ឡាន SUV ប្រណីតផុតលេខរបស់ Rolls-Royce ស៊ីសាំងកម្រិតណាដែរ?

2020-07-28 03:41:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

Rolls-Royce Cullinan ដែលជារថយន្ត SUV ដំបូងផលិតដោយម៉ាកយីហោរថយន្តអង់គ្លេស បានទាក់ទាញចំណាប់អារម្មណ៍មហាជនជាច្រើនពេលបង្ហាញមុខកាលពីឆ្នាំ ២០១៨ ហើយរថយន្តនេះដែរបានជួយឲ្យ Rolls-Royce បង្កើតបាននូវកំណត់ត្រាលក់ដ៏ច្រើនមិនធ្លាប់មានកាលពីឆ្នាំ ២០១៩ ផងដែរ។ តទៅនេះជារឿងរ៉ាវមួយចំនួនអំពីរថយន្ត Cullinan ៖

តម្លៃ

នៅលើទីផ្សារសហរដ្ឋអាមេរិក រថយន្ត Rolls-Royce Cullinan មានតម្លៃចាប់ពីប្រមាណ ៣២៥ ០០០ដុល្លារ មិនទាន់គិតបញ្ចូលថ្លៃដឹកជញ្ជូន ២ ៧៥០ដុល្លារ។

Option

រថយន្ត Rolls-Royce មិនមានជា Option ដូចជារថយន្តដទៃទៀតនោះទេ។ ផ្ទុយទៅវិញ Rolls-Royce មានផ្ដល់ជូនអតិថិជននូវជម្រើសអាចជ្រើសរើសការតុបតែងលើរថយន្តបានតាមចិត្តចង់។

ប្រព័ន្ធម៉ាស៊ីន

រថយន្តនេះប្រើប្រាស់ម៉ាស៊ីន Twin-Turbo ចំណុះ ៦,៨លីត្រ មាន ១២ស៊ីឡាំង ដែលផលិតកម្លាំងបាន ៥៦៣សេះ ភ្ជាប់ជាមួយប្រអប់លេខស្វ័យប្រវត្តិ ៨វគ្គ និងមានប្រព័ន្ធបើកបរប៉ុងពីរ (All-Wheel Drive) មកជាស្តង់ដារតែម្ដង។

កម្រិតស៊ីប្រេងឥន្ធនៈ

តាមតួលេខរបស់ស្ថាប័ន EPA បានបង្ហាញថា រថយន្ត Cullinan មានកម្រិតស៊ីប្រេង ១៩,៦លីត្រ/១០០គ.ម ពេលបើកបរក្នុងក្រុង និងការបើកបរលើផ្លូវលាតមានកម្រិតស៊ីប្រេង ១១,៧៦លីត្រ/១០០គ.ម។

ប្រព័ន្ធសុវត្ថិភាព

រថយន្ត Cullinan គ្រប់ម៉ូដែលមានបំពាក់នូវពោងសុវត្ថិភាពមកជាស្តង់ដារ ដែលក្នុងនោះរួមមានពោងសុវត្ថិភាពបំពាក់លើទ្វាររថយន្ត ពោងសុវត្ថិភាពផ្នែកខាងលើនៃបង្អួចកញ្ចក់រថយន្តមាននៅកៅអីជួរទីមួយនិងទីពីរ និងពោងការពារជង្គង់អ្នកបើកបរនិងអ្នករួមដំណើរផងដែរ។ ឧបករណ៍សុវត្ថិភាពវិញរួមមានកាមេរ៉ាមើលពេលយប់, ប្រព័ន្ធឲ្យដំណឹងពីអ្នកថ្មើជើង និងសត្វព្រៃ, ប្រព័ន្ធដាស់តឿនអ្នកបើកបរ, កាមេរ៉ាបង្ហាញទិដ្ឋភាពបែប Panoramic ចំនួនបួន, Active Cruise Control, ប្រព័ន្ធព្រមានពីការប៉ះទង្គិច, ប្រព័ន្ធ Cross-Traffic ជំនួយពេលចេញពីចំណត និងប្រព័ន្ធព្រមានពីការបើកខុសគន្លងផងដែរ។

ប្រព័ន្ធឲ្យដំណឹង និងការកម្សាន្ត

លើរថយន្ត Cullinan មានប្រើប្រព័ន្ធឲ្យដំណឹង និងការកម្សាន្តជំនាន់ចុងក្រោយរបស់ BMW ដែលរួមមានរន្ធ USB ចំនួនប្រាំ និងមានកន្លែងសាកថ្មទូរសព្ទឥតប្រើខ្សែផងដែរ។ កៅអីខាងក្រោយអាចជ្រើសរើសបំពាក់មកជាមួយនូវ Tablet ដែលអាចប្រើសម្រាប់បញ្ជាប្រព័ន្ធកម្សាន្ត និងប្រព័ន្ធបង្ហាញផ្លូវ។

ផាសុកភាពក្នុងរថយន្ត

រថយន្ត Cullinan មានជម្រើសរៀបចំកៅអីក្រោយចំនួនពីរប្រភេទ រួមមាន Lounge Seats និង Individual Seats។ ជាមួយ Individual Seats គេអាចបំពាក់នូវទូដាក់ភេសជ្ជៈមួយនៅប្រឡោះកណ្ដាលនៃកៅអីក្រោយទាំងពីរ ដែលក្នុងនោះមានកែវស្រាវីស្គីរបស់ Rolls-Royce ចំនួនពីរ, កែវសាំប៉ាញពីរ, ដបសម្រាប់ចាក់ស្រា និងទូត្រជាក់មួយ។