លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តី​ក្រសួងរៀបចំដែនដី នគរូបនីយកម្ម និង​សំណង់ បាន​អញ្ជើញ​ចុះ​ប្រគល់​លំនៅឋាន​សមរម្យ​ដែល​អភិវឌ្ឍ​ដោយក្រុមហ៊ុន Worldbridge Homes Co., Ltd ចំនួន ៦៨០ខ្នងផ្ទះ លើ​គម្រោង​សរុប ២៤៥៧ខ្នងផ្ទះ ជូន​ប្រជាពលរដ្ឋ ស្ថិតនៅភូមិ​កោះគរ សង្កាត់​រកាខ្ពស់ ក្រុងតាខ្មៅ ខេត្តកណ្តាល នាព្រឹកថ្ងៃទី៩ ខែមេសា ឆ្នាំ​២០២០។

សូមជម្រាបថា គម្រោងនេះ ត្រូវបាន​សាងសង់​លើ​ផ្ទៃដី​សរុប​ប្រមាណ ២៣ហិកតា មានចំនួន ២៤៥៧ផ្ទះ មាន​ទុន​វិនិយោគ​ប្រមាណ ៧៣​លានដុល្លារអាមេរិក។ គម្រោង​នេះ ស្ថិតក្នុងចំណោមគម្រោង​ទាំង៥ ដែលបាន​នឹងកំពុង​អនុវត្តនៅកម្ពុជា ក្នុងនោះ រាជធានី​ភ្នំពេញ ២គម្រោង ខេត្តកណ្តាល ២គម្រោង និង​ខេត្តបន្ទាយមានជ័យ ១គម្រោង។ លំនៅឋានសាងសង់សរុបប្រមាណ ៨៣៣១ខ្នង និង ៧២៥៦ចំណែកឯកជន ដោយ​លក់​ក្នុង​តម្លៃ​ក្រោម ៣ម៉ឺនដុល្លារ។

គម្រោង​អភិវឌ្ឍ​លំនៅឋាន​តម្លៃសមរម្យ​របស់​ក្រុមហ៊ុននេះ បាន​សម្រួល​លក្ខខណ្ឌ​នៃការ​បង់​ប្រាក់​កក់ ដោយ​អតិថិជន​អាចបង់ ១០% នៃ​តម្លៃផ្ទះ​ក្នុង​រយៈពេល ១២ខែ​ដំបូង ឬ បង់ ២០% ទៅ ៣០% ក្នុង​រយៈពេល ២៤ខែ ដោយមិនមានការប្រាក់ ហើយ​ទឹកប្រាក់​ដែលនៅសល់​អតិថិជន​ត្រូវបង់​រំលស់​បន្ត​ជាមួយ​ធនាគារ​ជាដៃគូ​ក្នុងរយៈពេល​រហូតដល់ ២០ឆ្នាំ ឬ​អាច​បង់ផ្តាច់​ជាមួយក្រុមហ៊ុន៕