រឿង១ដែលលោក Bill Gates រៀបចំទុករាប់ឆ្នាំមុនមកម៉្លេះសម្រាប់ជំងឺរាតត្បាត

2020-04-20 00:13:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្លែងនៅក្នុងបទសម្ភាសន៍មួយជាមួយសារព័ត៌មាន BBC នាពេលកន្លងទៅ លោកស្រី Melinda Gates បានឲ្យដឹងថា លោកស្រី និងស្វាមីគឺលោក Bill Gates បានត្រៀមទុកស្បៀងអាហារនៅក្នុងបន្ទប់ក្រោមដី អស់រយៈពេលជាច្រើនឆ្នាំមកហើយ សម្រាប់ប្រើប្រាស់អំឡុងពេលជំងឺរាតត្បាតដែលកើតឡើងដោយប្រការណាមួយ។

លោកស្រី Melinda និងលោក Bill Gates

ភរិយាមហាសេដ្ឋីដ៏ល្បីរូបនេះ បាននិយាយថា៖ "ច្រើនឆ្នាំកន្លងទៅ យើងធ្លាប់ជជែកគ្នាអំពីភាពដែលអាចទៅរួចនៅពេលដែលគ្មានទឹកស្អាតគ្រប់គ្រាន់ ហើយគ្មានអាហារគ្រប់គ្រាន់។ តើយើងនឹងអាចទៅណាបាន? តើយើងអាចធ្វើអ្វីបានជាលក្ខណៈគ្រួសារ? ដូច្នេះហើយខ្ញុំគិតថា ពួកយើងគួររៀបចំរឿងទាំងនោះសម្រាប់ខ្លួនយើង"។ លោកស្រី បានបន្តថា គ្រួសារលោកស្រីពិតជាមានសំណាងណាស់ ដែលចេះគិតគូររឿងទុកអាហារជាមុន ខណៈដែលពិភពលោកនាពេលបច្ចុប្បន្នកំពុងជួបប្រទះនឹងជំងឺឆ្លងកូវីដ១៩។

យ៉ាងណាមិញ លោកស្រី Melinda Gates ក៏បានរៀបរាប់ដែរថា រឿងម្យ៉ាងដែលលោកស្រី និងក្រុមគ្រួសារមិនបានត្រៀមទុកមុននោះគឺវ៉ាក់សាំង និងថ្នាំព្យាបាលវីរុសកាចសាហាវ។

សូមរំលឹកថា សារព័ត៌មាន Business Insider ធ្លាប់ចុះផ្សាយថា លោក Bill Gates បានព្រមានរឿងជំងឺឆ្លងជាច្រើនឆ្នាំមុនមកហើយ។ មានម្ដងនៅក្នុងកម្មវិធី TED Talk ឆ្នាំ២០១៥ លោកថា ពិភពលោកមិនទាន់ត្រៀមខ្លួនសម្រាប់ជំងឺរាតត្បាតបន្ទាប់នោះទេ។ លុះ២ឆ្នាំក្រោយនៅក្នុងកិច្ចសម្ភាសន៍ជាមួយ Business Insider មហាសេដ្ឋីដែលមានទ្រព្យសម្បត្តិប្រមាណ ១០០ពាន់លានដុល្លាររូបនេះ បានលើកឡើងម្ដងទៀតអំពីជំងឺរាតត្បាតថា វានឹងអាចកាចសាហាវណាស់ ហើយជាប្រភេទជំងឺផ្ដាសាយ។

គួរបញ្ជាក់ថា កាលពីពាក់កណ្ដាលខែមេសា ឆ្នាំ២០២០ មូលនិធិសប្បុរសធម៌ Bill និង Melinda Gates បានឧបត្ថម្ភប្រាក់សរុបចំនួន ២៥០លានដុល្លារហើយ សម្រាប់ជួយដល់ការផ្គត់ផ្គង់បរិក្ខារពេទ្យ ក៏ដូចជាបណ្ដាអ្នកវិទ្យាសាស្ត្រ ក្នុងការទប់ស្កាត់ជំងឺឆ្លងកូវីដ១៩ ដែលកំពុងញាំញីពិភពលោក៕

ប្រភព៖ Yahoo ប្រែសម្រួល៖ ឈាង.