អំពូលភ្លើងបំភ្លឺផ្លូវសាធារណៈជាង ៤០០បង្គោល ត្រូវ​បានដាច់ដោយកន្លែងនៅក្នុងក្រុងស្វាយរៀង​ និងរៀបចំផ្លាស់ប្តូរបំភ្លឺឡើងវិញទាំងអស់ចាប់ពីថ្ងៃទី ១​ ខែតុលា ឆ្នាំ២០២០នេះតទៅ។ នេះ​បើតាម​ការ​បញ្ជាក់​នៅ​ក្នុង​​កិច្ចប្រជុំបូក​សរុប​លទ្ធផល​ការងារ​ប្រចាំ​ត្រីមាសទី៣ និង​លើក​ទិស​ដៅ​ការងារ​ត្រីមាស​ទី ៤ឆ្នាំ២០២០ ដឹកនាំដោយ​លោក ម៉ែន វិបុល អភិបាល​ខេត្តស្វាយ​រៀង ធ្វើឡើង​កាលពី​ថ្ងៃទី២៣ ខែកញ្ញា ឆ្នាំ២០២០។

លោកអភិបាលខេត្ត បានថ្លែងនូវការកោតសសើអរគុណចំពោះកងកម្លាំងមានសមត្ថកិច្ច ប្រធាន​គណៈ​បញ្ជាការឯកភាព ក្រុង ស្រុក និងអាជ្ញាធរពាក់ព័ន្ធទាំងអស់ បាន​យកចិត្តទុក​ដាក់​លើ​ការ​ងារ​ពង្រឹងសន្តិសុខសុវត្ថិភាពជូនដល់ប្រជាពលរដ្ឋបានល្អប្រសើរ។ ក្នុងនោះដែរ​លោក​អភិបាលខេត្ត បានដាក់ចេញនូវទិសដៅ និងចំណុចសំខាន់ៗមួយចំនួនដូចជា៖

១- រដ្ឋបាលខេត្ត និងរៀបចំដាក់​អំពូលភ្លើង​បំភ្លឺ​ផ្លូវ​សាធារ​ណៈ​ដែល​បាន​ដាច់​ដោយ​កន្លែង​នៅ​ក្នុង​ក្រុង​ស្វាយ​រៀង​ឡើងវិញ ក្នុងនោះក៏មានថែមនូវបង្គោលភ្លើងនៅតាមបណ្តាផ្លូវសំខាន់ៗមួយចំនួនទៀត ចាប់​ពីថ្ងៃទី០១ ខែតុលា ឆ្នាំ២០២០តទៅ ។ ទន្ទឹមនោះក៏មានរៀបចំដាក់នៅទីប្រជុំជនផ្សារក្រោលគោ និង​ទីប្រជុំជនផ្សារស្វាយជ្រំផងដែរ។

២- គណៈបញ្ជាការឯកភាពរដ្ឋបាល ក្រុង ស្រុក ត្រូវត្រៀមលក្ខណៈរៀបចំទីទួលមានសុវត្ថិភាព និង​ត្រៀម​សម្ភារៈ​គ្រប់បែបយ៉ាង ដើម្បី​ជម្លៀស​ប្រជាពលរដ្ឋ​ពេល​ជួប​គ្រោះ​ធម្មជាតិ​ដែល​អាច​កើត​ឡើង​ជា​យថា​ហេតុ ដូចជាជំនន់ទឹកភ្លៀងជាដើម​ ក្នុងរដូវវស្សានេះ។

៣- រដ្ឋបាល ក្រុង ស្រុក អាជ្ញាធរពាក់ព័ន្ធ ត្រូវបន្តជម្រុញផ្សព្វផ្សាយការធ្វើអត្ថសញ្ញាណប័ណ្ណ នៅ​តាម​មូល​ដ្ឋានឱ្យបានត្រឹមត្រូវ និងឆាប់រហ័ស​ ជូនប្រជាពលរដ្ឋ។

៤- រដ្ឋបាល​ក្រុង ស្រុក ត្រូវ​ជម្រុញ​ការ​ផ្សព្វផ្សាយ​ទៅ​ដល់​ប្រជាពលរដ្ឋ​ក្នុង​ការ​បង់​ពន្ធ​អចលន​ទ្រព្យ​គ្រប់​ប្រភេទ​ឱ្យ បានមុនការកំណត់នៅថ្ងៃទី៣១ ខែកញ្ញា ឆ្នាំ២០២០នេះ។

៥-មន្ទីរកសិកម្ម និងអភិបាលក្រុងស្រុក ត្រូវ​បន្តតាម​ដាន​ការ​បង្ករ​បង្កើន​ផល​របស់​ប្រជាពលរដ្ឋ​រួម​ទាំង​ការ​ចិញ្ចឹមសត្វ និងដាំដំណាំរួមផ្សំ​ ក៏ដូចជាបញ្ហាប្រឈមផ្សេងៗ ។

៦- បន្តចូលរួមផ្សព្វផ្សាយអំពីច្បាប់ចរណ៍ផ្លូវគោក បញ្ហាគ្រឿងញៀន ការ​ប្រើ​ប្រាស់​អំពើ​ហឹង្សា​ក្នុង​គ្រួសារ។

៧- ជម្រុញការធ្វើរូប’’ឡូហ្គូ’’តំណាងរដ្ឋបាលក្រុងស្រុកនីមួយៗ និងរៀបចំនូវខ្លឹមសារ អត្ថន័យ នៃ​(ឡូហ្គូ)ក្រុងស្រុកនីៗអោយបានត្រឹមត្រូវ។

ប្រភព៖ រដ្ឋបាលខេត្តស្វាយរៀង