ថៅកែស្រីល្បីឈ្មោះចេញ Original Song ថ្មីមួយបទ ចាក់ដោតពីរឿងស្នេហាលួចលាក់មួយ
- 2020-05-05 03:08:53
- ចំនួនមតិ 0 | ចំនួនចែករំលែក 0
ថៅកែស្រីល្បីឈ្មោះចេញ Original Song ថ្មីមួយបទ ចាក់ដោតពីរឿងស្នេហាលួចលាក់មួយ
ចន្លោះមិនឃើញ
ស្ត្រីអភិជន ទ្រី ដាណា ដែលគេស្គាល់ថាជាពាណិជ្ជករល្បីឈ្មោះមួយរូប បានចេញ Original Song ថ្មីមួយបទទៀត មានចំណងជើងថា "ចាកចេញ" ដែលមានអត្ថន័យជ្រាលជ្រៅក្នុងរឿងស្នេហាលួចលាក់មួយ។
បទចម្រៀងខាងលើ ទើបបានចេញពីចុងសប្ដាហ៍មុន ដោយបានធ្វើឲ្យប្រិយមិត្តជាច្រើនរំជួលចិត្ត។ បទ "ចាកចេញ" រៀបរាប់ពីស្នេហាលួចលាក់ឈឺចាប់ របស់មនុស្សស្រីម្នាក់ ហើយមិនចង់បន្តទាំងបែបនេះទៀត ថែមទាំងមិនចង់ឲ្យមនុស្សប្រុសដែលលង់ស្រឡាញ់ខ្លួន ធ្លាក់ខ្លួនឈឺចាប់ព្រោះស្នេហាលួចលាក់មួយនេះ ទើបបង្ខំចិត្តបែក ហើយបើកផ្លូវឲ្យបុរសដ៏ល្អទៅរកអនាគតថ្មី ដែលអាចនឹងជួបរឿងត្រចះត្រចង់ជាងនេះ។
បទខាងលើនេះ បាន និងកំពុងចាក់បេះដូងយុវវ័យដែលមានលំនាំរឿងផ្ទាល់ខ្លួនដូចអត្ថន័យនៃបទចម្រៀង។ ដូច្នេះហើយ បើទោះទើបតែបញ្ចេញផ្លូវការបានប៉ុន្មានថ្ងៃប៉ុណ្ណោះ ប៉ុន្តែត្រូវបានប្រិយមិត្តចែកចាយបន្តឲ្យគ្នារាប់ពាន់នាក់រួចមកហើយ ហើយនេះគឺជាបទថ្មីមួយ បន្ទាប់ពីអ្នកស្រី បានសាងប្រជាប្រិយភាពតាមរយៈចម្រៀងជាច្រើនរួចមកហើយ។
លោកស្រី ទ្រី ដាណា ជាកូនទី៣ ក្នុងចំណោមបងប្អូន៥នាក់ ដែលមានទីកន្លែងកំណើតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ អ្នកជំនួញឆ្នើមរូបនេះ មានឪពុកឈ្មោះ ងួន ទ្រី និងអ្នកម្ដាយឈ្មោះ សៀង ជូរ ប៉ុន្តែលោកទាំង២ បានទទួលមរណភាពទៅហើយ ដោយជំងឺប្រចាំកាយ។
ក្រោយក្លាយជាក្មេងកំព្រាឪពុកម្ដាយ លោកស្រី ទ្រី ដាណា បានតស៊ូយកខោអាវជជុះមកលក់ក្រោមឆត្រ មុខរោងចក្រ ដើម្បីសន្សំប្រាក់យកមកដាក់ទុនរកស៊ីបន្តទៀត។ បន្ទាប់ពីមានប្រាក់មួយចំនួនក្នុងដៃ លោកស្រី ទ្រី ដាណា ក៏បានប្រថុយយកគ្រឿងសម្អាងពីគេមកលក់តាមផ្សារ។ ភាពរួសរាយរាក់ទាក់ សម្ដីសំដៅប្រកបដោយទឹកដម បានធ្វើឱ្យលោកស្រី ទ្រី ដាណា មានម៉ូយកាន់តែច្រើន ហើយក៏ប្រថុយយកគ្រឿងសម្អាងពីប្រទេសថៃមកលក់បន្ត។
មកទល់បច្ចុប្បន្ន លោកស្រី ទ្រី ដាណា បានក្លាយជាអគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌីដែលបានបើកដំណើរការកាលពីពាក់កណ្ដាលឆ្នាំ ២០១៩ សម្រាប់ផ្គត់ផ្គង់គ្រឿងសម្អាងនៅក្នុងប្រទេស។ សព្វថ្ងៃក្រុមហ៊ុននេះ មានអ្នកតំណាងចែកចាយប្រមាណ ៧ម៉ឺននាក់ គ្រប់រាជធានី-ខេត្ត ទូទាំងប្រទេសកម្ពុជា។បន្ទាប់ពីជោគជ័យលើមុខជំនួញគ្រឿងសម្អាង អ្នកស្រី ទ្រី ដាណា ក៏បានងាកមកបើកហាងលក់គ្រឿងអលង្ការ មាស ពេជ្រ មួយទៀតនៅឆ្នាំដដែល ហើយបច្ចុប្បន្ន បាន និងកំពុងជោគជ័យដូចគ្នា។
ក្រៅពីមុខជំនួញ ពាណិជ្ជករឆ្នើមរូបនេះ ក៏ជាអ្នកស្រលាញ់សិល្បៈរាំច្រៀងខ្លាំងដែរ ដូច្នេះហើយអ្នកស្រី ក៏បានយកបទចម្រៀង លោក កែវ វាសនា មក Cover ប៉ុន្មានបទ ធ្វើឱ្យមានសន្ទុះអ្នកគាំទ្រខ្លាំង។ ក្រោយមក អ្នកស្រី ក៏បានចេញបទ Original Song ដោយខ្លួនឯង និង Cover បទពីដើមរបស់លោកតា ស៊ីន ស៊ីសាមុត ខ្លះ រហូតមានអ្នកទស្សនាដល់ទៅរាប់លានដង។ ប៉ុន្តែម្ចាស់ហាងពេជ្ររូបនេះ បានបញ្ជាក់ហើយថា គ្រាន់តែច្រៀងដើម្បីកម្សាន្តរបស់អ្នកស្រីប៉ុណ្ណោះ៕