រុស្ស៊ី រងការចោទថា បានបង្ហោះអាវុធសម្រាប់កម្ទេចផ្កាយរណបអាមេរិក
- 2020-07-24 02:23:06
- ចំនួនមតិ 0 | ចំនួនចែករំលែក 0
រុស្ស៊ី រងការចោទថា បានបង្ហោះអាវុធសម្រាប់កម្ទេចផ្កាយរណបអាមេរិក
ចន្លោះមិនឃើញ
អាមេរិក បានចោទរុស្ស៊ីកាលពីថ្ងៃទី២៣ ខែកក្កដា ឆ្នាំ២០២០ថា បានបានបង្ហោះអាវុធសម្រាប់កម្ទេចផ្កាយរណប ទៅក្នុងទីអវកាស ដោយលើកឡើងថា សកម្មភាពនេះ បានគំរាមដល់ផ្កាយរណបអាមេរិក និងសម្ព័ន្ធមិត្ត។
លោកឧត្តមសេនីយ៍ John W Raymond មេបញ្ជាការកងទ័ពអវកាសអាមេរិក បានចេញសេចក្តីថ្លែងការណ៍បញ្ជាក់ថា ប្រព័ន្ធផ្កាយរណបរុស្ស៊ី ត្រូវបានប្រើប្រាស់ជាអាវុធដាក់នៅលើគន្លងផែនដី ហើយនេះជាអ្វីដែលអាមេរិក បានលើកឡើងពីក្តីបារម្ភនេះ តាំងពីដើមឆ្នាំមក នៅពេលផ្កាយរណបរុស្ស៊ី ហោះមកជិតផ្កាយរណបរដ្ឋាភិបាលអាមេរិក។
សេចក្តីថ្លែងការណ៍បន្តថា៖ «នេះជាភស្តុតាងបន្ថែមនៃការខិតខំរបស់រុស្ស៊ី ក្នុងការអភិវឌ្ឍ និងធ្វើតេស្តសាកល្បងប្រព័ន្ធអវកាស ស៊ីគ្នាជាមួយផែនការយោធារបស់វិមានគ្រែមលីន ក្នុងការបញ្ជូនសព្វាវុធ ដែលបង្កគ្រោះថ្នាក់ដល់ប្រព័ន្ធអវកាសអាមេរិក និងសម្ព័ន្ធមិត្ត»។
យ៉ាងណាមិញ ក្រសួងការពារជាតិរុស្ស៊ី អះអាងនាពេលកន្លងមកថា ខ្លួនកំពុងប្រើបច្ចេកវិទ្យាថ្មីមួយ ដើម្បីត្រួតពិនិត្យឧបករណ៍អវកាសតែប៉ុណ្ណោះ ដោយវានឹងផ្តល់នូវព័ត៌មានច្បាស់លាស់ពីឧបករណ៍ខ្លួន ក្នុងការបញ្ជូនមកមន្ទីរគ្រប់គ្រងនៅលើផែនដី៕