ម៉េចបាន ដួង ម៉ានិច ហ៊ានហៅ ទេព រិនដារ៉ូ ថាលោកប្ដីពេញៗមាត់?

  • 2020-04-28 02:35:11
  • ចំនួនមតិ 0 | ចំនួនចែករំលែក 0

ចន្លោះមិនឃើញ


កញ្ញា ដួង ម៉ានិច បាន​ហៅ​តារា​សម្ដែង​ជើង​ចាស់​ លោក ទេព រិនដារ៉ូ ថា​លោក​ប្ដី​ពេញ​ៗ​មាត់ ដែល​ធ្វើ​ឲ្យ​ប្រិយមិត្ត​ខ្លះ​ងឿងឆ្ងល់​ ​ថា​តើ​នេះ​គឺ​ជាពាក្យ​ស្នេហាពិត​ក្រៅ​ឆាក​របស់​តារា​សម្ដែង​ទាំង​ពីរ ឬ​យ៉ាង​ណា?

ក្នុង​ថ្ងៃ​ខួប​កំណើត​របស់​លោក ទេព រិនដារ៉ូ កាល​ពី​ថ្ងៃ​ទី២៤ ខែ​មេសា ឆ្នាំ​២០២០ កញ្ញា ដួង ម៉ានិច ក៏​បាន​​បង្ហោះ​សារ​ជូន​ពរ​លោក ទេព រិនដារ៉ូ តាម​ហ្វេសប៊ុក​ផ្ទាល់ខ្លួន​ដោយ​ប្រើ​ពាក្យ​លោក​ប្ដី​នេះ​ដែរ ហើយមាន​ភ្ជាប់​នូវ​រូប​ថត​កៀកកើយ​ចំនួន​បី​សន្លឹក​ទៀត​ផង។

ពាក្យ "លោក​ប្ដី" ដែល​តារា​សម្ដែង​ល្បីឈ្មោះ ដួង ម៉ានិច ប្រើ​ជាមួយ​លោក ទេព រិនដារ៉ូ នៅ​ពេល​នេះ ត្រូវ​បាន​ម្ចាស់​ខ្លួន​បក​ស្រាយ​ថា លោក ទេព រិន​ដារ៉ូ បាន​ក្លាយ​ជា​ប្ដី​របស់​នាង​បី​ដង​រួច​មក​ហើយ ប៉ុន្តែ​ប្ដី-ប្រពន្ធ​នោះ គឺ​នៅ​ក្នុង​រឿង​តែប៉ុណ្ណោះ ហើយ​កញ្ញា​តែងតែឲ្យ​តម្លៃ និង​គោរព​ស្រឡាញ់​លោក​ដូច​បង​ប្រុសក្នុងនាមរៀមច្បងសិល្បៈ។

ដួង ម៉ានិច៖ "ទើប ​៤​ឆ្នាំ​ចុង​ក្រោយ​នេះ ខ្ញុំ​មាន​ឱកាស​បាន​ថត​រឿង​ជាមួយ​បង​រ៉ូ ខ្ញុំ​សប្បាយ​ចិត្ត​ខ្លាំង ព្រោះ​ខ្ញុំ​ទទួល​បាន​បទពិសោធន៍​ថ្មី​ៗ​ពី​គាត់។ គាត់ជាប្ដីខ្ញុំក្នុងរឿងច្រើនហើយ ហើយខ្ញុំក៏ហៅគាត់ថាលោកប្ដីទៅ"។

សូមរំលឹក​ថា តារា​សម្ដែង​ជើង​ចាស់ ទេព រិនដារ៉ូ មាន​វ័យ​ជិត​៦០​ឆ្នាំ​ហើយ រីឯ​កញ្ញា ដួង ម៉ានិច មាន​វ័យ​២៩​ឆ្នាំ។ តារា​សម្ដែង​ដែល​មាន​ភាព​ល្បីល្បាញ​ទាំង​ពីរ​ដួង​នេះ មិន​ទាន់​មើលឃើញដៃគូ​ជីវិត​ពិត​នៅ​ឡើយ​ទេ។

បើ​និយាយ​ទៅ កញ្ញា ដួង ម៉ានិច បាន​សម្ដែង​ជា​តួអង្គ​ឯក​ប្ដី​-ប្រពន្ធ​ជាមួយ​លោក ទេព រិនដារ៉ូ បី​រឿង​ហើយ។ រឿង​ទី១ គឺ​រឿង"ពស់​កេងកង"ក្នុង​ឆ្នាំ​២០១៦ រឿង​ទី២ គឺ​រឿង"ភ្លើង"ក្នុង​ឆ្នាំ​២០១៨ និង​រឿង​ទី៣ ដែល​កញ្ញា ដួង ម៉ានិច មិន​ទាន់​អាច​ប្រាប់​ចំណង​ជើង​បាន​នៅ​ឡើយ​ នឹង​បញ្ចាំង​នៅ​ស្ថានីយ​ទូរទស្សន៍ PNN ក្នុង​ឆ្នាំ​២០២០ នេះ៕

រូបភាព៖ ហ្វេសប៊ុក ដួង ម៉ានិច

អត្ថបទ៖​ ជិន​ សុភ័ក្ដ្រ

;