ថៃ៖ សពឃាតក ដែលស៊ីគ្រឿងក្នុងក្មេង៧នាក់ ត្រូវបូជាហើយ ក្រោយទុកក្នុងកែវកញ្ចក់ ៦០ឆ្នាំ
- 2020-07-25 02:59:44
- ចំនួនមតិ 0 | ចំនួនចែករំលែក 0
ថៃ៖ សពឃាតក ដែលស៊ីគ្រឿងក្នុងក្មេង៧នាក់ ត្រូវបូជាហើយ ក្រោយទុកក្នុងកែវកញ្ចក់ ៦០ឆ្នាំ
ចន្លោះមិនឃើញ
នៅទីបំផុតសាកសពឃាតករឈ្មោះ Si Quey ដែលរក្សាទុកក្នុងកែវកញ្ចក់ ៦០ឆ្នាំ នៅសារមន្ទីរក្រុងបាងកក ប្រទេសថៃ ត្រូវបានបូជាហើយ។ ការបូជានេះធ្វើឡើងនៅវត្ត Bang Praek Tai ជិតពន្ធនាគារ Bang Kwang ក្នុងសង្កាត់ Muang ក្រុងបាងកក កាលពីថ្ងៃទី២៣ ខែកក្កដា ឆ្នាំ២០២០។
ការសម្រេចនេះ ក៏ធ្វើឡើងក្រោយពេលដែលមានមនុស្សប្រមាណជាង ១ម៉ឺននាក់ចុះហត្ថលេខាលើញត្តិមួយ ទាមទារឱ្យមានការបូជាសពរបស់គាត់សមរម្យផងដែរ។
សូមជម្រាបថា Si Quey គឺជនអន្តោប្រវេសន៍មកពីប្រទេសចិន ត្រូវបានតុលាការថៃ កាត់ទោសប្រហារជីវិតដោយបាញ់សម្លាប់ចោល កាលពីឆ្នាំ១៩៥៩ ក្នុងអាយុ៣២ឆ្នាំ ដោយចោទប្រកាន់ពីបទមនុស្សឃាតលើក្មេងប្រុសចំនួន៧នាក់ និងចោទថាគាត់បានខ្វេះគ្រឿងក្នុង (បេះដូង ថ្លើម) ក្មេងទាំងនោះមកស្ងោរស៊ី។
យ៉ាងណាមិញ គាត់បានសារភាពថាពិតជាបានសម្លាប់ក្មេងៗទាំងនោះមែន ក្រោយត្រូវចាប់ខ្លួនក្នុងឆ្នាំ១៩៥៨ ប៉ុន្តែបដិសេធថា មិនបានស៊ីគ្រឿងក្នុងពួកគេដូចការចោទប្រកាន់ឡើយ។
សាកសពរបស់អ្នកទោសរូបនេះ មិនត្រូវបានយកទៅបូជាភ្លាមៗនៅពេលនោះទេ ដោយរក្សាទុកនៅក្នុងកែវកញ្ចក់នៅមន្ទីរពេទ្យ Siriraj នៃសារមន្ទីរក្រុងបាងកក ដើម្បីទុកសាកសពសម្រាប់បង្រៀនដល់និស្សិតវេជ្ជសាស្រ្ត និងសម្រាប់ភ្ញៀវចូលទស្សនា៕