ក្មេងប្រុសស្គមកំព្រឹងដែលគេចោទថាជាអាបធ្មប់ក្នុងរូបនេះ សុខទុក្ខយ៉ាងណាហើយ?
- 2020-09-14 01:09:18
- ចំនួនមតិ 0 | ចំនួនចែករំលែក 0
ក្មេងប្រុសស្គមកំព្រឹងដែលគេចោទថាជាអាបធ្មប់ក្នុងរូបនេះ សុខទុក្ខយ៉ាងណាហើយ?
ចន្លោះមិនឃើញ
នៅចាំរូបថតមួយសន្លឹកដែលល្បីល្បាញនៅលើបណ្ដាញសង្គមនេះទេ? នៅក្នុងរូបនេះគឺជាកុមារាម្នាក់ដែលមានឈ្មោះថា Hope ស្ថិតនៅក្នុងសភាពស្គមរីងរៃ សឹងតែគ្មានកម្លាំងដើរហើរ ហាក់កំពុងស្ថិតនៅជិតមាត់ទ្វារមច្ចុរាជ។ យ៉ាងណាមិញ ដោយសំណាងល្អ Hope ត្រូវបានស្ត្រីចិត្តធម៌ម្នាក់សង្គ្រោះជីវិតទាន់ពេលវេលា ហើយនៅពេលនេះ Hope មានសុខភាពល្អជាធម្មតាដូចក្មេងដទៃទៀតអ៊ីចឹង។
នៅពេលអ្នកស្រី Anja Ringgren Loven បានប្រទះឃើញ Hope ដំបូងគឺនៅចំពេលដែលក្មេងប្រុសតូចរូបនេះកំពុងដើរតែលតោលតែឯងលើផ្លូវមួយកន្លែងស្ថិតនៅក្នុងភូមិ Akwa Ibom ប្រទេសនីហ្សេរីយ៉ា។ កាលនោះ Hope មានអាយុត្រឹមតែ៣ឆ្នាំប៉ុណ្ណោះ ហើយត្រូវក្រុមគ្រួសារ ក៏ដូចជាអ្នកស្រុកភូមិបោះបង់ចោល ព្រោះតែជំនឿថា Hope គឺជាក្មេងអាបធ្មប់។ អ្នកស្រី Anja ដែលជាបុគ្គលិកក្រុមការងារមនុស្សធម៌មកពីដាណឺម៉ាក បានបញ្ចុកចំណី និងទឹកឲ្យ Hope ហើយយក Hope ទៅសង្គ្រោះនៅមជ្ឈមណ្ឌលការពារកុមារ។
រូបមួយសន្លឹកខាងក្រោមនេះគឺមានរយៈពេល១ឆ្នាំ ដោយរាប់គិតចាប់តាំងពីថ្ងៃដែលអ្នកស្រី Anja បានជួយសង្គ្រោះ Hope ដំបូងកាលពីខែមករា ឆ្នាំ២០១៦ មកដល់ខែមករា ឆ្នាំ២០១៧៖
បើតាមរូបភាពខាងលើ យើងសង្កេតឃើញថា ក្រោយមានការយកចិត្តទុកត្រឹមតែ១ឆ្នាំ ជីវិត Hope បានប្រែប្រួលជាខ្លាំង ហើយសុខភាពរបស់គេទៀតសោតក៏ល្អប្រពៃដូចគេឯងផងដែរ។ នៅអាយុ៤ឆ្នាំនេះ Hope បានចូលសាលារៀនជាលើកដំបូងនៅក្នុងឆាកជីវិតរបស់គេ។
ដោយឡែក រូបប៉ុន្មានស្លឹកផ្សេងទៀតខាងក្រោមគឺជា Hope នៅអាយុ៧ឆ្នាំ (ដើមឆ្នាំ២០២០)៖
អ្នកស្រី Anja បានបង្ហោះរូបខាងលើនេះ ហើយរៀបរាប់ថា Hope កំពុងស្ថិតនៅក្នុងបរិយាកាសអប់រំល្អប្រសើរ និងសុខភាពរឹងមាំ។ បន្ថែមពីនេះ អ្នកស្រីបានបន្តថា Hope ចេះស្គាល់ខុសត្រូវណាស់ ដោយមិនស្អប់ខឹងឪពុកម្ដាយរបស់ខ្លួន ឬនរណាឡើយ ដែលបានចោទថារូបគេជាអាបធ្មប់ ហើយបោះបង់រូបគេចោល។ Hope យល់ថា ការស្អប់គឺជាបន្ទុកធំពិបាកទ្រាំទ្រ គឺមានតែក្ដីស្រឡាញ់ទេដែលជាតម្រូវការពិតប្រាកដរបស់មនុស្សគ្រប់រូប៕