ភាព​​ភ្ញាក់ផ្អើល​បាន​កើត​ឡើង​​ជា​ថ្មី​​ម្ដង​ទៀត​​ហើយ​នៅ​​លើ​បណ្ដាញ​សង្គម​ប្រទេស​ចិន គឺ​ពាក់ព័ន្ធ​នឹង​ស្រី​ស្អាត​មួយ​រូប​ដែល​មាន​មុខ​គួរ​ឲ្យ​ស្រឡាញ់​ តែ​បែរ​ជា​មាន​សាច់​ដុំ​ធំៗ ដែល​មើល​ទៅ​ហាក់​ចម្លែក​ខុស​ពី​ធម្មតា។ ក្មេង​ស្រី​​ដែល​ល្បី​​នេះ​មាន​ឈ្មោះ​ថា Cheng Lu អាយុ​ ២៣​ឆ្នាំ មាន​កម្ពស់ ១,៥២​ម៉។

នៅ​លើ​បណ្ដាញ​សង្គម គេ​ប្រសិទ្ធិនាម​ឲ្យ​នាង​ថា "King Kong Barbie" ព្រោះ​​នាង​មាន​មុខ​ស្អាត​ដូច​តុក្កតា Barbie តែ​មាឌ​ដូច​សត្វ​គីងកុង​ទៅ​វិញ។ Cheng Lu បាន​រៀបរាប់​ថា នាង​ហ្វឹក​ហាត់​យក​សាច់​ដុំ​នេះ​អស់​រយៈពេល​៦​ឆ្នាំ​មក​ហើយ ដោយ​បាន​បញ្ចប់​ថ្នាក់​នៅ​សាលា​កាយវប្បកម្ម​ Shenyang Physical Education Academy។ ​​​​​​​​​​​​​​​​​​​​​​នៅ​លើ​វីដេអូ​ដែល Cheng Lu បង្ហោះ បាន​បង្ហាញ​ថា នាង​អាច​លើក​ដុំ​ដែក​ដែល​មាន​ទម្ងន់​ដល់ ១២០​គីឡូ​ក្រាម​ឯណោះ ដែល​ធ្ងន់​ជាង​ទម្ងន់​​​ខ្លួន​នាង​ដល់​ទៅ​ ២​ដង។ "ខ្ញុំ​ចង់​បង្ហាញ​ថា ខ្ញុំ​ក៏អាច​ធ្វើ​​អ្វី​ដែល​​មនុស្ស​ប្រុស​អាច​ធ្វើ​បាន​ដែរ" នេះ​ជា​សម្ដី​របស់ Cheng Lu។

ទោះ​មាន​ប្រជាប្រិយភាព​យ៉ាង​ម៉េច​ក៏​ដោយ​នៅ​លើ​បណ្ដាញ​សង្គម ភាព​រិះគន់​គឺ​ជៀស​មិន​ផុត​ឡើយ​សម្រាប់ Cheng Lu។ មនុស្ស​មួយ​ចំនួន​បាន​ចំអក​​​ពី​រូបរាង​កាយ​របស់​នាង ហើយ​ថា នាង​នឹង​ពិបាក​រក​មិត្ត​ប្រុស​មិន​ខាន។ យ៉ាង​ណា​មិញ Cheng Lu មិន​សូវ​ជា​យក​ចិត្ត​ទុក​ដាក់​​ឡើយ តែ​នៅ​បន្ត​សម្រេច​ក្ដី​ស្រមៃ​ខ្លួន​ទៅ​មុខ​ទៀត។

កន្លង​មក Cheng Lu ធ្លាប់​បាន​ចូលរួម​ការ​ប្រកួត​នៅ​ក្នុង​ស្រុក​មួយ​ចំនួន​ផង​ដែរ។ បន្ថែម​ពី​នេះ នាង​ក៏​មាន​ធ្វើ​វីដេអូ​បង្ហោះ ដើម្បី​រក​ចំណូល​ពី​អនឡាញ​ដែរ ដោយ​ទទួល​បាន​ការ​ជួល​ឲ្យ​ផ្សព្វផ្សាយ​ផលិតផល​កីឡា​មួយ​ចំនួន៕