​ស្លាប​ឆ្វេងសញ្ជាតិរុស្ស៊ី Yuri Zhirkov លេង​បានតែ ១៧ ប្រកួត​គត់ ពេញ​មួយ​រដូវកាល។ ចំពោះ​មូលហេតុ​ អាច​មក​ពីអ្នក​ជំនួសរូបគេគឺ Ashley Cole បញ្ចេញ​សមត្ថភាព​ត្រូវ​ចិត្ត អ្នក​ចាត់ការ​ ។

-រដូវកាល ២០១០-២០១១ កីឡាករ Darron Gibson លេង​ឲ្យ Manchester United

ក្រោម​ការ​ដឹក​នាំ​របស់​លោក ‎Sir Alex Ferguson ក្លឹប Manchester United លើកពានលីគរដូវកាល ២០១០-២០១១ ដោយ​មាន​ជម្រើស​កីឡាករ​សុទ្ធតែ​កំពូលៗតួយ៉ាងដូចជា Wayne Rooney, Ryan Giggs និង Paul Scholes ប៉ុន្តែ​កីឡាករខ្សែបម្រើ​សញ្ជាតិ​អ៊ីស្លង់ Darron Gibson ដែល​មាន​ឈ្មោះ​ដែរ​នោះ ទៅ​ជា​មិនសូវ​បាន​លេង​វិញ។ ពេញ​មួយ​រដូវកាល លេង​បានតែ ១២ ប្រកួត​គត់(ប្តូរចេញពី​កៅអីបម្រុង ៦ ដង)។

-រដូវកាល ២០១១-២០១២ កីឡាករ Stefan Savic លេង​ឲ្យ Manchester City

ក្រោម​ការ​ដឹក​នាំ​របស់​លោក ‎Roberto Mancini ក្លឹប Manchester City លើកពានលីគរដូវកាល ២០១១-២០១២ ជាលើក​ដំបូង​បំផុត។ ប៉ុន្តែ​ក្នុង​ជម្រើស​កីឡាករ​ទាំងអស់ មានខ្សែការពារសញ្ជាតិ​បម៉ុងតេណេក្រូ Stefan Savic បង្ហាញ​ទម្រង់លេងមិន​ល្អ ជាប់ក្នុង ស្ថិតិ​កីឡាករ​អន់​បំផុតនៅ PL ។

-រដូវកាល ២០១២-២០១៣ កីឡាករ Alexander Büttner លេង​ឲ្យ Manchester United

ក្រោម​ការ​ដឹក​នាំ​របស់​លោក ‎Sir Alex Ferguson ដដែលក្លឹប Manchester United លើកពានលីគរដូវកាល ២០១២-២០១៣ ជាលើក​ចុងក្រោយ​បង្អស់ ហើយ​ក៏​ក្លាយ​ជា​ក្លឹប​ជោគជ័​យ​ជាងគេ​ឈ្នះ​ពាន​លីគ ១៣ ដង​​។ ចំណែក​កីឡាករដែល​មិន​សូវ​បាន​លេងគឺ ខ្សែការពារសញ្ជាតិហូឡង់​ បង្ហាញខ្លួនបានតែ ៥ ប្រកួតគត់ នៅ​រដូវកាល​នោះ​។

-រដូវកាល ២០១៣-២០១៤ កីឡាករ Costel Pantilimon លេង​ឲ្យ Manchester City

ក្រោម​ការ​ដឹក​នាំ​របស់​លោក ‎Manuel Pellegrini ក្លឹប Manchester City លើកពានលីគរដូវកាល ២០១៣-២០១៤ ជាលើក​ទី ២។ ប៉ុន្តែ​អ្នកចាំទីសញ្ជាតិរ៉ូម៉ានី Costel Pantilimon ចូលលេងបានតែ ៧ ប្រកួតគត់ ពេញមួយរដូវកាល។

-រដូវកាល ២០១៤-២០១៥ កីឡាករ Filipe Luis លេង​ឲ្យ Chelsea

ក្រោម​ការ​ដឹក​នាំ​របស់​លោក ‎José Mourinho ក្លឹប Chelsea លើកពានលីគរដូវកាល ២០១៣-២០១៤ ជាលើក​ទី ៤ ។ ខ្សែការពារ​សញ្ជាតិប្រេស៊ីល Filipe Luis ត្រូវ​បាន​រំពឹង​ថា នឹង​បង្ហាញទម្រង់​លេង​ល្អ ប៉ុន្តែ​ពេញមួយ​រដូវកាល រូបគេចូលលេងបានតែ ៩ ប្រកួតប៉ុណ្ណោះ។ រូបគេលេងបាន ១ ឆ្នាំ​ត្រូវបាន​ផ្ទេរ​ទៅ Atletico Madrid ជំនួស​វិញ​ដោយ​ប្រធានក្រុមសព្វថ្ងៃគឺ Cesar Azpilicueta ។ យ៉ាងណាមកទល់ពេលនេះ រូបគេជា ជញ្ជាំងដ៏រឹងមាំមួយ​របស់ក្រុម AT ។

-រដូវកាល ២០១៥-២០១៦ កីឡាករ Gokhan Inler លេង​ឲ្យ Leicester City

ក្រោម​ការ​ដឹក​នាំ​របស់​លោក Claudio Ranieri ក្លឹប Leicester City លើកពានលីគរដូវកាល ២០១៥-២០១៦ ជាលើក​ដំបូង​បំផុត​ក្នុងប្រវត្តិសាស្រ្តក្លឹប។ ចំណែក​ខ្សែការពារសញ្ជាតិស្វីស Gokhan Inler មក​លេង​តែ ១ រដូវកាល អាច​លើកពាន ប៉ុន្តែ​រូបគេ​ចូលលេងបាន ៥ ប្រកួតគត់ ហើយចប់​រដូវកាលដ៏​ប្តូរចេញទៅក្លឹបតួគី Besiktas ។

-រដូវកាល ២០១៦-២០១៧ កីឡាករ Nathaniel Chalobah លេង​ឲ្យ Chelsea

ក្រោម​ការ​ដឹក​នាំ​របស់​លោក Antonio Conte ក្លឹប Chelsea លើកពានលីគរដូវកាល ២០១៦-២០១៧ ជាលើកទី ៥ ក្នុងប្រវត្តិសាស្រ្តក្លឹប។ ចំណែក​ខ្សែ​បម្រើសញ្ជាតិ​អង់គ្លេស Chalobah ចូលលេងបានតែ ១០ ប្រកួតគត់។

-រដូវកាល ២០១៧-២០១៨ កីឡាករ Eliaquim Mangala លេង​ឲ្យ Manchester City

ក្រោម​ការ​ដឹក​នាំ​របស់​លោក Pep Guardiola ក្លឹប Manchester City លើកពានលីគរដូវកាល ២០១៧-២០១៨ ជាមួយនឹងពិន្ទុ ១០០ ពេញ(ដំបូងបំផុត)។ ចំណែកខ្សែការពារកណ្ដាល Mangala ដែលទិញមក ៣២ លានផោន មិន​បានជួយអ្វីច្រើនទេ រូបគេលេងបានតែ​ ៩ ប្រកួតគត់។

-រដូវកាល ២០១៨-២០១៩ កីឡាករ Danilo លេង​ឲ្យ Manchester City

ក្រោម​ការ​ដឹក​នាំ​របស់​លោក Pep Guardiola ក្លឹប Manchester City លើកពានលីគរដូវកាល ២០១៨-២០១៩ ចំនូន ២ ដងជាប់ៗគ្នាជាមួយនឹងពិន្ទុលើសក្រុមគូប្រជែង Liverpool តែ ១ ពិន្ទុប៉ុណ្ណោះ។ ចំណែកខ្សែការពារ​សញ្ជាតិប្រេស៊ីល Danilo ដែល Pep ចាយលុយយកពី Real Madrid ក្នុងតម្លៃ ៥០លានផោន ត្រូវបាន​គេរំពឹងខ្ពស់ថា នឹងធ្វើបានល្អ​ តែ​ទៅជា​ផ្ទូយ​ទៅវិញ។

យ៉ាងណាមិញខាងលើនេះ គ្រាន់តែជាទស្សនះប៉ុណ្ណោះ បើអ្នកគិតថា កីឡាករណាផ្សេងដែលមានស្ថិតិយ៉ាប់ជាងនេះ អាច cmt បាន៕

ប្រភព៖ Mirror.UK ប្រែ​សម្រួល៖ រក្សា

អត្ថបទថ្មី
;