EU យល់ព្រមបង្វែរជំនួយជាង ៦០លានដុល្លារ យកមកជួយការងារបន្ទាន់របស់រាជរដ្ឋាភិបាលកម្ពុជា

2020-04-21 08:32:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហភាពអឺរ៉ុប ទើបតែបានអនុម័តអនុញ្ញាតឱ្យបង្វែរហិរញ្ញប្បទានឥតសំណងសរុបចំនួន ៥៦លានអឺរ៉ូ (ជាង ៦០,៦៨លានដុល្លារ) ពីកម្មវិធីកំពុងដំណើរការមួយចំនួនដែលហិរញ្ញប្បទានដោយសហភាពអឺរ៉ុប សម្រាប់យកមកហិរញ្ញប្បទានលើវិស័យគាំពារសង្គមដែលជាការងារអាទិភាព និងបន្ទាន់របស់រាជរដ្ឋាភិបាលកម្ពុជា ក្នុងការស្តារសម្បទាសេដ្ឋកិច្ច-សង្គមឡើងវិញពីវិបត្តិជំងឺកូវីដ១៩។

ការបញ្ជាក់ខាងលើនេះ ធ្វើឡើងដោយលោកស្រី Carmen Moreno ឯអគ្គរដ្ឋទូតនៃសហភាពអឺរ៉ុបប្រចាំកម្ពុជា ក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ តាមរយៈ Video Conference កាលពីព្រឹកថ្ងៃទី២០ ខែមេសា ឆ្នាំ២០២០។

រូបថត៖ ក្រសួងសេដ្ឋកិច្ច និងហិរញ្ញវត្ថុ

ក្នុងជំនួបនេះ លោក ឧបនាយករដ្ឋមន្រ្តីបានថ្លែងថា ក្នុងការអនុវត្តវិធានការស្តារសេដ្ឋកិច្ច-សង្គមពីផលប៉ះពាល់នៃជំងឺកូវីដ១៩ រាជរដ្ឋាភិបាលកម្ពុជា បានបង្កើតក្រុមការងារចំនួន ០៤រួមមាន៖

១. ក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្រ្តក្នុងអំឡុងពេលប្រយុទ្ធនឹងជំងឺកូវីដ១៩។

២. ក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គមក្នុងអំឡុងពេលប្រយុទ្ធនឹងជំងឺកូវីដ១៩។

៣. ក្រុមការងារចំពោះកិច្ចរៀបចំគោលនយោបាយថវិកា ហិរញ្ញប្បទាន និងជំនួយសង្គមដើម្បីគ្រប់គ្រងការប្រយុទ្ធនឹងជំងឺកូវីដ១៩

៤. ក្រុមការងារបច្ចេកទេសចម្រុះចំពោះកិច្ចសិក្សារៀបចំដាក់ចេញនូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និងដោះស្រាយផលប៉ះពាល់ពីការរីករាលដាលនៃជំងឺកូវីដ១៩ និងការ ព្យួរ EBA លើមុខទំនិញមួយចំនួនផងដែរ៕