ខណៈដែល​មេដឹកនាំមហាអំណាចបីប្រទេសគឺ រុស្ស៊ី អាមេរិក និង​បារាំង បាន​អំពាវនាវឱ្យ​​ប្រទេស​អាមេនី និង​អាហ្ស៊ែបៃហ្សង់ ចរចាដោយសន្តិវិធី និង​អនុវត្តបទឈប់បាញ់នោះ បែរជាប្រទេស​តួកគី ច្រាន​ចោល​ការអំពាវនាវនេះ ហើយ​ឱ្យ​ប្រទេស​ទាំងពីរ បន្តធ្វើសង្គ្រាម​ដោះស្រាយ​ដោយខ្លួន​ពួកគេ​ផ្ទាល់ជុំវិញ​ការ​ដណ្តើម​តំបន់​ភ្នំ Nagorno-Karabakh។

ប្រធានាធិបតីតួកគី​លោក Recep Tayyip Erdogan ដែល​ឈរខាង​អាហ្ស៊ែបៃហ្សង់ បាន​ថ្លែង​ក្នុងពិធីមួយ​កាលពីថ្ងៃទី២៩ ខែកញ្ញា ឆ្នាំ​២០២០ថា ដាច់ខាត​សង្គ្រាមត្រូវតែបន្តធ្វើឡើង ហើយថាការអំពាវនាវឱ្យមានបទឈប់បាញ់នោះ គឺជារឿងមិនអាចទទួលយកបានឡើយ។

លោកអះអាងថា បើចង់រកដំណោះស្រាយនោះ លុះត្រាតែអាមេនី ដកទ័ពទាំងអស់​ចេញពីតំបន់ Nagorno-Karabakh ហើយអនុញ្ញាតឱ្យ​ជនជាតិ​អាហ្ស៊ែបៃហ្សង់រាប់ម៉ឺននាក់ ដែលភៀសខ្លួនក្នុងសង្គ្រាម​កាលពី ៣០ឆ្នាំមុននោះ ទៅ​រស់នៅក្នុងតំបន់​នេះវិញ ដើម្បី​បញ្ចប់​វិបត្តិដ៏រុំារ៉ៃនេះ។

​ដូចគ្នាដែរ ប្រធានាធិបតីអាហ្ស៊ែបៃហ្សង់ លោក Ilham Aliyev បាន​បញ្ជាក់​ថា សង្គ្រាម​នេះ​នឹងមិនបញ្ចប់ឡើយ រហូតទាល់តែ អាហ្ស៊ែបៃហ្សង់ គ្រប់គ្រង​តំបន់នេះទាំងមូលមកវិញ។

​បើយោងតាម​ប្រធានាធិបតីបារាំង លោក Emmanuel Macron ក្នុងកិច្ចប្រជុំ​កំពូល EU នៅថ្ងៃទី២ ខែតុលា ឆ្នាំ​២០២០នេះ ឱ្យដឹងថា មាន​ក្រុមឧទ្ទាមប្រមាណ ៣០០នាក់ បាន​ចាកចេញពីស៊ីរី ទៅដល់ក្រុង Baku ប្រទេសអាហ្ស៊ែបៃហ្សង់ ឆ្លងកាត់​តាមប្រទេសតួកគី ដើម្បី​ទៅជួយច្បាំង​ក្នុងសង្គ្រាមខាងលើនេះ។

កាលពីចុងខែកញ្ញាកន្លងទៅ ​ក្រសួង​ការពារជាតិ​អាមេនី បាន​ចោទតួកគីថា បានចូលរួមពាក់ព័ន្ធដោយផ្ទាល់​ក្នុងសង្គ្រាមនេះ ដោយចូលដៃជើងជាមួយអាហ្សែ៊បៃហ្សង់ ពោលគឺ​មាន​យន្តហោះចម្បាំង Sukhoi S-25 របស់ខ្លួនមួយគ្រឿង ត្រូវបាន​បាញ់ទម្លាក់​ដោយ​យន្តហោះ​ចម្បាំង F-16 របស់​តួកគី ក្នុងដែនអាកាស​អាមេនី៕