ធនាគារពិភពលោក៖ កំណើនសេដ្ឋកិច្ចកម្ពុជា ធ្លាក់ចុះយ៉ាងគំហុកបំផុតមិនធ្លាប់មាន
- 2020-09-29 09:32:55
- ចំនួនមតិ 0 | ចំនួនចែករំលែក 0
ធនាគារពិភពលោក៖ កំណើនសេដ្ឋកិច្ចកម្ពុជា ធ្លាក់ចុះយ៉ាងគំហុកបំផុតមិនធ្លាប់មាន
ចន្លោះមិនឃើញ
យោងតាមរបាយការណ៍របស់ធនាគារពិភពលោក ចេញផ្សាយនៅថ្ងៃទី២៩ ខែកញ្ញា ឆ្នាំ២០២០ បង្ហាញថា សេដ្ឋកិច្ចកម្ពុជា ក្នុងឆ្នាំ២០២០នេះ ត្រូវបានព្យាករទុកថា នឹងមានកំណើនអវិជ្ជមាន គឺ -២% ដែលជាការធ្លាក់ចុះយ៉ាងគំហុកបំផុតមិនធ្លាប់មានក្នុងប្រវត្តិសាស្រ្តថ្មីៗនេះរបស់កម្ពុជា ជាហេតុធ្វើឱ្យប៉ះពាល់ធ្ងន់ធ្ងរទៅលើសុខុមាលភាពគ្រួសារ និងអាចធ្វើឱ្យភាពក្រីក្រកើនឡើងទៀតផង។
** ទាញយក App Kley Kley នៅលើ Android និង iOS ដើម្បីទទួលបានព័ត៌មានលឿនរហ័ស **
ការធ្លាក់ចុះកំណើនសេដ្ឋកិច្ចបែបនេះ ដោយសារតែវិបត្តិបង្កឡើងដោយការរីករាលដាលនៃជំងឺកូវីដ១៩ ដែលប៉ះពាល់ដល់វិស័យសំខាន់ៗរបស់កម្ពុជា ជាពិសេសវិស័យសំណង់ ទេសចរណ៍ និងការនាំចេញទំនិញ ដែលទាំងអស់នេះ មានចំណែកជាង ៧០% ក្នុងកំណើនសរុប និង ៣៩% នៃការងារមានប្រាក់កម្រៃទាំងអស់ ក្នុងឆ្នាំ២០១៩។
របាយការណ៍ដដែលបានឱ្យដឹងទៀតថា ការឡើងថ្លៃម្ហូបអាហារក្នុងពេលថ្មីៗនេះ បានរុញអតិផរណាឱ្យឡើងដល់ ៣,១% ក្នុងខែកក្កដា ឆ្នាំ២០២០។ កំណើននៃចរាចរណ៍សាច់ប្រាក់ទូទៅមានសភាពថមថយដោយកើនបានត្រឹម ១២,៣% គិតត្រឹមខែមិថុនា ឆ្នាំ២០២០ ធៀបទៅនឹង ១៨,២% ក្នុងរយៈពេលដូចគ្នាក្នុងឆ្នាំ២០១៩។
ធនាគារពិភពលោក ក៏បានព្រមានដែរថា អត្រាភាពក្រីក្រនៅកម្ពុជា ទំនងជានឹងកើនឡើងវិញ ដោយសារតែកំណើនសេដ្ឋកិច្ចមានសភាពមិនសូវល្អ បន្ថែមដោយការបាត់បង់ការងារ ការធ្លាក់ចុះក្នុងចំណូលគ្រួសារ និងឡើងថ្លៃទំនិញស្បៀងអាហារផង។ ភាពមិនប្រាកដប្រជានៅមានច្រើន ជុំវិញចក្ខុវិស័យកំណើនសេដ្ឋកិច្ចរបស់កម្ពុជា៕